Read Fulfulde Kuuɗe Nelaaɓe 8 Bible Online

Kuuɗe Nelaaɓe 8 - Fulfulde bible

Kuuɗe Nelaaɓe 8

¹Sol boo yerdi mbareeki Etiyen. Nyannde man fitina caatuka ukkani jama'aare nuɗɗinɓe haa Urusaliima. Ɓe fuu ɓe caŋkiti haa kawye Yahudiya e Samariya, sey nelaaɓe tan lutti.

²Yimɓe hulɓe Allah uwi Etiyen, ɓe mboyi mo masin.

³Ammaa Sol ɗaɓɓi nattingo jama'aare nuɗɗinɓe. O yehi haa ci'e[16], o naŋngi nuɗɗinɓe worɓe e rewɓe, o nastini ɓe nder fursina[17].

⁴Nuɗɗinɓe saŋkitiiɓe go ngaazi Linjiila, haa ɓe njehi fuu.

⁵Filip yehi haa berniwol Samariya, o waazi yimɓe habaru Almasiihu.

⁶Mooɓe yimɓe kawti, nani bolle Filip bee hakkiilo, ngi'i boo kaayeefiiji ɗi o waɗi.

⁷Ngam ruuhuuji coɓɗi ngurti diga yimɓe ɗuuɗɓe bee gookaali. Jiijiiɓe e woosɓe ɗuuɗɓe boo njamɗiti.

⁸Yimɓe Samariya ceyi masin.

⁹Woodino goɗɗo bi'eteeɗo Simon nder berniwol ngo'ol. O ɗonno hayɗina yimɓe Samariya bee hiilaaji maako. O wi'i o mawɗo.

¹⁰Ngam maajum yimɓe nder berniwol fuu, mawɓe e leesɓe ɗonno nana mo bee hakkiilo. Ɓe mbi'i: “Kaŋko woni baawɗe Allah bi'eteeɗe Baawɗe Mawɗe.”

¹¹Neeɓi o ɗonno hayɗina ɓe bee hiilaaji maako, ngam maajum ɓe ngerdi mo.

¹²Nde Filip waazi ɓe Linjiila dow laamu Allah e dow innde Yeesu Almasiihu, ɓe nuɗɗini, worɓe e rewɓe fuu, ɓe njaɓi baptisma.

¹³Simon boo nuɗɗini. Nde o jaɓi baptisma, o tokki Filip, o hayɗini nde o yi'i alaamaaji e kaayeefiiji mawɗi ɗi Filip waɗata.

¹⁴Nde nelaaɓe haa Urusaliima nani yimɓe Samariya njaɓi wolde Allah, ɓe neli Piyer e Yuhanna haa maɓɓe.

¹⁵Nde Piyer e Yuhanna njotti ton, ɓe tori Allah haa o hokka ɓe Ruuhu Ceniiɗo.

¹⁶Ngam yimɓe Samariya jaɓino baptisma bee innde Jawmiraawo Yeesu, ammaa Ruuhu Ceniiɗo jippaakino koo dow gooto maɓɓe tawon.

¹⁷Nden Piyer e Yuhanna mballini juuɗe dow maɓɓe, ɓe keɓi Ruuhu Ceniiɗo.

¹⁸Nde Simon yi'i yimɓe keɓi Ruuhu ngam nelaaɓe mballini juuɗe dow maɓɓe, o hokki Piyer bee Yuhanna ceede,

¹⁹o wi'i ɓe: “Ndokkeeɗam min boo baawɗe ɗe'e, ngam haa mo mi wallinani ɗum juuɗe am fuu, heɓa Ruuhu Ceniiɗo.”

²⁰Ammaa Piyer jaabi mo: “Allah halkide bee ceede maaɗa fuu, ngam a numi soodugo dokkal Allah bee ceede!

²¹A walaa geɗal nder haala ka'a sam, ngam ɓernde ma laaɓaay haa yeeso Allah.

²²Tuubu dow halleende ma! Tora Allah! Teema o yaafante anniya ɓernde ma kalluka ka'a,

²³ngam mi yi'i ɓernde ma ɗon heewi kaajal, a maccuɗo halleende.”

²⁴Nden Simon tori Piyer e Yuhanna: “Useni, toraneeɗam Jawmiraawo, ngam taa ko mbi'ɗon waranammi.”

²⁵Piyer e Yuhanna mbaɗi seedamku, ɓe ngaazi wolde Jawmiraawo, nden ɓe lorti haa Urusaliima. Nde ɓe ɗon koota, ɓe ngaazi Linjiila haa gure ɗuuɗɗe nder Samariya.

²⁶[18] Malaa'ikaajo Jawmiraawo wi'i Filip: “Umma, yah haa fombina haa laawol ummotooŋgol Urusaliima yahugo Gaaza.” Yimɓe accino tokkaago laawol ngo'ol.

²⁷Filip ummi, yehi. Haa ton o tawi Etiyopiyaajo: O cortaaɗo, ardiiɗo mawɗo, kaliifaajo mardi laamiiɗo Kandas debbo mo laami dow lesdi Etiyopiya[19]. O yahno Urusaliima ngam sujidango Allah.

²⁸O ɗonno jooɗi nder moota pucci maako, o ɗon hoota. O ɗonno jaŋnga deftere annabi Esaaya.

²⁹Ruuhu Ceniiɗo wi'i Filip: “Ɓadita moota pucci nga'a.”

³⁰Filip doggi, jokki mo, nani o ɗon jaŋnga nder deftere annabi Esaaya, nden o ƴami mo: “A ɗon faama ko a jaŋngata na?”

³¹Etiyopiyaajo wi'i: “Noy paamranmi nde mi walaa paamtinoowo?” O tori Filip o wa'o moota pucci, o jooɗo kommbi maako.

³²Ndaa ko o jaŋngi nder deftere man: “O ɗon bana jawgel ngel ɓe njahrata hirseego. Bana mbaalu muukaaŋgu yeeso meksooɓe gaasa muuɗum, non o maɓɓitaay hunnduko maako.

³³Ɓe leestini mo, walaa jiŋnguɗo mo. Moy wolwata haala danygol maako? Ngam ɓe itti ngeendam maako diga duniyaaru.”

³⁴Etiyopiyaajo wi'i Filip: “Useni, yeccam, dow moy annabiijo wolwi ɗum? Dow hoore maako naa malla dow goɗɗo?”

³⁵Filip fuɗɗi wolwugo dow aayaaje go, o waazini mo Linjiila Yeesu.

³⁶Nde ɓe ɗon tokkitina jahaaŋgal maɓɓe, ɓe njotti nokkuure ndiyam. Etiyopiyaajo wi'i: “Ndaa ndiyam, ko haɗatammi jaɓugo baptisma?” [

³⁷Filip wi'i mo: “Ɗum waɗoto to a nuɗɗini bee ɓernde woore.” O jaabi: “Mi nuɗɗini Yeesu Almasiihu woni Ɓiɗɗo Allah.”]

³⁸Nden o umri ɓe ndarna moota pucci maako. Ɓe njippodi ɓe ɗiɗo fuu nder ndiyam. Filip waɗani mo baptisma.

³⁹Nde ɓe ngurti ndiyam, Ruuhu Jawmiraawo wifti Filip. Etiyopiyaajo meetaay yi'ugo mo. O tokkitini jahaaŋgal maako bee seyo.

⁴⁰Filip tawaama haa Asdod. O tokki waazaago Linjiila haa gure haa o saali fuu, haa o yotti wuro Kaysariya.