Read Fulfulde Kuuɗe Nelaaɓe 18 Bible Online

Kuuɗe Nelaaɓe 18 - Fulfulde bible

Kuuɗe Nelaaɓe 18

¹Ɓaawo man Pol ummi Ateena, yehi Korintu.

²Ton o tawi Yahuuduujo bi'eteeɗo Akilas, iwɗo Pontus. Ɗum neeɓaay o wari diga Italiya bee debbo maako Piriskilla, ngam laamiiɗo Roma bi'eteeɗo Kalawdiyus umri, riiwi Yahuudu'en fuu diga Roma. Pol yehi haa maɓɓe,

³o jooɗodi bee maɓɓe, ɓe kuuwdi ngam sanaa'a maɓɓe ngoota: Ɓe nyootooɓe laymaaji.

⁴Nyannde siwtorde fuu, o ɗon hujjotira bee Yahuudu'en e Yunaniŋke'en haa suudu dewal Yahuudu'en ngam haa ɓe nuɗɗina.

⁵Nde Silas e Timote ngari diga Makedoniya, Pol suklani waazu tan. O seedi yeeso Yahuudu'en Yeesu woni Almasiihu.

⁶Ammaa ɓe ndartani mo, ɓe kuɗi mo. Pol fiɗɗi collaaje limce maako yeeso maɓɓe, wi'i: “To on kalki, annde ƴiiƴam mon ɗon dow ko'e mon, min kam mi laaɓɗo. Diga jonta mi yahan haa ummaatooje goɗɗe.”

⁷Nden o acci ɓe, o nasti haa saare goɗɗo bi'eteeɗo Titus Yustus, kulɗo Allah. Saare maako ɗon kommbi suudu dewal.

⁸Kirispus, ardiiɗo suudu dewal man, nuɗɗini Jawmiraawo bee saare muuɗum fuu. Korintu'en ɗuuɗɓe boo nani waazu, ɓe nuɗɗini, ɓe njaɓi baptisma.

⁹Jemmaare feere Jawmiraawo wi'i Pol nder wahayu: “Taa hul, ammaa wolwu, taa jeeɗa

¹⁰ngam mi ɗon wondi bee ma. Walaa mo meemete, ngam mi woodi yimɓe ɗuuɗɓe nder berniwol ngo'ol.”

¹¹Pol jooɗi ton nduuɓu bee reeta, o ɗon ekkitina yimɓe wolde Allah.

¹²Yaake Galliyon laati ngomna lesdi Akaya, Yahuudu'en kawti, naŋngi Pol, njahri mo haa nokkuure kiita.

¹³Ɓe mbi'i: “Goɗɗo oo, o ɗon esta yimɓe haa ɓe ndewa Allah bee laawol ngol tokkaaki tawreeta amin!”

¹⁴Pol yiɗi wolwugo, ammaa Galliyon wi'i Yahuudu'en: “To ɗum aybewol feereno malla halleende woɗnde o waɗi, mi jaɓanno wullaandu mon.

¹⁵Ammaa ɗum ngaaba dow bolle, dow inɗe e dow umrooje diina mooɗon, sey onon bee ko'e mooɗon on kiito ɗum. Min mi hiitataako irin man!”

¹⁶Nden o riiwi ɓe diga nokkuure kiita.

¹⁷Ɓe fuu ɓe naŋngi Sostenes ardiiɗo suudu dewal, ɓe piyi mo yeeso yimɓe haa nokkuure kiita. Ammaa ɗum ɓillaay Galliyon sam.

¹⁸Ɓaawoɗon boo Pol faɓɓi balɗe ɗuuɗɗe bee deerɗiraaɓe haa Korintu, nden o jaɓɓiti ɓe. O nasti koommbowal[35] bee Piriskilla e Akilas, ɓe ndilli Siriya. Ammaa hiddeko ɓe nasta koommbowal, o laɓi hoore maako haa Keŋkereya ngam o waɗino togayeere.

¹⁹Nde ɓe njotti berniwol Efesus, Pol jaɓɓiti Piriskilla e Akilas. Nden o yehi haa suudu dewal Yahuudu'en, o hujjotiri bee Yahuudu'en.

²⁰Ɓe tori mo o faɓɓa haa maɓɓe, ammaa o sali.

²¹Nde o ɗon jaɓɓito ɓe, o yecci ɓe: “To Allah munyi, mi loroto haa mooɗon.” Nden o nasti koommbowal, o dilli.

²²Nde o yotti Kaysariya, o yehi Urusaliima ngam hoofnugo jama'aare nuɗɗinɓe. Nden o dilli Antakiya.

²³Nde o faɓɓi ton seɗɗa, o dilli. O waanci nder lesɗe Galaatiya e Firigiya, o semmbiɗini nuɗɗinɓe fuu.

²⁴Apollos, goɗɗo Yahuuduujo, iwɗo Aleksandiriya, wari haa Efesus. O baawɗo wolde, o annduɗo defte Allah.

²⁵O anndi haala Laawol Jawmiraawo booɗɗum, o pertiiɗo, o ekkitini haala Yeesu bee laaɓɗum. Ammaa sey baptisma Yuhanna tan o anndi.

²⁶O fuɗɗi waazugo bilaa kulol haa suudu dewal Yahuudu'en. Nde Piriskilla bee Akilas nani mo, njahri mo haa maɓɓe, ɓe tinndini mo Laawol Jawmiraawo bee ko ɓuri laaɓugo.

²⁷Nden Apollos waɗi anniya yahugo lesdi Akaya. Nuɗɗinɓe cuusɗini mo, mbinndani deerɗiraaɓe maɓɓe wonɓe haa ton bataakewol haa ɓe njaɓɓo mo. Nde o yotti ton, o nafi nuɗɗinɓe jaɓɓe mo'ere Allah jamum.

²⁸O waŋgini laaɓɗum boofi ekkitinol Yahuudu'en yeeso yimɓe fuu. O holli ɓe haa Deftere Allah fakat Yeesu woni Almasiihu.