Read Fulfulde Yuhanna 2 Bible Online

Yuhanna 2 - Fulfulde bible

Yuhanna 2

¹Nyalɗe ɗiɗi ɓaawo maajum, ɓaŋgal waɗi haa Kana nder lesdi Galiili. Daada[5] Yeesu ɗonno ton,

²Yeesu e pukara'en muuɗum boo ewnaama haa ɓaŋgal man.

³Nde inaboojam timmi haa maɓɓe, daada Yeesu wi'i mo: “Ɓe ngalaa inaboojam.”

⁴Yeesu wi'i mo: “Debbo, ko yaalu ma bee am? Wakkati am siwaa wargo tawon.”

⁵Nden daada maako wi'i suka'en: “Mbaɗe ko o wi'ata on fuu.”

⁶Haa ton, woodi looɗe kaa'e joweego, Yahuudu'en ɗon kuuwtinira ɗe ngam laɓɓineeki, fodde umroore diina maɓɓe. Looɗe man, woore maaje fuu ɗon hoo'a ndiyam baakin liitir teemerre.

⁷Yeesu wi'i suka'en: “Kebbine looɗe ɗe'e bee ndiyam.” Ɓe kebbini ɗe.

⁸Nden o wi'i ɓe: “Jonta, nyeɗe, njahrane kaliifaajo ɓaŋgal[6].” Ɓe nyeɗi, ɓe njahrani mo.

⁹Kaliifaajo ɓaŋgal metti ɗam, tawi ndiyam laatake inaboojam. Ammaa o anndaa haa toy inaboojam ɗam iwi, sey suka'en nyeɗnooɓe ndiyam go anndi. O ewni ɓaŋɗo,

¹⁰o wi'i mo: “Koo moy ɗon aarta hokkugo ewnaaɓe mum inaboojam mbooɗɗam. To yimɓe nguyki, o hokkan ɓe famɗa-dakamjam. Ammaa an a sigi inaboojam mbooɗɗam haa jonta!”

¹¹Kanjum woni kaayeefiwol ngol Yeesu aarti waɗugo. O waɗi ngol haa Kana nder lesdi Galiili. O waŋgini tedduŋgal maako. Pukara'en maako nuɗɗini mo.

¹²Ɓaawo man, o yehi Kafarnahum bee daada maako e deerɗiraaɓe maako e pukara'en maako, ɓe njooɗi ton nyalɗe seɗɗa.

¹³Nde juulde Paska Yahuudu'en ɓadake, Yeesu yehi Urusaliima.

¹⁴O tawi soorrooɓe na'i e baali e pooli nder haykaliiru, o tawi boo sannjooɓe ceede ɗon njooɗi ton.

¹⁵O hawti ɓoggi, o waɗi ɓoccol, o riiwi ɓe bee baali maɓɓe e na'i maɓɓe fuu diga haykaliiru. O hippi taabe sannjooɓe ceede haa ceede maɓɓe caŋkiti.

¹⁶O wi'i soorrooɓe pooli boo: “Cottine ɗi, taa laatine suudu Baabiraawo am suudu filu!”

¹⁷Pukara'en maako ciftori ko winnda nder Deftere: “Yiide nde marmi ngam suudu ma, ɗon wula nder ɓernde am bana yiite.”

¹⁸Ammaa Yahuudu'en ƴami mo: “Kaayeefiwol ngole a waɗata ngam hollugo min a woodi baawɗe waɗugo bana nii?”

¹⁹Yeesu jaabi ɓe: “Ngibbine haykaliiru ndu'u, min mi mahitan ndu nder nyalɗe tati.”

²⁰Nden Yahuudu'en mbi'i mo: “Ɓe mahi haykaliiru ndu nder duuɓi cappanɗe nayi e joweego. An a mahitan ndu nder nyalɗe tati?”

²¹Ammaa kaŋko o wolwani ɓe dow ɓanndu maako laatiindu haykaliiru.

²²Nde Yeesu ummiti diga maayde, pukara'en maako ciftori ko o wolwino, ɓe nuɗɗini ko winnda nder Deftere e bolle ɗe Yeesu wi'no fuu.

²³Yaake Yeesu ɗonno haa Urusaliima nder nyalɗe juulde Paska, ɗuuɗɓe nuɗɗini mo ngam ɓe ngi'i kaayeefiiji ɗi o waɗi.

²⁴Ammaa Yeesu hoolaaki ɓe ngam o anndi yimɓe fuu.

²⁵O walaa haaje goɗɗo anndina mo haala yimɓe, ngam o anndi ko woni nder ɓerɗe maɓɓe.