Read Fulfulde Roma'en 11 Bible Online

Roma'en 11 - Fulfulde bible

Roma'en 11

¹Ngam maajum ƴamanmi: Allah wudini yimɓe mum na? Naa non sam! Min bee hoore am mi goɗɗo Isra'iila, mi danygol Ibrahiima, mi goɗɗo lenyol Benyamin.

²Allah wudinaay yimɓe mum ɓe o suɓi diga fuɗɗam. Ciftore ko Deftere anndini dow Eliya gulliiɗo Isra'iila'en haa Allah,

³o wi'i: “Yaa Jawmiraawo, ɓe mbari annabi'en ma, ɓe ngibbini kirsirɗe ma. Min feere am lutti, ɓe ɗon ɗaɓɓa mbarugo yam min boo.”

⁴Ɗume Allah jaabi mo? O wi'i: “Mi luttani hoore am worɓe ujine njoweeɗiɗo (7.000) ɓe cujidanaay Ba'al.”

⁵Bana non jonta boo: Woodi suɓaaɓe seɗɗa ɓe Allah lutti ngam daliila mo'ere muuɗum.

⁶To cuɓol Allah darino dow kuuɗe yimɓe, nden kam mo'ere maako laataaki mo'ere.

⁷Kadi noy jonta? Ko Isra'iila'en ɗaɓɓiti, ɓe keɓaay ɗum. Sey suɓaaɓe Allah nder maɓɓe keɓi ɗum. Luttuɓe maɓɓe ɓe saata-ko'e'en,

⁸bana ko winnda: “Allah hokki ɓe ruuhu ɗoyŋgol tedduŋgol. Gite maɓɓe ngi'ataa, noppi maɓɓe boo nanataa haa wargo hannde.”

⁹Daawuda boo wi'i: “Faada nyaamdu maɓɓe laatano ɓe tuuforgol, ɓe nasta ngol, ɓe ndo'o, ɓe keɓa ngeenaari kuuɗe maɓɓe.

¹⁰Gite maɓɓe mbuma ngam taa ɓe ngi'a. Ɓaawe maɓɓe turo foroy.”

¹¹Ngam maajum ƴamanmi: Ɗum waɗi Isra'iila'en non ngam haa ɓe pergo, ɓe ndo'o na? Naa non sam! Ngam daliila aybe maɓɓe, yimɓe ummaatooje goɗɗe keɓi kisndam. Allah waɗi ɗum ngam haa o ummina kaajal Isra'iila'en.

¹²Aybe maɓɓe waddani ummaatooje barkaaji ɗuuɗɗi, asar maɓɓe laati risku ummaatooje. Sakkomaa to Isra'iila'en fuu tuubi, nden kam barkaaji ɓesdan ɗuuɗugo masin!

¹³Onon ummaatooje goɗɗe, jonta mi ɗon wolwana on: Min woni nelaaɗo haa ummaatooje goɗɗe, ngam maajum mi ɗon samɗina kuugal am boo.

¹⁴Mi tammi bee maagal mi heɓata ummingo kaajal yimɓe lenyol am, haa mi hisna woɗɓe maɓɓe.

¹⁵Saa'i ɓe ngudina, duniyaaru fuu heɓi sulhotiral bee Allah. Kadi ɗume waɗoto to Allah jaɓi ɓe fahin? Ɓe laatoto bana ummitinaaɓe diga maayde!

¹⁶To goɗɗo lii'anake Allah tamseere aartunde, tamseeje luttuɗe fuu ɗe cenaaɗe. To ɗaɗi lekki laatanake Allah, nden kam lice boo kaŋko jeyi.

¹⁷Isra'iila nanndi bee jaytunhi jarne. Lice goɗɗe ta'aama haa maaki. Onon on nastinaaɓe haa pellel maaje bana lice kese iwɗe jaytunhi laddeehi. On kawti bee lice luttuɗe, on ɗon keɓa semmbe diga ɗaɗol jaytunhi jarne.

¹⁸Ngam maajum taa njawe lice ta'aaɗe go. On ngalaa daliila mawnitaago. Ngam naa onon njogi ɗaɗol, ammaa ɗaɗol jogi on.

¹⁹Teema on mbi'an jonta: “Lice man ta'aama ngam haa min nasta pellel maaje.”

²⁰Gooŋga kam, ammaa ɗe ta'aama ngam ɗe cali nuɗɗingo. Onon boo on tabitinaama ngam on nuɗɗini. Ngam maajum taa mawnite. Ndikka on kula.

²¹Ngam Allah enɗaay Isra'iila'en, koo nde ɓe lice asliije. Kadi on tammi o enɗan on na? Ngam maajum sey kakkilon.

²²Ndaare mbooɗeeŋga Allah e caatal mum fuu. O ɗon saatana accuɓe mo, ammaa o ɗon woonana on nde on ɗon tabiti nder mbooɗeeŋga maako. To naa non, onon boo on ta'eteeɓe.

²³To Isra'iila'en lortake, nuɗɗini, nden kam Allah nastinan ɓe fahin nder jaytunhi, ngam Allah woodi baawɗe waɗgo ɗum.

²⁴Nde Allah ta'i on diga jaytunhi laddeehi, nastini on jaytunhi jarne, ɗum luuti ɗabiya tagdi fuu. To non kam, ɗum koyɗum haa Allah nastina lice asliije fahin nder jaytunhi ki ɗe iwi haa muuɗum.

²⁵Deerɗiraaɓe am, mi yiɗi waŋginango on sirri, ngam taa ndaaron ko'e mon bana on hikma'en. Isra'iila'en woɗɓe laati saata-ko'e'en. Ammaa ɗum timman to limgal suɓaaɓe Allah iwɓe diga ummaatooje goɗɗe ciki.

²⁶Nden kam Isra'iila fuu hisan, bana ko winnda: “Kisnoowo waran diga hooseere Siyona, ittan geddal yimɓe Yaakubu fuu.

²⁷Kanjum woni alkawal am bee maɓɓe, saa'i ittanmi aybeeji maɓɓe.”

²⁸Kamɓe ɓe njaɓaay Linjiila, ɓe laatake konne'en Allah, ngam haa keɓon nanugo Linjiila. Ammaa, ɓe yiɗaaɓe Allah ngam o suɓi ɓe daliila kaakiraaɓe maɓɓe. Ngam maajum ɓe yiɗaaɓe maako.

²⁹Ngam Allah hoosititta dokke muuɗum, faasitittaa ewnaandu muuɗum.

³⁰Ɓooyma, onon on ɗowtanaakino Allah. Ammaa jonta on keɓi enɗam muuɗum, ngam Yahuudu'en ɗowtanaaki mo.

³¹Bana non jonta, kamɓe boo, ɓe cali ɗowtanaago Allah mo enɗi on ngam haa kamɓe boo ɓe keɓa enɗam ɗa'am.

³²Allah haɓɓi yimɓe fuu nder sooynde ɗowtaare, ngam o muuyi enɗugo ɓe fuu.

³³Kay! Jeynitaare Allah ɗuuɗi masin! Faamu maako e anndal maako keɓtataake. Moy foti linyugo anniyaaji Allah? Moy faamata laabi maako?

³⁴Deftere wi'i: “Moy anndi numooji Jawmiraawo? Moy laati dawroowo maako?

³⁵Moy aarti hokkugo mo huunde ngam haa heɓa mbarjaari?”

³⁶Allah tagi kuuje fuu. Haa maako ɗe iwi, ɗe ɗon ngam maako. Tedduŋgal laatano mo haa foroy. Aamiina!