Read Fulfulde Yuhanna 3 Bible Online

Yuhanna 3 - Fulfulde bible

Yuhanna 3

¹Woodino goɗɗo nder Farisa'en, innde maako Nikodemus, o gooto nder ardiiɓe Yahuudu'en.

²O wari haa Yeesu bee jemma, o wi'i mo: “Moodibbo, min anndi a ekkitinoowo mo Allah neli ɗum, ngam walaa koo gooto waawata waɗugo kaayeefiiji bana ɗi a waɗata, sonaa to Allah ɗon wondi bee maako.”

³Yeesu jaabi mo: “Gooŋga mi wi'ata ma: To neɗɗo danyaaka ɗiɗawre, o waawataa yi'ugo laamu Allah.”

⁴Nikodemus ƴami mo: “To neɗɗo ndottidi, noy o heɓrata danyeego fahin? O waawan nastugo reedu daada maako, o danye fahin na?”

⁵Yeesu jaabi mo: “Gooŋga mi wi'ata ma: To neɗɗo danyaaka fahin bee ndiyam e bee Ruuhu, nden kam o waawataa nastugo laamu Allah.

⁶Ko danya e yimɓe, ɗum ɓanndu tan. Ko danya e Ruuhu, ɗum ruuhu.

⁷Taa hayɗin ngam mi wi'i ma: Haani on ndanye ɗiɗawre.

⁸Henndu ɗon wifa haa ndu muuyi fuu, a ɗon nana sonyo maaru, ammaa a heɓtataa toy ndu iwi malla toy ndu yahata. Bana non ɗum laatanto danyaaɗo diga Ruuhu.”

⁹Nikodemus ƴami mo: “Noy ɗum waaroto?”

¹⁰Yeesu jaabi mo: “An a moodibbo Isra'iila'en, a anndaa ɗum na?

¹¹Gooŋga mi wi'ata ma: Minin min ɗon mbolwa ko min anndi, min ɗon ceedo ko min ngi'i bee gite amin, ammaa bee non fuu on njaɓataa seedamku amin.

¹²To on nuɗɗinaay yam nde mi wolwani on haala kuuje duniyaaru, noy on nuɗɗinirta to mi wolwanan on haala kuuje asama?

¹³Walaa mo meeɗi yahugo haa asama, sonaa mo iwi haa asama, waato Ɓii-neɗɗo.

¹⁴Bana no Muusa ɓiliri mboodi njamndi mboɗeeri dow leggal nder ladde, bana non boo sey Ɓii-neɗɗo ɓile,

¹⁵ngam haa koo moy nuɗɗini mo heɓa ngeendam nduumiiɗam.

¹⁶Allah yiɗi duniyaaru masin. Ngam maajum o hokki Ɓiɗɗo maako bajjo. Koo moy nuɗɗini Ɓiɗɗo oo, halkataa, ammaa o heɓan ngeendam nduumiiɗam.

¹⁷Allah nelaay Ɓiɗɗo mum nder duniyaaru ngam hiitaago ndu, ammaa ngam haa duniyaaru heɓra kisndam bee maako.

¹⁸Koo moy nuɗɗini Ɓiɗɗo oo, o hiitataake. Ammaa mo nuɗɗinaay mo, o hiitaama, ngam o nuɗɗinaay Ɓiɗɗo Allah bajjo.

¹⁹Ndaa no kiita man wa'i: Annoora wari nder duniyaaru, ammaa yimɓe duniyaaru ɓuri yiɗugo nyiɓre dow annoora, ngam kuuɗe maɓɓe ɗe kalluɗe.

²⁰Ngam koo moy to ɗon waɗa halleende, ɗon wanya annoora, o warataa haa annoora, ngam o hulan taa kuuɗe maako kalluɗe mbaŋga.

²¹Ammaa mo ɗon waɗa gooŋga, waran haa annoora, ngam haa ɗum waŋga no o ɗowtani Allah bee kuuɗe maako, kuuɗe maako kuuwaama bee yerduye Allah.”

²²Ɓaawo man Yeesu yahdi bee pukara'en muuɗum haa lesdi Yahudiya. O faɓɓidi bee maɓɓe ton seɗɗa, o waɗani yimɓe baptisma.

²³Yuhanna boo waɗani yimɓe baptisma haa Aynon, ɓadiiɗum bee Salim, ngam ndiyam ɗuuɗɗam ɗon ton. Yimɓe ɗon njaha haa maako ngam waɗaneego baptisma.

²⁴Saa'i man ɓe nastinaayno Yuhanna haa fursina[7] tawon.

²⁵Ton, ngaaba ummi hakkunde pukara'en Yuhanna e Yahuuduujo dow haala laɓɓineeki.

²⁶Ɓe njehi haa Yuhanna, ɓe mbi'i mo: “Moodibbo, mo wonduno bee maaɗa gaɗa maayo Urdun, mo a seedino ɗum, ndaa o ɗon waɗana yimɓe baptisma, yimɓe fuu ɗon njaha haa maako.”

²⁷Yuhanna jaabi ɓe: “Walaa mo heɓata koo ɗume sonaa to Allah hokki mo ɗum.

²⁸Onon bee ko'e mon on mbaawan seedaago no mi bi'ɗo: Naa min woni Almasiihu, ammaa mi nelaama ngam mi aarta mo.

²⁹Ɓaŋɗo, kaŋko woni marɗo debbo man. Ammaa soobaajo ɓaŋɗo dariiɗo kommbi maako, nananɗo sawtu ɓaŋɗo, seyorto nanugo sawtu ɓaŋɗo masin. Bana non seyo am boo, ngo heewi jonta.

³⁰Sey maŋngu maako ɓesdo, ngu am boo usto.”

³¹Iwɗo diga dow, ɗon dow koo ɗume fuu. Iwɗo haa duniyaaru boo o goɗɗo duniyaaru, o ɗon wolwa haala duniyaaru boo. Iwɗo diga asama ɗon dow koo ɗume fuu.

³²O ɗon seedo ko o yi'i e ko o nani, ammaa walaa jaɓanɗo seedamku maako.

³³Mo jaɓi seedamku maako, gooŋɗini Allah o gooŋgaajo.

³⁴Ngam mo Allah neli ɗon wolwa haala Allah, ngam Allah ɗon hebbina mo bee Ruuhu muuɗum bilaa keerol.

³⁵Baabiraawo yiɗi Ɓiɗɗo, hokki mo baawɗe dow koo ɗume fuu.

³⁶Mo nuɗɗini Ɓiɗɗo, heɓi ngeendam nduumiiɗam. Mo nuɗɗinaay Ɓiɗɗo heɓataa ngeendam, ammaa tikkere Allah ɗon tabiti dow maako.