Read Fulfulde Kuuɗe Nelaaɓe 19 Bible Online

Kuuɗe Nelaaɓe 19 - Fulfulde bible

Kuuɗe Nelaaɓe 19

¹Yaake Apollos ɗonno haa Korintu, Pol tokki laawol kooseeje haa o yotti Efesus. Ton o tawi nuɗɗinɓe woɗɓe,

²o ƴami ɓe: “On keɓi Ruuhu Ceniiɗo nyalde on nuɗɗini na?” Ɓe njaabi: “Min meeɗaay nanugo haala Ruuhu Ceniiɗo.”

³Pol ƴami: “Kadi baptisma kaye on njaɓi?” Ɓe njaabi: “Min njaɓi baptisma Yuhanna.”

⁴Pol wi'i: “Yuhanna waɗani yimɓe baptisma ngam ɓe ngaylito, ɓe tuuba. Yuhanna wi'i ɓe boo ɓe nuɗɗina goɗɗo tammiiɗo wargo ɓaawo maako, waato Yeesu.”

⁵Nde ɓe nani ɗum, ɓe njaɓi baptisma bee innde Jawmiraawo Yeesu.

⁶Pol wallini juuɗe muuɗum dow ko'e maɓɓe, Ruuhu Ceniiɗo jippi dow maɓɓe, ɓe mbolwi ɗemɗe goɗɗe, ɓe mbaɗi annabaaku.

⁷Limgal yimɓe man fuu waɗi baakin sappo e ɗiɗo.

⁸Lebbi tati Pol ɗon tokki yahugo suudu dewal Yahuudu'en, o ɗon wolwana yimɓe bee dartaare, o ɗon hujjotira bee maɓɓe, o ɗon haɓda faamtingo ɓe haala laamu Allah haa ɓe njaɓa ka.

⁹Ammaa woɗɓe maɓɓe caatini ko'e muuɗum'en, ɓe cali jaɓugo ka, ɓe mbolwi kalluka dow Laawol Jawmiraawo yeeso mooɓre. Ngam maajum Pol daayi ɓe, hawtani nuɗɗinɓe. Nyalɗe fuu o hujjotiri bee maɓɓe haa pellel jaŋngirde Tirannus.

¹⁰O waɗi ɗum duuɓi ɗiɗi, haa Yahuudu'en e yimɓe ummaatooje goɗɗe wonɓe lesdi Asiya fuu nani wolde Jawmiraawo.

¹¹Allah waɗi kaayeefiiji kayɗiniiɗi bee juŋngo Pol.

¹²Ɓe njahrani nyawɓe leppi e limce meemɗe ɓanndu Pol, nyawuji maɓɓe timmi, ruuhuuji kalluɗi boo ngurti.

¹³Yahuudu'en woɗɓe yiilotooɓe ngam wurtingo ruuhuuji kalluɗi, ɗaɓɓi kamɓe boo wurtingo ɗi bee innde Yeesu. Ɓe mbi'i: “Min umri on ngurta bee innde Yeesu, mo Pol waazata!”

¹⁴Ɓiɓɓe hooreejo liman'en bi'eteeɗo Sikewas mbaɗata ɗum. Ɓe njoweeɗiɗo.

¹⁵Ammaa ruuhuwol kalluŋgol jaabi ɓe: “Mi anndi Yeesu, Pol boo mi anndi ɗum, ammaa onon on ɓeye?”

¹⁶Mo ruuhuwol kalluŋgol ɗon nder muuɗum go hippi ɓe, ɓurdi ɓe semmbe, jaali ɓe fuu. Ɓe ngurti suudu man, ɓe ndoggi ɓe temmbuɓe e naawnaaɓe.

¹⁷Yahuudu'en e yimɓe ummaatooje goɗɗe jooɗiiɓe haa Efesus fuu nani ɗum, ɓerɗe maɓɓe ta'i, nden ɓe teddini innde Jawmiraawo Yeesu.

¹⁸Ɗuuɗɓe caka nuɗɗinɓe ngari, mbaŋgini kuuɗe hiila ɗe ɓe kuuwino yeeso yimɓe fuu.

¹⁹Waɗooɓe hiila ɗuuɗɓe ngaddi defte maɓɓe, nguli ɗe haa yeeso yimɓe fuu. Ɓe mbaɗi lisaafi coggu defte man, ɗum waɗi ceede cardi ujine cappanɗe jowi (50.000).

²⁰Bana nii wolde Jawmiraawo tokki saŋkitaago, baawɗe maare ɓesdi yeeso yeeso.

²¹Ɓaawo haala ka'a, Pol waɗi anniya saalaago gal Makedoniya e Akaya ngam yahugo Urusaliima. O wi'i: “To mi yehi ton, mi yahan Roma boo.”

²²O neli wallooɓe maako ɗiɗo Timote e Erastus haa Makedoniya, ammaa kaŋko o faɓɓi haa lesdi Asiya seɗɗa.

²³Yaake man fitina makka ummi haa Efesus dow Laawol Jawmiraawo.

²⁴Demetiriyus, tappoowo cardi, ɗonno waɗa irin cuuron nanndukon bee suudu lawru wi'eteendu Artemis. O heɓani waɗooɓe sanaa'a keɓal ɗuuɗŋgal.

²⁵O ewni ɓe fuu, kamɓe e tappooɓe cardi woɗɓe. O wi'i ɓe: “Onon worɓe, on anndi risku men fuu iwi diga kuugal meeɗen nga'al.

²⁶Onon bee ko'e mon on ɗon ngi'a, on ɗon nana ko Pol oo waɗata. O ɗon wi'a ɗowanteeɓe ɓe yimɓe mbaɗata laataaki ɗowanteeɓe sam, haa ɗuuɗɓe nder Efesus ɗo e ɓurna lesdi Asiya fuu njaɓi ɗum, tokki laawol maako.

²⁷To ɗum tokki bana nii, naa sanaa'a meeɗen tan yimɓe kallinta, ammaa ɓe lasbinan suudu Artemis, ɗowanteeɗo meeɗen mawɗo, ɓe accan boo samɗingo ɗowanteeɗo meeɗen mo yimɓe lesdi Asiya e duniyaaru fuu ndewata!”

²⁸Nde yimɓe nani bolle ɗe'e, ɓe ɓerni masin, ɓe puɗɗi hoolugo, ɓe mbi'i: “Artemis mo Efesus, o mawɗo! Artemis mo Efesus, o mawɗo!”

²⁹Haala ka'a nastini berniwol nder jiiɓotiral maŋngal. Ɓe naŋngi wondiɗɗiraaɓe Pol ɗiɗo, Gayus e Aristarkus iwɓe Makedoniya, law ɓe fuu ɓe njahri ɓe haa babal fijirde.

³⁰Pol boo yiɗino yahugo haa mooɓre man, ammaa nuɗɗinɓe kaɗi mo.

³¹Mawɓe lesdi Asiya, laatiiɓe soobiraaɓe maako, neli haa maako, tori mo taa o yaha haa babal fijirde.

³²Jiiɓotiral ummi caka mooɓtorde. Koo moy ɗon wooka, ɗon wolwa ko o yiɗi, ngam ɓurna yimɓe anndaa daliila kaye hawti ɓe.

³³Yahuudu'en njahri Aleksandire yeeso. Woɗɓe maɓɓe maatini mo. Nden o ɓaŋgti juŋngo ngam waŋgingo hujja maako yeeso mooɓre.

³⁴Ammaa nde ɓe annditi o Yahuuduujo, ɓe tokki hoolugo hawtaade dow haala ngoota baakin saa'iiji ɗiɗi: “Artemis mo Efesus, o mawɗo! Artemis mo Efesus, o mawɗo!”

³⁵Bee daker binndoowo mawɗo mo berniwol de'itini mooɓre, o wi'i: “Yaa Efesu'en! Koo moy anndi berniwol Efesus ɗon ayna suudu Artemis mawɗo e suura maaru do'iindu diga asama.

³⁶Walaa baawanɗo yeddugo ɗum. Ngam maajum sey on nde'ita, taa njaawane koo ɗume.

³⁷Yimɓe ɓe on ngaddi haa ɗo ngujjaay kuuje suudu seniindu, ɓe mbolwaay boo kalluka dow ɗowanteeɗo men.

³⁸To Demetiriyus e waɗooɓe sanaa'a wonduɓe bee muuɗum ngoodi wullaandu dow goɗɗo, ndikka ɓe njaha nokkuure kiita, yeeso hiitooɓe, ɓe ngullotira.

³⁹Ammaa to woodi ko on tefata feere, mooɓtorde dagiinde laaran haala man,

⁴⁰ngam ɓe poti aybingo en dow ko waɗi hannde bee wi'go en mbaɗi tuurtol, ngam en ngalaa daliila mooɓtugo bana nii. Nde o timmini wolwango ɓe, o saŋkiti ɓe.”