Read Fulfulde Kuuɗe Nelaaɓe 21 Bible Online

Kuuɗe Nelaaɓe 21 - Fulfulde bible

Kuuɗe Nelaaɓe 21

¹Nde min njaɓɓiti ɓe, min nasti koommbowal, min njehi cir haa Kos. Jaŋngo man min njotti Rodos. Diga ton min njehi Patara.

²Ton min tawi koommbowal yahugo Finikiya. Min nasti, min ndilli.

³Min mbakki Kiprus, min ɗon ngi'a ɗum, ammaa min caalori fombina man, min njehi Siriya. Min njippi haa Tirus, ngam haa ɓe njippina kuuje.

⁴Min tawi nuɗɗinɓe ton, min njooɗi bee maɓɓe asaweere woore. Bee baawɗe Ruuhu Ceniiɗo ɓe ngecci Pol taa o yaha Urusaliima.

⁵Ammaa nde asaweere man timmi, min ummi, min ndilli. Kamɓe e rewɓe maɓɓe e ɓikkoy fuu, ɓe ɗofti min haa yaasi berniwol. Min tuggi koppi haa fomoonde mbeela, min mbaɗi do'a.

⁶Nden min njaɓɓotiri, min nasti koommbowal, kamɓe boo ɓe kooti.

⁷Nde min ummi Tirus, min njehi Potolemayis. Min koofni deerɗiraaɓe wonɓe ton, nden min nyallidi bee maɓɓe.

⁸Jaŋngo man min ndilli, min njotti Kaysariya. Ton min njehi saare Filip gaazoowo, min njippi haa maako. O gooto nder suɓaaɓe njoweeɗiɗo haa Urusaliima.

⁹O woodi ɓiɓɓe rewɓe nayo ɓe te'aaka, ɓe ɗon mbaɗa annabaaku.

¹⁰Nde min paɓɓi haa ton balɗe seɗɗa, annabiijo bi'eteeɗo Agabus iwi Yahudiya,

¹¹wari haa amin. O hoo'i taadorgol Pol, o haɓɓi kosɗe maako e juuɗe maako bee maagol, o wi'i: “Ndaa ko Ruuhu Ceniiɗo wi'i: Yahuudu'en haa Urusaliima kaɓɓan marɗo taadorgol ngo'ol bana nii, ɓe ndokkan mo haa juuɗe yimɓe ummaatooje goɗɗe.”

¹²Nde min nani ɗum, minin bee yimɓe ton fuu, min tori Pol, taa o yaha Urusaliima.

¹³Ammaa Pol jaabi: “Koni on mboyata? On ngiɗi sunugo yam na? Min kam, naa haɓɓeego haa Urusaliima tan, ammaa mi ɗon taaskani maayugo maa, ngam daliila Jawmiraawo Yeesu.”

¹⁴Min mbaawaay faasitingo anniya maako. Nden min acci mo, min mbi'i: “Muuyo Jawmiraawo laato.”

¹⁵Ɓaawo man, min taaski, min ndilli Urusaliima.

¹⁶Nuɗɗinɓe Kaysariya woɗɓe njahdi bee amin. Ɓe njahri min haa min mbeerata haa saare Manason iwɗo Kiprus, nuɗɗinɗo diga ɓooyma.

¹⁷Nde min njotti Urusaliima, deerɗiraaɓe njaɓɓi min bee seyo.

¹⁸Jaŋngo man Pol yahdi bee amin haa Yaakuba. Ndotti'en jama'aare nuɗɗinɓe fuu boo ngari ton.

¹⁹Pol hoofni ɓe, yecci ɓe koo ɗume ko Allah waɗi bee kuugal maako caka ummaatooje goɗɗe.

²⁰Nde ɓe nani ɗum, ɓe maŋgti Allah. Nden ɓe mbi'i Pol: “Deerɗiraawo, a yi'i no Yahuudu'en ujine ɗuuɗɗe nuɗɗini, ammaa ɓe fuu ɓe ɗon tiini tokkaago tawreeta.

²¹Ɓe nani a ɗon ekkitina Yahuudu'en jooɗiiɓe lesɗe ummaatooje goɗɗe fuu ɓe acca tawreeta Muusa, ɓe acca boo juulnugo[41] ɓikkoy maɓɓe e tokkaago al'aada Yahuudu'en.

²²Noy mbaɗeten? Ngam fakat ɓe nanan a wari.

²³Ngam maajum waɗ ko min mbi'ete. Woodi yimɓe nayo haa ɗo, waɗɓe togayeere.

²⁴Yahdu bee maɓɓe, sen hoore ma bee maɓɓe fodde al'aada cenki. Yoɓ ceede haa ɓe laɓa ko'e maɓɓe. To a waɗi ɗum, yimɓe fuu paaman ko ɓe nani dow ma fuu, naa ɗum gooŋga, ammaa an bee hoore ma a ɗon tokko tawreeta Muusa.

²⁵Ammaa min neldi bataakewol haa yimɓe ummaatooje laatiiɓe nuɗɗinɓe, min ndawri, min mbi'i ɓe ɓe ndeenta e kusel kirsanaaŋgel labbi e ƴiiƴam e ko hirsaaka e daakaareeku[42].”

²⁶Ngam maajum Pol yahdi bee yimɓe nayo go. Jaŋngo man o hawti bee maɓɓe waɗugo al'aada cenki. Nden o nasti haykaliiru, o anndini nyannde nde cenki man timmata, waato nyannde nde ɓe lii'oto kirseteeɗi ngam koo moy maɓɓe baɗɗo togayeere go.

²⁷Nde balɗe joweeɗiɗi ɓadake timmugo, Yahuudu'en warɓe diga lesdi Asiya ngi'i Pol haa haykaliiru. Ɓe ummini ɓerɗe mooɓre fuu, ɓe naŋngi mo.

²⁸Ɓe kooli, ɓe mbi'i: “Isra'iila'en, mballe min! Ndaa gorko oo, o ɗon hallina jama'aare Isra'iila e tawreeta Muusa e haykaliiru fuu, o ɗon anndina ɗum koo moy e koo toy. Fahin boo o nastini heefeerɓe woɗɓe nder haykaliiru, o soɓni nokkuure seniinde nde'e!”

²⁹Ɓe mbi'i ɗum ngam ɓe ngi'i Torofimus mo Efesus, bee Pol nder berniwol, ɓe tammino Pol nastini mo nder haykaliiru.

³⁰Haala ka'a saŋkiti nder berniwol fuu haa yimɓe maagol fuu mooɓti. Ɓe naŋngi Pol, ɓe ndasi mo yaasi haykaliiru. Nden law ɓe maɓɓi dammuɗe maaru.

³¹Mooɓre yiɗi mbarugo Pol, ammaa habaru man yotti ardiiɗo dow sooje'en Roma ujineere, ɓe mbi'i mo: “Berniwol Urusaliima fuu ɗon nder fitina.”

³²Law o hoo'i sooje'en bee ardiiɓe dow sooje'en teemerre, ɓe ndoggi, ɓe njehi haa mooɓre. Nde yimɓe ngi'i ardiiɗo dow sooje'en ujineere e sooje'en ngari, ɓe acci fiyugo Pol.

³³Nden ardiiɗo dow sooje'en ujineere go ɓaditi Pol, naŋngi mo, umri ɓe kaɓɓa mo bee callalluuji ɗiɗi. Nden o ƴami: “Ɗum moye? Ɗume o waɗi?”

³⁴Koo moy ɗon wolwa ko o yiɗi bee sawtu. Daliila haraka, ardiiɗo oo heɓaay jaawaabu laaɓŋgu, nden o umri ɓe njahra Pol haa saŋngeere sooje'en.

³⁵Nde ɓe njotti haa ba'orɗe, sooje'en efti mo ngam fitina mooɓre saati masin,

³⁶ngam yimɓe fuu ɗon tokki mo, ɓe ɗon koola: “Mbare mo! Mbare mo!”

³⁷Nde sooje'en ɓadi nastingo mo nder saŋngeere muuɗum'en, Pol wi'i ardiiɗo dow sooje'en ujineere: “Mi foti wolwango ma na?” Ardiiɗo man ƴami: “A anndi Yunaniŋkeere[43] na?

³⁸Asee! Naa an woni Misraajo tuurtuɗo, jahruɗo tuurtooɓe ujine nayo, mbarooɓe ko'e haa ladde nyalɗe ɗe'e na?”

³⁹Pol jaabi: “Min mi Yahuuduujo, danyaaɗo haa Tarsus nder Silikiya, mi ɓii berniwol maŋngol. Mi tori ma, duŋanam wolwango mooɓre.”

⁴⁰O duŋani mo. Nden Pol wa'i ba'orɗe, ɓaŋgti juuɗe mum ngam haa yimɓe njeeɗo. Nde ɓe njeeɗi siriw, o wolwani ɓe bee Ibraniŋkeere, o wi'i: