Read Fulfulde Kuuɗe Nelaaɓe 20 Bible Online

Kuuɗe Nelaaɓe 20 - Fulfulde bible

Kuuɗe Nelaaɓe 20

¹Nde fitina man de'iti, Pol mooɓti nuɗɗinɓe, semmbiɗini ɓe. Nden o jaɓɓiti ɓe, o dilli Makedoniya.

²O yiili lesdi man, o semmbiɗini yimɓe bee bolle ɗuuɗɗe. Nde o yotti Akaya,

³o jooɗi ton lebbi tati. Yaake o ɗonno taasko nastugo koommbowal yahugo Siriya, o nani Yahuudu'en kaɓɓi dabare dow maako. Ngam maajum o tokkori Makedoniya fahin.

⁴Sopater ɓii Pirrus mo Bereya, yahdi bee maako. Aristarkus e Sekundus, yimɓe Tessaloniiki e Gayus mo Derbe e Timote, non boo Tikikus e Torofimus yimɓe lesdi Asiya, ɓe fuu ɓe njahdi bee maako.

⁵Ɓe ardi min, ɓe njehi haa Torowas, ɓe ndeeni min ton.

⁶Min nasti koommbowal[36] haa Filippi ɓaawo juulde tamseeje ɗe ufnaaka. Ɓaawo balɗe jowi min njokki ɓe haa Torowas. Min mbaɗi asaweere haa ton.

⁷Nyannde Alat min kawti ngam nyaamugo kiirtaari Jawmiraawo[37]. Pol ɗon wolwana yimɓe, o tokki wolwugo haa caka jemma, ngam o dillanno jaŋngo man.

⁸Woodino pittirlaaji ɗuuɗɗi haa suudu dowru haa min mooɓti.

⁹Derkeejo bi'eteeɗo Ewtikus ɗonno jooɗi haa wurdere suudu, ɗoyŋgol tedduŋgol hoo'i mo yaake Pol ɗon tokkitina waazu. Nde o ɗon ɗaani, o do'i haa lesdi diga suudu dowru tataɓru. Ɓe tawi mo, o maayi.

¹⁰Nde Pol jippi, o hippi dow maako, harli mo, wi'i: “Taa cakle, o maayaay!”

¹¹Nden o lori haa suudu dowru, o yewi tamseeje, o nyaamdi bee maɓɓe. O wolidi bee maɓɓe haa baɓɓol, nden o dilli.

¹²Ɓe kootidi bee derkeejo go, o geeto. Ɗum de'itini ɓe masin.

¹³Min aarti Pol nastugo koommbowal, min ndilli haa Assos. O wi'no min min ardo, ngam o yiɗi yahugo bee kosɗe. Haa ton o tammi nastugo koommbowal man.

¹⁴Nde o jokki min haa Assos, min nastini mo koommbowal amin, min ndilli Mitilene.

¹⁵Min ummi ton bee koommbowal, jaŋngo man min tiitotiri bee Kiyos. Faɓɓijaŋngo man min njotti Samos, faɓɓitijaŋngo man boo min njotti Miletus.

¹⁶Pol waɗi anniya saalaago Efesus bilaa jippaago, ngam o yiɗaa neeɓugo haa lesdi Asiya. O ɗon yaawana yottaago Urusaliima hiddeko juulde Pantekosta waɗa, to heɓoto.

¹⁷Diga Miletus Pol neli haa ndotti'en jama'aare nuɗɗinɓe Efesus ngam haa ɓe ngara haa maako.

¹⁸Nde ɓe njotti, o wi'i ɓe: “Onon anndi no mi jooɗori bee mooɗon, diga nyannde mi wari haa lesdi Asiya.

¹⁹Mi huuwani Jawmiraawo bee yaŋkinaare timmunde, bee bojji, nder boneeji keɓɗi yam ngam Yahuudu'en annini halleende dow am.

²⁰On anndi, nder waazu am mi suuɗaay on koo ɗume ko nafata on fuu. Mi ekkitini on yeeso yimɓe fuu e haa ci'e[38] mon boo.

²¹Foroy mi wolwani Yahuudu'en e yimɓe ummaatooje goɗɗe fuu haa ɓe tuuba, ɓe nuɗɗina Jawmiraawo meeɗen Yeesu.

²²Kadi jonta mi ɗon dilla Urusaliima ngam Ruuhu Ceniiɗo ɗon yerɓammi[39], mi anndaa ko waɗatammi haa ton.

²³Huunde woore anndumi: Ruuhu Ceniiɗo ɗon hollammi haa gure ɗe mi yaalata fuu callalluuji e boneeji ɗon ndeenammi.

²⁴Ammaa mi laaraay yoŋki am bana huunde marnde saman, ko ngiɗmi kam, mi timmitina daɗa-daɗa am e kuugal ngal Jawmiraawo Yeesu halfini yam, waato seedaago Linjiila ka mo'ere Allah.

²⁵Mi yiili caka mooɗon fuu, mi waazi habaru laamu Allah. Jonta min, mi anndi on meetataa yi'ugo yam fahin.

²⁶Ngam maajum, mi seedi on hannde: To goɗɗo mooɗon halki, naa ɗum aybe am,

²⁷ngam mi waazi on muuyo Allah fuu, mi suuɗaay on koo ɗume.

²⁸Ayne ko'e mooɗon! Ayne tokkere nde Ruuhu Ceniiɗo halfini on! Bana waynaaɓe, ayne jama'aare nuɗɗinɓe Allah, nde o heɓri bee ƴiiƴam Ɓiɗɗo maako ndufaaɗam.

²⁹Ngam mi anndi to mi dilli, caafaali kaaŋaaɗi nastan caka mooɗon, ɗi accataa tokkere.

³⁰Woɗɓe caka mooɗon boo ummoto, kuuwtiniran pewe ngam haa nuɗɗinɓe tokko ɓe.

³¹Ngam maajum ayne! Ciftore no duuɓi tati, jemma bee naaŋge fuu, mi accaay barraago koo moy mooɗon bee gonɗi.

³²Jonta mi halfini on haa juŋngo Allah e haa habaru mo'ere maako. O waawan mawningo on nder nuɗɗinki e tabitingo ndonŋgu mooɗon, ngu o sigani senaaɓe maako fuu.

³³Mi suunaay cardi malla kaŋŋeeri malla limce goɗɗo.

³⁴Onon bee ko'e mooɗon on anndi juuɗe am ɗe'e kumti haaje am e haaje wondiɗɗiraaɓe am.

³⁵Nder ko mbaɗmi fuu mi holli on sey en kuuwa, en mballa tampuɓe. En ciftora boo ko Jawmiraawo Yeesu wi'i bee hoore mum: Barka dokkuɗo ɓuran ka dokkaaɗo.”

³⁶Nde Pol timmini wolwugo, fuu maɓɓe ɓe tuggi koppi, o waɗi do'a.

³⁷Ɓe fuu ɓe mboyi, ɓe karli mo, ɓe kebbi mo.

³⁸Ɓe cuni masin sakkomaa nde ɓe nani o wi'i ɓe meetataa yi'ugo mo fahin. Nden ɓe ɗofti mo haa koommbowal[40].