Read Fulfulde Kuuɗe Nelaaɓe 4 Bible Online

Kuuɗe Nelaaɓe 4 - Fulfulde bible

Kuuɗe Nelaaɓe 4

¹Yaake Piyer e Yuhanna ɗon mbolwana yimɓe, liman'en e mawɗo aynooɓe haykaliiru e Saduki'en ngari haa maɓɓe.

²Ɓe tikki masin ngam nelaaɓe go ɗon ekkitina yimɓe no Allah ummitini Yeesu Almasiihu diga maayde, nden maayɓe fuu tammi ummitineego.

³Ɓe naŋngi ɓe, ɓe maɓɓi ɓe haa suudu fursina[6] haa fajiri, ngam hiiri.

⁴Ammaa ɗuuɗɓe haa nanɓe bolle nelaaɓe ɓe'e nuɗɗini, haa limgal worɓe waɗi baakin ujine njowi.

⁵Jaŋngo man mawɓe Yahuudu'en e ndotti'en e moodiɓɓe tawreeta kawti haa Urusaliima.

⁶Ɓe kawti bee Annas hooreejo liman'en e Kayafas e Yuhanna e Aleksandire e yimɓe saare hooreejo liman'en woɗɓe fuu.

⁷Ɓe ndarni nelaaɓe yeeso maɓɓe, ɓe ƴami ɓe: “Bee baawɗe ɗeye malla bee innde moy mbaɗɗon ɗum?”

⁸Nden Piyer, kebbinaaɗo Ruuhu Ceniiɗo jaabi, wi'i ɓe: “Yaa ardiiɓe ummaatoore e ndotti'en,

⁹min ngullaama yeeso mon hannde ngam daliila kuugal booɗŋgal ngal min mbaɗani boosɗo e noy o yamɗitiri.

¹⁰Onon bee Isra'iila'en fuu, sey anndon: Neɗɗo dariiɗo yeeso mooɗon oo, o jamo ngam daliila innde Yeesu Almasiihu mo Nasaratu mo on ngaafi, ammaa Allah ummitini mo diga maayde.

¹¹Kaŋko woni: Hayre nde onon mahooɓe, on ngudini, kayre laati hayre talkumoore ɓurnde saman.

¹²Haa maako tan keɓeten kisndam, ngam walaa goɗɗo feere haa duniyaaru sam, mo Allah hokki baawɗe haa en keɓa hisrugo bee muuɗum.”

¹³Dawrooɓe Yahuudu'en go kayɗini ngam ɓe ngi'i Piyer e Yuhanna kulaay sam, sakko nde ɓe tawi naa ɓe tedduɓe, naa ɓe jaŋnguɓe boo. Nden ɓe annditi ɓe ɗonno ngondi bee Yeesu.

¹⁴Ammaa walaa ko ɓe mbaawi wi'ugo ngam ɓe ngi'i goɗɗo boosɗo go ɗon dari bee Piyer e Yuhanna, o jamo.

¹⁵Ngam maajum ɓe ngurtini Piyer e Yuhanna diga suudu dawriinde, ɓe carwootiri,

¹⁶ɓe mbi'i: “Ko mbaɗeten yimɓe ɓe'e? Caka yimɓe Urusaliima fuu walaa mo anndaa alaama kayɗiniika ka ɓe mbaɗi. En mbaawataa yeddugo ɗum.

¹⁷Ammaa ngam taa haala ka'a ɓesda saŋkitaago caka ummaatoore, sey mbarren ɓe taa ɓe meeta wolwango koo moy bee innde nde'e.”

¹⁸Nden ɓe ewni ɓe fahin. Ɓe kaɗi ɓe, ɓe mbi'i taa ɓe meeta wolwango e ekkitingo yimɓe bee innde Yeesu sam.

¹⁹Ammaa Piyer e Yuhanna njaabi: “Onon bee ko'e mon, ta'e haala ka'a. Ko wooɗi yeeso Allah: Ɗowtanaago on na malla ɗowtanaago Allah?

²⁰Ngam doole min tokko wolwugo ko min ngi'i e ko min nani.”

²¹Dawrooɓe mbarri ɓe fahin, nden ɓe njoofi ɓe. Ɓe tawaay daliila hiitaago ɓe, ngam ummaatoore fuu ɗon teddina Allah ngam ko laati.

²²Duuɓi goɗɗo mo ɓe njamɗitini ɗum bee kaayeefi, ɓuran cappanɗe nayi.

²³Nde ɓe njoofi Piyer e Yuhanna, ɓe lori ɓe ɗiɗo fuu haa yimɓe maɓɓe. Ɓe ngecci ɓe ko mawɓe liman'en e ndotti'en mbi'i ɓe fuu.

²⁴Nde yimɓe maɓɓe nani ɗum, ɓe fuu ɓe towni sawtu, ɓe tori Allah bee ɓernde woore, ɓe mbi'i: “Yaa Jawmiraawo, an woni tagɗo asama e lesdi e beeli bee ko woni ton fuu!

²⁵An waɗi kaaka amin Daawuda, suka maaɗa, wolwa bee baawɗe Ruuhu Ceniiɗo, nde o wi'i: Koni ummaatooje umminta haala, koni jama'aaje nufoto numooji meereeji?

²⁶Laamiiɓe duniyaaru ɗon taaski waɗugo fitina, ardiiɓe boo ɗon kaɓɓa dabare dow Jawmiraawo e dow Almasiihu mum.

²⁷Ngam bana non Hirudus e Pontiyus Pilaatu e ummaatooje e Isra'iila'en ɓe fuu ɓe kawti nder berniwol ngo'ol dow Yeesu, suka maaɗa ceniiɗo, mo a waɗi ɗum Almasiihu.

²⁸Ɓe mbaɗi ko a taaskitini bee baawɗe ma e muuyo ma diga ɓooyma.

²⁹Jonta, yaa Jawmiraawo, nan barriya maɓɓe! Hokku maccuɓe ma baawɗe wolwugo bolle maaɗa bee dartaare timmididnde!

³⁰Waŋgin baawɗe maaɗa haa nyawɓe njamɗita, waɗ alaamaaji e kaayeefiiji bee innde Yeesu, suka maaɗa ceniiɗo!”

³¹Nde ɓe timmini waɗgo do'a, nokkuure haa ɓe ɗonno kawti dimmbi. Ɓe fuu ɓe kebbinaama Ruuhu Ceniiɗo, ɓe ngaazi wolde Allah bee dartaare.

³²Jama'aare nuɗɗinɓe hawti ɓernde woore e hakkiilo wooto. Walaa bi'ɗo: “Jawdi am, min feere am jeyi”, ammaa ɓe kawti ko ɓe mari fuu.

³³Bee baawɗe ɗuuɗɗe nelaaɓe ceedi ummitineeki Jawmiraawo Yeesu. Allah barkiɗini ɓe fuu bee barka ɗuuɗka.

³⁴Walaa talakaajo caka maɓɓe. Marɓe gese malla cuuɗi coorri ɗum, ngaddi ceede coggu man,

³⁵njo'ini haa nelaaɓe, kamɓe ndokkata ceede man haa koo moy fodde haaje muuɗum.

³⁶Woodi goɗɗo Lewiijo bi'eteeɗo Yusufu, danyaaɗo haa Kiprus. Nelaaɓe coomi mo Barnabas, bana wi'go Cemmbiɗinoowo-yimɓe.

³⁷Kaŋko boo o soorri ngesa maako, o waddi ceede man haa nelaaɓe.