Read Fulfulde Kuuɗe Nelaaɓe 13 Bible Online

Kuuɗe Nelaaɓe 13 - Fulfulde bible

Kuuɗe Nelaaɓe 13

¹Nder jama'aare nuɗɗinɓe Antakiya woodi annabi'en bee ekkitinooɓe. Ndaa inɗe maɓɓe: Barnabas, Simeyon coometeeɗo Ɓaleejo, Lusiyus mo Sirene, Manahen mo mawnidi bee Hirudus Antipas e Sol.

²Nyannde feere nde ɓe ɗon cujidana Allah, ɓe ɗon cuumo, Ruuhu Ceniiɗo wi'i ɓe: “Cuɓaneeɗam Barnabas e Sol ngam kuugal ngal mi ewnori ɓe.”

³Nden ɓe cuumi, ɓe mbaɗi do'a, ɓe mballini juuɗe dow maɓɓe, ɓe njaɓɓiti ɓe.

⁴Bana nii Ruuhu Ceniiɗo neliri Barnabas e Sol. Ɓe njehi Selewkiya, diga ton ɓe nasti koommbowal[23] dillugo duunde Kiprus.

⁵Nde ɓe njotti Salamis, ɓe ngaazi wolde Allah haa cuuɗi dewal Yahuudu'en. Yuhanna Markus ɗon bee maɓɓe, o balloowo maɓɓe.

⁶Ɓe eeri gaɗa duunde, ɓe njotti Pafos. Ton ɓe tawi hiilaajo bi'eteeɗo Bar-Yeesu, o Yahuuduujo, pewoowo bi'anɗo o annabiijo.

⁷O soobaajo Sergiyus Pol, lawan duunde man. Lawan oo, woodi hakkiilo. O ewni Barnabas e Sol ngam o yiɗi nanugo wolde Allah.

⁸Ammaa Elimas - mo maana innde mum hiilaajo - dartani ɓe. O tefi haɗugo lawan nuɗɗingo.

⁹Ammaa Sol bi'eteeɗo Pol boo, kebbinaaɗo Ruuhu Ceniiɗo, suti hiilaajo go,

¹⁰wi'i: “Ɓii-Iblisa! A kebbinaaɗo faasikaare e halleende, a konneejo adilaaku fuu, tum a ɗon dartano laawol Allah gooŋgawol.

¹¹Jonta Jawmiraawo fiyete: A wuman, a yi'ataa annoora naaŋge haa neeɓa seɗɗa.” Law nyiɓre ukkani mo, o wumi. O yiili o tefi goɗɗo ngam ɗowugo mo.

¹²Nde lawan man laari ko waɗi, o nuɗɗini, ekkitinol dow Jawmiraawo hayɗini mo masin.

¹³Pol e wondiɗɗiraaɓe mum nasti koommbowal haa Pafos, ɓe ndilli haa Perge nder lesdi Pamfiliya. Ammaa Yuhanna Markus acci ɓe, lori Urusaliima.

¹⁴Kamɓe boo ɓe ummi Perge, ɓe ngari Antakiya nder lesdi Pisidiya. Nyannde siwtorde ɓe nasti suudu dewal Yahuudu'en, ɓe njooɗi ton.

¹⁵Ɓaawo jaŋnguki tawreeta Muusa e defte annabi'en, ardiiɓe suudu dewal neli haa Pol e wondiɗɗiraaɓe mum, ɓe mbi'i: “Deerɗiraaɓe, to on ngoodi bolle ngam wasaago yimɓe, mbolwe.”

¹⁶Nden Pol ummi, dari, ɓaŋgti juŋngo mum, wi'i: “Isra'iila'en e yimɓe ummaatooje goɗɗe, hulɓe Allah, nananeeɗam!

¹⁷Allah mo yimɓe Isra'iila, suɓi kaakiraaɓe meeɗen, mawnini ɓe yaake ɓe ɗonno haa lesdi Misra. O wurtini ɓe Misra bee baawɗe muuɗum mawɗe.

¹⁸Duuɓi cappanɗe nayi o munyani ɓe nder ladde.

¹⁹O halki laamuuji joweeɗiɗi haa lesdi Kanaana, o marni yimɓe maako lesdi man.

²⁰Ɗum fuu ɗum waɗi baakin duuɓi teemeɗɗe nayi e cappanɗe jowi. Ɓaawoɗon o hokki ɓe alkaali'en haa yotti zamanu annabi Samuyila.

²¹Nden ɓe tori mo laamiiɗo, Allah hokki ɓe Sol ɓii Kis, goɗɗo lenyol Benyamin, o laamani ɓe duuɓi cappanɗe nayi.

²²Nde Allah ɓorti Sol laamu, o hokki ngu Daawuda, o laamani ɓe. Ndaa ko Allah seedi dow Daawuda, o wi'i: Daawuda ɓii Yessa fottani yam, o waɗan ko ngiɗmi fuu.

²³Haa danygol Daawuda oo, Allah waɗani Isra'iila'en kisnoowo fodde iinawol muuɗum, kaŋko woni Yeesu.

²⁴Diga Yeesu siwaa wargo, Yuhanna waazini Isra'iila'en fuu, ɓe tuuba, ɓe njaɓa baptisma.

²⁵Nde Yuhanna ɓadake timmingo kuugal mum, o wi'i yimɓe: On tammi min woni Almasiihu na? Aa'a, naa ɗum min. Ammaa woodi garanɗo ɓaawo am, mi he'aay fiistango mo paɗe.

²⁶Yaa deerɗiraaɓe am, danygol Ibrahiima e yimɓe woɗɓe hulɓe Allah, haa meeɗen Allah neldi habaru kisndam ɗa'am!

²⁷Ammaa yimɓe Urusaliima bee mawɓe muuɗum'en paamaay kaŋko woni kisnoowo, ɓe paamaay bolle annabi'en ɗe yimɓe njaŋngata nyannde siwtorde fuu. Koo non fuu ɓe ngooŋɗini bolle annabi'en bee hiitaago Yeesu.

²⁸Koo nde ɓe tawaay daliila hiitaago mo kiita mbareego, ɓe tori Pilaatu o mbara mo.

²⁹Nde ɓe timmini waɗugo mo ko defte Allah mbi'no dow maako fuu, ɓe njippini mo diga leggal, nden ɓe mballini mo nder yenaande.

³⁰Ammaa Allah ummitini mo diga maayde.

³¹Balɗe ɗuuɗɗe o waŋgani yahdunooɓe bee maako diga Galiili haa Urusaliima. Jonta kamɓe ngoni seedooɓe maako haa Isra'iila'en.

³²Minin min ɗon ngaazina on Linjiila: Ko Allah iinanino kaakiraaɓe meeɗen,

³³o hebbitinani en ɗum fuu, enen ɓiɓɓe maɓɓe, nde o ummitini Yeesu, bana ko winnda haa Yimre Jabuura ɗiɗawre: An woni Ɓiɗɗo am, hannde mi danyi ma.

³⁴Allah ummitini mo diga maayde, ngam taa o meeɗa nyolugo, bana o wi'no: Mi barkiɗinte bee barkaaji am ceniiɗi e koolniiɗi, bana mi wi'no Daawuda.

³⁵Fahin bana o wi'i nder aayaaje goɗɗe: A accataa Ceniiɗo ma nyola.

³⁶Nde Daawuda huuwi nder zamanu muuɗum bana Jawmiraawo umrino, o maayi, ɓe uwi mo kommbi kaakiraaɓe maako, o nyoli.

³⁷Ammaa mo Allah ummitini diga maayde, nyolataa.

³⁸Sey anndon deerɗiraaɓe, barka maako yaafuye hakkeeji waazinaama on. Koo nde Tawreeta Muusa waawataa adilingo on,

³⁹kaŋko o adilinan koo moy nuɗɗini mo.

⁴⁰Kadi, kakkile, taa ko annabi'en mbi'no heɓa on:

⁴¹Ndaare, onon mawnitiiɓe! Kayɗine, kalke! Ngam kuugal ngal mbaɗanmi nder balɗe mooɗon, ɗum kuugal ngal on njaɓataa nuɗɗingo, koo to goɗɗo yecci on habaru maajum!”

⁴²Nde Pol bee Barnabas ɗon ngurto suudu dewal Yahuudu'en, yimɓe tori ɓe, ɓe loro nyannde siwtorde warannde boo, ngam haa ɓe lorna bolle ɗe'e.

⁴³Nde yimɓe caŋkiti, Yahuudu'en ɗuuɗɓe e jananɓe, hulɓe Allah, tokkiiɓe diina Yahuudu'en ɗuuɗɓe tokki Pol e Barnabas. Ɓe mbolwani ɓe, cuusɗini ɓe ngam haa ɓe tabita nder mo'ere Allah.

⁴⁴Nde nyannde siwtorde waɗi fahin, ɓurna yimɓe wuro ngari nanugo wolde Allah.

⁴⁵Nde Yahuudu'en ngi'i yimɓe ɗuuɗi, ɓe kaaji masin. Ɓe ngeddi wolde Pol, ɓe kuɗi mo.

⁴⁶Ammaa Pol e Barnabas mbolwi bee dartaare, ɓe mbi'i: “Doole min aarta wolwango on wolde Allah. Ammaa nde nii on cali jaɓugo ɗum, on kiiti ko'e mon on ke'aay heɓugo ngeendam nduumiiɗam, min accan on, min njahan haa ummaatooje goɗɗe!

⁴⁷Ngam kanjum woni umroore nde Jawmiraawo umri min, wi'i: Mi waɗi ma a annoora ngam ummaatooje, a yahra kisndam haa keeri duniyaaru.”

⁴⁸Nde yimɓe ummaatooje nani ɗum, ɓe ceyi, ɓe maŋgti wolde Jawmiraawo. Taaskitinaaɓe diga ɓooyma ngam ngeendam nduumiiɗam fuu nuɗɗini.

⁴⁹Wolde Allah saŋkiti koo toy haa lesdi man.

⁵⁰Ammaa Yahuudu'en ummini ɓerɗe mawɓe wuro e tedda-asli'en, rewɓe hulɓe Allah. Ɓe ummini fitina dow Pol e Barnabas, ɓe ngurtini ɓe lesdi maɓɓe.

⁵¹Ɓe piɗɗi collaaje kosɗe maɓɓe[24] dow yimɓe ɓe'e. Nden ɓe ndilli Ikoniya.

⁵²Ammaa pukara'en[25] keewi seyo e Ruuhu Ceniiɗo.