Read Fulfulde Kuuɗe Nelaaɓe 25 Bible Online

Kuuɗe Nelaaɓe 25 - Fulfulde bible

Kuuɗe Nelaaɓe 25

¹Balɗe tati ɓaawo yottaago Festus haa lesdi man, o ummi Kaysariya, o yehi Urusaliima.

²Ton mawɓe liman'en e mawɓe Yahuudu'en ngulliti Pol haa maako. Ɓe tori mo,

³to o yerdake, o wadda Pol haa Urusaliima, ngam haa ɓe mbaaltano mo dow laawol, ɓe mbara mo.

⁴Festus jaabi: “Ɓe ɗon njogi Pol haa Kaysariya, min boo mi loroto ton law.

⁵Sey mawɓe mooɗon njahda bee am haa Kaysariya, ɓe ngullo mo haa ton, to woodi ko o waɗi.”

⁶Festus faɓɓidi bee maɓɓe haa Urusaliima ton balɗe joweetati malla sappo, nden o lori Kaysariya. Jaŋngo man o jooɗi nokkuure kiita, o umri ɓe ngadda Pol.

⁷Nde Pol yotti, Yahuudu'en warɓe diga Urusaliima taari mo, ɓe kaadi mo kaadooje ɗuuɗɗe caatuɗe, ammaa ɓe keɓaay gooŋɗingo ɗe.

⁸Ammaa Pol wolwi hujja muuɗum, wi'i: “Mi waɗaay aybe koo haa tawreeta Yahuudu'en malla haa haykaliiru, malla haa laamiiɗo Roma.”

⁹Nde Festus yiɗi fottango Yahuudu'en, o ƴami Pol: “A jaɓan yahugo Urusaliima haa mi hiito ma ton dow kaadooje ɗe'e na?”

¹⁰Pol wi'i: “Mi ɗon dari haa nokkuure kiita laamiiɗo Roma. Haani mi hiite haa ɗo. Mi waɗaay Yahuudu'en aybe, an boo a anndi ɗum booɗɗum.

¹¹To woodi halleende nde mbaɗmi e to mi waɗi koo ɗume ko he'i do'ugo yam kiita maayde, mi toraaki yoofeego. Ammaa to woodaa gooŋga haa kaadooje maɓɓe dow am, woodaa baawanɗo hokkugo yam haa maɓɓe. Mi yiɗi laamiiɗo Roma waɗanammi kiita.”

¹²Festus dawri bee yimɓe faada maako, nden o wi'i: “Nde nii a yiɗi yahreego haa laamiiɗo Roma, a yahan haa maako man.”

¹³Ɓaawo balɗe seɗɗa, laamiiɗo Agarippa e Bernike ngari haa Kaysariya ngam hoofnugo Festus.

¹⁴Nde ɓe paɓɓi ton balɗe seɗɗa, Festus yeewti laamiiɗo haala Pol, o wi'i: “Woodi naŋngaaɗo haa ɗo diga zamanu Felikus.

¹⁵Nde mi yehi Urusaliima, mawɓe liman'en e ndotti'en Yahuudu'en ngulli mo, ɓe tori yam mi hiito mo kiita mbareego.

¹⁶Ammaa mi yecci ɓe, haa kiita Roma'en kam, sey gullaaɗo hujjotira bee wulliiɓe mo, haa o jaabano hoore maako dow wullaandu man.

¹⁷Nde ɓe fuu ɓe ngari haa ɗo, mi reenaay fahin sam. Jaŋngo man mi jooɗi haa nokkuure kiita, mi umri ɓe ngadda gorko man.

¹⁸Wulliiɓe mo ummi, mbolwi, ammaa ɓe ngaddaay wullaandu hallundu bana mi tammino.

¹⁹Sey ngaaba tan ɓe mbaɗi bee maako dow diina maɓɓe e dow goɗɗo bi'eteeɗo Yeesu, maayɗo. Ammaa Pol wi'i o geeto.

²⁰Min boo, nde mi heɓtaay no mi linyira haala man, mbi'mi Pol: A jaɓan yahugo Urusaliima, ɓe kiito ma ton na?

²¹Ammaa nde Pol yeli hiiteego haa laamiiɗo Roma, mi umri ɓe njogo mo hiddeko mi nelda mo haa laamiiɗo Roma.”

²²Agarippa wi'i Festus: “Min boo mi yiɗi nanugo haala gorko man.” Festus jaabi: “A nanan mo jaŋngo.”

²³Jaŋngo man yimɓe ɗuuɗɓe ɗofti Agarippa e Bernike. Ɓe nasti nokkuure kiita bee ardiiɓe dow sooje'en ujineere e mawɓe wuro. Nden Festus umri ɓe ngadda Pol. Ɓe ngaddi mo.

²⁴Festus wi'i: “Laamiiɗo Agarippa e yimɓe tawaaɓe haa ɗo fuu: Ndaa gorko mo Yahuudu'en fuu ngulli yeeso am haa Urusaliima e haa ɗo boo. Ɓe fuu ɓe ɗon ngooka, ɓe ɗon mbi'a mi mbara mo.

²⁵Ammaa mi tawaay ko he'i do'ugo mo kiita maayde sam. Nde kaŋko bee hoore maako o yeli hiiteego haa laamiiɗo Roma, mi waɗi anniya neldugo mo haa ton.

²⁶Mi anndaa boo ko mi winndanta laamiiɗo Roma dow haala maako. Ngam maajum mi waddi mo haa mooɗon e ko ɓuri haa maaɗa, laamiiɗo Agarippa, ngam haa linya haala ka'a haa min boo mi heɓa ko mi winnda.

²⁷Ngam ɗum haandaay nelugo kaɓɓaaɗo haa kiita bilaa laɓɓingo daliila wullaandu ngonka dow maako.”