Read Fulfulde Kuuɗe Nelaaɓe 9 Bible Online

Kuuɗe Nelaaɓe 9 - Fulfulde bible

Kuuɗe Nelaaɓe 9

¹Ammaa Sol tokki furkitaago nuɗɗinɓe Jawmiraawo, nufi mbarugo ɓe. O ɓaditi hooreejo liman'en,

²o ƴami mo o winndana mo bataakeeji ngam cuuɗi dewal Yahuudu'en haa wuro Damas. Ngam to o tawi tokkiiɓe Laawol Jawmiraawo ton, worɓe e rewɓe, o naŋnga ɓe, o wadda ɓe haa Urusaliima.

³Nde o ɗon haa laawol, o ɓadi yottaago Damas, ɗon nii annoora iwi haa asama, yayni taarde maako fuu.

⁴O do'i haa lesdi, nden o nani sawtu ɗon wi'a mo: “Sol, Sol! Koni toonyotoɗa mi?”

⁵O ƴami: “An a moy, Jawmiraawo?” Sawtu go jaabi: “Min woni Yeesu mo toonyotoɗa.

⁶Ammaa umma, yah haa nder wuro, ɓe ngeccete ko a waɗata.”

⁷Yimɓe yahdanɓe bee maako ndari, njeeɗi siriw. Ɓe nani sawtu, ammaa walaa mo ɓe ngi'i.

⁸Sol ummi, dari, koo nde gite maako ɗonno maɓɓiti, o waawaay yi'ugo koo ɗume. Ngam maajum ɓe njogi mo juŋngo, ɓe njahri mo haa Damas.

⁹Balɗe tati o waawaay yi'ugo, o nyaamaay, o yaraay koo ɗume boo.

¹⁰Woodi nuɗɗinɗo haa Damas, innde maako Ananiyas. Nder wahayu, Jawmiraawo ewni mo: “Ananiyas!” O jaabi: “Ndaa yam, Jawmiraawo.”

¹¹Jawmiraawo wi'i mo: “Umma, yah haa laawol bi'eteeŋgol Laawol-Darnuŋgol, haa saare Yahuuda, a ƴama goɗɗo bi'eteeɗo Sol mo wuro Tarsus. O ɗon waɗa do'a.

¹²Nder wahayu o yi'i goɗɗo bi'eteeɗo Ananiyas nasti, wallini juuɗe mum dow hoore maako ngam haa o heɓa yi'ugo fahin.”

¹³Ananiyas jaabi: “Jawmiraawo, yimɓe ɗuuɗɓe ngecci yam sarru ngu gorko oo ukkani senaaɓe ma haa Urusaliima.

¹⁴Ndaa o wari haa ɗo bee duŋayeere mawɓe liman'en haa o naŋnga ewnotooɓe innde ma fuu.”

¹⁵Jawmiraawo wi'i mo: “Yah, ngam mi suɓi mo, mi laatini mo kuuwanoowo yam haa o waŋgina innde am haa ummaatooje e laamiiɓe e haa Isra'iila'en.

¹⁶Min bee hoore am mi hollan mo no o tammi torreego daliila innde am.”

¹⁷Nden Ananiyas dilli, nasti saare go, wallini juuɗe mum dow hoore Sol. O wi'i: “Sol, deerɗam, Jawmiraawo mo waŋgani ma haa laawol ngol ngarduɗa haa ɗo, neli yam ngam haa a wumta, a hebbine bee Ruuhu Ceniiɗo.”

¹⁸Ɗon nii goɗɗum bana koɓe yani diga gite maako, o wumti. O ummi, o jaɓi baptisma.

¹⁹Nden o nyaami, o heɓti semmbe maako. Sol jooɗodi bee nuɗɗinɓe wonɓe haa Damas balɗe seɗɗa.

²⁰Ɓaawoɗon o yehi haa cuuɗi dewal Yahuudu'en, o waazi habaru Yeesu. O wi'i: “Yeesu woni Ɓiɗɗo Allah.”

²¹Nanɓe mo fuu kayɗini, ɓe mbi'i: “Naa kaŋko ɗonno torra nuɗɗinɓe haa Urusaliima na? O waraay haa ɗo ngam o naŋnga ɓe, o haɓɓa ɓe, o yahra ɓe haa mawɓe liman'en na?”

²²Ammaa Sol ɓesdi waazugo bee dartaare. Yahuudu'en jooɗiiɓe haa Damas mbaawaay waabaago mo ngam o tinndini ɓe bee laaɓɗum Yeesu woni Almasiihu.

²³Ɓaawo balɗe ɗuuɗɗe, Yahuudu'en mbaɗi sawari, ɓe narri dow mbarugo Sol,

²⁴ammaa o nani ko haɓɓa dow maako, ɓe ɗon ayna dammuɗe berniwol jemma bee naaŋge fuu haa ɓe mbara mo.

²⁵Ammaa jemmaare feere tokkiiɓe Sol koosi mo, mbaɗi mo nder silaawo, njippiniri mo gaɗa mahol.

²⁶Sol lori haa Urusaliima, o tefi hawtugo bee nuɗɗinɓe. Ammaa ɓe fuu ɓe kuli mo, ɓe njaɓaay kaŋko boo o laati nuɗɗinɗo.

²⁷Nden Barnabas hoo'i mo, yahri mo haa nelaaɓe, yecci ɓe no Jawmiraawo waŋgirani Sol haa laawol e ko o wolwani mo e no Sol waaziri habaru Yeesu haa Damas bilaa kulol.

²⁸Nden Sol jooɗodi bee maɓɓe, o ɗon waancida bee maɓɓe nder Urusaliima, o ɗon waazina wolde Allah bilaa kulol.

²⁹O ɗon yeewtida, o ɗon waabotira boo bee Yahuudu'en wolwooɓe Yunaniŋkeere, ammaa kamɓe ɓe tefi mbarugo mo.

³⁰Nde deerɗiraaɓe nani ɗum, ɓe njahri Sol haa Kaysariya, ɓe neli mo haa Tarsus.

³¹Nden jama'aaje nuɗɗinɓe gonɗe haa lesɗe Yahudiya e Galiili e Samariya fuu njooɗi jam, bilaa torra. Ɗe mawni nder nuɗɗinki, ɗe ngeeɗi nder kulol Jawmiraawo. Bee ballal Ruuhu Ceniiɗo, limgal nuɗɗinɓe ɓesdi.

³²Piyer ɗon yaha koo toy, nyannde feere o yehi laarugo nuɗɗinɓe wonɓe haa Lidda.

³³Ton o tawi goɗɗo bi'eteeɗo Ayne'as. O jiijiiɗo, o ɗon waali dow be'itte maako waɗi duuɓi joweetati.

³⁴Piyer wi'i mo: “Ayne'as, Yeesu Almasiihu yamɗitini ma. Umma, taggu be'itte ma bee hoore ma!” Ɗon nii o ummi.

³⁵Nde yimɓe Lidda e Saroon fuu ngi'i mo, ɓe nuɗɗini Jawmiraawo.

³⁶Nder wuro Joppe woodi debbo nuɗɗinɗo, innde maako Tabita bana wi'go Lelwa. O ɗonno huuwa kuuɗe booɗɗe ɗuuɗɗe, o ɗonno walla talaka'en.

³⁷Wakkati man o nyawi, nden o maayi. Ɓe ngiiwi mo, ɓe mballini mo nder suudu dowru.

³⁸Lidda daayaaki bee Joppe. Nde nuɗɗinɓe haa Joppe nani Piyer ɗon ton, ɓe neli yimɓe ɗiɗo haa maako, ɓe tori mo: “Useni, yaawɗa, war haa amin!”

³⁹Piyer dillidi bee maɓɓe. Nde o yotti, ɓe njahri mo haa suudu dowru go. Rewɓe yurumɓe taari mo, ɓe ɗon mboya, ɓe ɗon kolla mo toggooje e limce ɗe Tabita nyooti saa'i o geeto.

⁴⁰Piyer wurtini ɓe fuu, tuggi koppi, waɗi do'a. Nden o wayliti haa maayɗo, o wi'i: “Tabita, umma!” Tabita maɓɓiti gite mum, nde o yi'i Piyer, o jooɗi.

⁴¹Piyer naŋngi mo juŋngo, ummini mo. Nden o ewni rewɓe yurumɓe go e nuɗɗinɓe fuu, o holli ɓe Tabita, o geeto.

⁴²Habaru man saŋkiti haa yimɓe Joppe fuu, ɗuuɗɓe nuɗɗini Jawmiraawo.

⁴³Ɓaawo man Piyer faɓɓi haa Joppe haa saare koppoowo lare bi'eteeɗo Simon.