Read Fulfulde Kuuɗe Nelaaɓe 7 Bible Online

Kuuɗe Nelaaɓe 7 - Fulfulde bible

Kuuɗe Nelaaɓe 7

¹Hooreejo liman'en ƴami Etiyen: “Gooŋga ɓe mbi'i na?”

²Etiyen jaabi: “Deerɗiraaɓe e baabiraaɓe, nananeeɗam. Allah tedduɗo waŋgani kaakiraawo meeɗen Ibrahiima diga o ɗonno haa Mesopotamiya, o siwaa jooɗaago haa Haran tawon.

³Allah wi'i mo: Wurta lesdi ma, accu lenyol ma, yah haa lesdi ndi mi hollete.

⁴Nden o acci lesdi Kaldiya, o eggi, o jooɗoyi haa Haran. Ɓaawo maayde baaba maako, Allah waddi mo haa lesdi ndi on njooɗi nder maari jonta.

⁵Yaake man Allah marnaay Ibrahiima koo yaaɓannde kosŋgal nder lesdi ndi'i. Ammaa o iini marnugo mo ndi, kaŋko e danygol maako. Saa'i man boo Ibrahiima walaano ɓiŋngel tawon.

⁶Allah wi'i mo: Danygol ma njooɗoto haa lesdi njananndi, ɓe laatoto maraaɓe, ɓe torroto baakin duuɓi teemeɗɗe nayi.

⁷Ammaa mi hiitoto ummaatoore nastinnde ɓe nder maccuŋgaaku. Ɓaawoɗon, ɓe ngurtoto lesdi man, ɓe njagganto yam haa nokkuure nde'e.

⁸Nden Allah waɗani Ibrahiima alkawal, juulnol[12] laati alaama maagal. Nde Ibrahiima danyi Isiyaaku, o juulni mo nyannde joweetataɓre, Isiyaaku boo juulni Yaakubu, Yaakubu boo juulni kaakiraaɓe men sappo e ɗiɗo.

⁹Kaakiraaɓe ɓe'e kaaji Yusufu, ɓe coorri mo haa Misra. Ammaa Allah wondi bee maako,

¹⁰wurtini mo diga nder torraaji maako, hokki mo hikma e mo'ere yeeso Firawna, laamiiɗo Misra. Firawna waɗi mo ardiiɗo dow lesdi Misra e dow saare mum fuu.

¹¹Yaake man weelo[13] waɗi haa Misra bee Kanaana fuu. Ngo torri yimɓe masin, haa kaakiraaɓe meeɗen keɓaay ko nyaame.

¹²Ngam maajum, nde Yaakubu nani nyaamdu ɗon haa Misra, o neli kaakiraaɓe meeɗen ton jahaaŋgal aranal.

¹³Haa jahaaŋgal ɗiɗaɓal Yusufu annditini hoore muuɗum haa deerɗiraaɓe mum. Bana non Firawna anndiri yimɓe saare baaba Yusufu.

¹⁴Nden Yusufu neli, hoosi baaba mum Yaakubu bee saare maako fuu: Ɓe cappanɗe njoweeɗiɗo e njowo (75).

¹⁵Nden Yaakubu yehi, jooɗi haa Misra. Ton o maayi, kaŋko e kaakiraaɓe meeɗen fuu.

¹⁶Ɓe njahri ɓe haa Sikem. Ton ɓe uwi ɓe nder yenaande nde Ibrahiima sooduno haa ɓiɓɓe Hamor.

¹⁷Nde saa'i iinawol ngol Allah hunani Ibrahiima ɓadake yottaago, Isra'iila'en ɓesdi ɗuuɗugo nder Misra,

¹⁸haa wakkati laamiiɗo goɗɗo mo anndaa Yusufu laamani Misra.

¹⁹O ƴoyri yimɓe meeɗen, o torri kaakiraaɓe meeɗen go, o dooli ɓe, ɓe ngudina ɓikkoy maɓɓe musinankoy, ngam taa koy ngeeɗa.

²⁰Yaake man nden ɓe ndanyi Muusa, o ɓiɗɗo ŋarniiɗo yeeso Allah. Ɓe njogi mo haa saare baaba maako lebbi tati,

²¹nden ɓe ngurtini mo. Ammaa ɓiɗɗo Firawna debbo hoosi mo, mawnini mo bana ɓiŋngel muuɗum halal.

²²Muusa ekkiti anndal Misra'en fuu, haa o laati baawɗo bolle e kuuɗe fuu.

²³Nde Muusa yotti duuɓi cappanɗe nayi, o waɗi anniya yillaago banndiraaɓe maako, Isra'iila'en.

²⁴Nde o yi'i Misraajo ɗon torra Isra'iilaajo, o yehi haa o walla mo. O jiŋngi mo, o waati mo, o mbari Misraajo go.

²⁵O tammino yimɓe maako paaman Allah neli mo haa o hisna ɓe, ammaa ɓe paamaay.

²⁶Jaŋngo man boo o tawi Isra'iila'en ɗiɗo ɗon kaɓa. O tefi senndugo ɓe, o wi'i: Hey worɓe, onon on deerɗiraaɓe, koni on ngiɗi sarrindirgo?

²⁷Ammaa torranɗo deerɗum jaabi Muusa, wi'i mo: Moy darni ma hooreejo e kiitoowo amin?

²⁸A yiɗi mbarugo yam bana mbarɗa Misraajo keenya na?

²⁹Nde Muusa nani ɗum, o doggi, o jooɗoyi haa Mediyan, lesdi njannandi. O danyi ɓiɓɓe worɓe ɗiɗo ton.

³⁰Ɓaawo duuɓi cappanɗe nayi, malaa'ikaajo waŋgani Muusa nder jamre yiite nder wumre haa ladde haa hooseere Sina.

³¹Ko o yi'i hayɗini mo, o ɓaditi wumre haa o laara booɗɗum. Nden o nani sawtu Jawmiraawo ɗon wi'a:

³²Min woni Allah kaakiraaɓe ma, Allah Ibrahiima, Allah Isiyaaku e Allah Yaakubu. Muusa hultori, diwni, huli laarugo.

³³Jawmiraawo wi'i mo: Faɗɗita ngam nokkuure haa a ɗon dari, nde seniinde.

³⁴Mi yi'i bone yimɓe am nder Misra. Mi nani uumaali maɓɓe, mi jippake haa mi hisna ɓe. Jonta war, haa mi nele haa Misra.

³⁵Kaŋko woni Muusa mo Isra'iila'en njaɓaayno, ɓe mbi'i mo: Moy waɗi ma hooreejo e kiitoowo? Ammaa Allah neli mo o laato hooreejo e kisnoowo. Allah waɗi ɗum bee juŋngo malaa'ikaajo mo waŋgani mo nder wumre go.

³⁶Muusa wurtini ɓe bee waɗugo kaayeefiiji e alaamaaji nder lesdi Misra, haa maayo Maaliya e haa ladde duuɓi cappanɗe nayi.

³⁷Muusa wi'i Isra'iila'en: Allah umminanan on annabiijo bana am caka deerɗiraaɓe mooɗon.

³⁸Yaake jama'aare ɗonno nder ladde, kaŋko laati dariiɗo hakkunde kaakiraaɓe meeɗen e malaa'ikaajo bolwanɗo mo haa hooseere Sina. Ton o jaɓi bolle ngeendam haa o hokka en ɗe.

³⁹Ammaa kaakiraaɓe meeɗen cali ɗowtanaago Muusa. Ɓe ɗoyli mo, ɓe ngiɗi loraago haa Misra.

⁴⁰Ngam man ɓe mbi'i Haruna[14]: Waɗan min ɗowanteeɓe ardotooɓe min, ngam Muusa, goɗɗo gurtinɗo min lesdi Misra oo, min anndaa ko waɗi mo.

⁴¹Ɓe mbaɗi lawru nanndundu bee gaggel, ɓe lii'ani ndu kirseteeɗi, ɓe mbaɗi juulde, ɓe ceyori kuugal maɓɓe nga'al.

⁴²Ammaa Allah ɗoyli ɓe, acci ɓe ɓe cujidana koode asama, bana ko winnda nder deftere annabi'en: Onon Isra'iila'en! Nde on lii'i kirseteeɗi e dokke duuɓi cappanɗe nayi nder ladde, min on lii'ani na?

⁴³On ndoondi laymaaru lawru mon Molok, on ndoondi horre lawru mon Refan, labbi ɗi on mbaɗi ngam on cujidana ɗi. Ngam maajum mi dahan on[15] haa gaɗa Baabila.

⁴⁴Laymaaru Allah ɗonno caka kaakiraaɓe meeɗen nder ladde. Ɓe nyooti ndu bana no Allah waŋginani Muusa, bana misaalu ɗum o holli mo.

⁴⁵Ɓaawoɗon kaakiraaɓe meeɗen ndoni ndu haa baabiraaɓe muuɗum'en. Ɓe ndoondi ndu haa jahaaŋgal maɓɓe dow ardaaŋgal Yosuwa. Allah riiwi ummaatooje goɗɗe yeeso maɓɓe. Laymaaru ndu jooɗi ton haa yotti zamanu Daawuda.

⁴⁶Daawuda heɓi mo'ere Allah, tori haa o nyiɓana danygol Yaakubu jooɗorde.

⁴⁷Ammaa ɗum Suleymaanu nyiɓani mo nde.

⁴⁸Ammaa Allah Ɓaŋiiɗo jooɗataako nder cuuɗi ɗi yimɓe mahata, bana no annabiijo wi'i:

⁴⁹Jawmiraawo wi'i: Asama woni leeso laamu am, lesdi woni jaaɓruɗum kosɗe am. Suudu nduye on nyiɓantammi? Nokkuure ndeye laatoto siwtorde am?

⁵⁰Naa min waɗi kuuje ɗe'e fuu na?

⁵¹Onon saata-ko'e'en, on nanataa haala Allah sam! On cali nanango Ruuhu Ceniiɗo bana kaakiraaɓe mon!

⁵²Woodi annabiijo koo gooto mo kaakiraaɓe mooɗon toonyaaki na? Ɓe mbari nelaaɓe Allah, anndinɓe garki Adiliijo. Ndaa, on zammbi mo, on mbari mo.

⁵³On njaɓi tawreeta Allah ka malaa'ika'en anndini on, ammaa on tokkaaki ka.”

⁵⁴Nde dawrooɓe Yahuudu'en nani bolle ɗe'e, ɓe ɓernani Etiyen masin, haa ɓe kirƴindiri nyii'e.

⁵⁵Ammaa Etiyen, kebbinaaɗo Ruuhu Ceniiɗo, tijji asama, yi'i tedduŋgal Allah, yi'i Yeesu boo ɗon dari haa nyaamo Allah!

⁵⁶O wi'i: “Ndaa, mi ɗon yi'a asama ɗon maɓɓiti, mi ɗon yi'a Ɓii-neɗɗo ɗon dari haa nyaamo Allah.”

⁵⁷Ɓe ngooki bee sawtu, ɓe cukki noppi maɓɓe, ɓe fuu ɓe kawti, ɓe kippi mo.

⁵⁸Ɓe ngurtini mo haa yaasi berniwol, ɓe piɗi mo bee kaa'e. Seedooɓe acci limce muuɗum'en haa derkeejo bi'eteeɗo Sol.

⁵⁹Saa'i ɓe ɗon piɗa Etiyen, kaŋko o ɗon toro bana ni'i: “Jawmiraawo Yeesu, jaɓ yoŋki am!”

⁶⁰O tuggi koppi maako, o hooli, o wi'i: “Jawmiraawo! Yaafana ɓe hakkewol ngo'ol!” Nde o wi'i ɗum o maayi.