Read Fulfulde Kuuɗe Nelaaɓe 28 Bible Online

Kuuɗe Nelaaɓe 28 - Fulfulde bible

Kuuɗe Nelaaɓe 28

¹Nde min njotti duunde jam, min nani innde duunde man Malta.

²Wonɓe haa ton kolli min mbooɗeeŋga pantuŋga. Ɓe njaɓɓi min, ɓe kuɓɓi yiite ngam iyeende fuɗɗi toɓugo e peewol boo waɗi.

³Pol ɓofti leɗɗe, sakkini ɗe nder yiite. Daliila nguleeŋga yiite, mboodi ngondi nder leɗɗe man wurti, ŋati mo.

⁴Nde yimɓe duunde man ngi'i mboodi ɗon ɓili haa juŋngo maako, ɓe mbi'mbi'tiri: “Walaa seko, gorko oo o mbaroowo yimɓe. Koo nde o hisi mbeela, ɗowanteeɗo meeɗen hiitoto mo, accataa mo o yeeɗa.”

⁵Ammaa Pol fiɗɗi mboodi, ndi yani nder yiite. O maataay naawɗum koo seɗɗa.

⁶Ɓe tammi juŋngo maako ɓuutan malla o maayan law. Ammaa nde haa neeɓi ɓe ngi'i walaa ko waɗi mo sam, ɓe cannji numo, ɓe mbi'i: “Asee, o ɗowanteeɗo!”

⁷Pubiliyus, mawɗo duunde man jaɓɓi min, weerni min haa maako balɗe tati. Maral maako daayaaki bee nokkuure man.

⁸Baaba Pubiliyus ɗon waali nyawɗo yontere e eemoral. Pol yehi haa maako, waɗi do'a, wallini juuɗe mum dow maako, yamɗitini mo.

⁹Ɓaawoɗon nyawɓe woɗɓe boo ngari haa Pol, o yamɗitini ɓe.

¹⁰Ɓe teddini min bee kuuje ɗuuɗɗe. Saa'i min ɗon ndilla boo, ɓe ndokki min ko min marno haaje.

¹¹Ɓaawo lebbi tati min ndilli bee koommbowal iwŋgal Aleksandiriya, bi'eteeŋgal Labbi-Ciwtuɗi. Ngal saalini dabbunde haa duunde man.

¹²Min njotti wuro Sirakus, min paɓɓi ton balɗe tati.

¹³Min ummi ton, min njotti wuro Regiyon. Jaŋngo man henndu fombina fuɗɗi waɗugo. Ɓaawo balɗe ɗiɗi, min njotti Potiyoli.

¹⁴Min tawi nuɗɗinɓe ton. Ɓe tori min min paɓɓa haa maɓɓe asaweere. Bana nii min njottori Roma.

¹⁵Nde deerɗiraaɓe wonɓe haa Roma nani habaru man, ɓe ngari haa Luumo-Appiyus e haa Beerle-Tati[53] ngam ɓe potta bee amin. Nde Pol yi'i ɓe, o yetti Allah, o tiɗɗini ɓernde maako.

¹⁶Nde min njotti Roma, Pol heɓi duŋayeere jooɗaago feere maako, koo to soojeejo ɗon ayna mo.

¹⁷Ɓaawo balɗe tati Pol ewni mawɓe Yahuudu'en wonɓe Roma. Nde ɓe kawti, o wi'i ɓe: “Deerɗiraaɓe am! Mi waɗaay koo ɗume dow ummaatoore meeɗen malla dow al'aadaaji kaakiraaɓe meeɗen, ammaa ɓe naŋngi yam, ɓe maɓɓi yam diga haa Urusaliima ɓe ndokki yam haa juuɗe Roma'en.

¹⁸Nde ɓe linyi haala man, ɓe ngiɗno yoofugo yam, ngam ɓe tawi mi waɗaay koo ɗume ko he'i do'ugo yam kiita maayde.

¹⁹Ammaa nde Yahuudu'en njaɓaay mi yoofe, doole mi toro mi hiite haa laamiiɗo Roma, koo nde mi walaa numo aybingo ummaatoore am boo.

²⁰Ngam maajum mi ewni on haa mi yi'a on, mi wolwana on boo. Ngam daliila tammunde Isra'iila mi ɗon nder callalluwol ngo'ol.”

²¹Ɓe mbi'i mo: “Minin kam, min keɓaay bataakewol habaru ma diga Yahudiya, walaa boo deerɗiraawo garɗo haa ɗo ngam hallingo innde ma.

²²Ammaa min ngiɗi nanugo ko numata dow biɗu'aaku ngu'u, ngam min anndi yimɓe koo toy ɗon ngedda ngu.”

²³Ɓe ndarni sarti nde ɓe kawtata fahin haa weerde maako. Nde nyannde man yotti, ɓe ngari ɓe ɗuuɗɓe. Pol nyalli faamtingo ɓe e waazaago ɓe haala laamu Allah. O haɓdi gooŋɗinango ɓe ko wi'a dow Yeesu diga tawreeta Muusa e defte annabi'en.

²⁴Woɗɓe njaɓi ko Pol wolwi, ammaa woɗɓe njaɓaay.

²⁵Nden ɓe ɗon ngaabotira, ɓe caaki. Ammaa diga ɓe caakaaki tawon, Pol ɓesdani ɓe wolde nde'e, wi'i: “Ndaa ko Ruuhu Ceniiɗo wolwani kaakiraaɓe mooɗon bee hunnduko annabi Esaaya:

²⁶Yah, wi' ummaatoore nde'e: On nanan bee noppi mon, ammaa on paamataa sam. On ndaaran bee gite mon, ammaa on ngi'ataa koo ɗume.

²⁷Ngam ɓerɗe yimɓe ɓe'e maatataa koo ɗume, ɓe cukki noppi maɓɓe, ɓe maɓɓi gite maɓɓe ngam taa ɓe ngi'a, taa ɓe nana, taa ɓe paama, taa ɓe tuuba boo, ngam taa min mi yamɗitina ɓe.”

²⁸Pol wi'i fahin: “Kadi sey anndon, Allah neli habaru kisndam muuɗum haa yimɓe ummaatooje goɗɗe. Kamɓe ɓe nanan!” [

²⁹Ɓaawo bolle ɗe'e, Yahuudu'en ndilli, ɓe ɗon ngaabotira caka maɓɓe masin.]

³⁰Duuɓi ɗiɗi Pol jooɗi haa suudu ndu o hoosi haya, o ɗon jaɓɓo koo moy garɗo haa maako.

³¹O waazi haala laamu Allah, o ekkitini yimɓe haala Yeesu Almasiihu, Jawmiraawo, o wolwi bee dartaare, walaa mo haɗi mo.