Read Fulfulde Roma'en 12 Bible Online

Roma'en 12 - Fulfulde bible

Roma'en 12

¹Deerɗiraaɓe am, Allah waŋginani en enɗam mum ɗuuɗɗam. Ngam maajum mi ɗon toro on on lii'ano mo ko'e mon bana kirseteeɗi geeti, ceniiɗi, pottananɗi mo. Kanjum woni dewal ngal haandani mo.

²Taa tokke ko yimɓe zamanuuru ndu'u mbaɗata, ammaa acce Allah wayla ɓerɗe mon, hesɗitina hakkiilooji mon. Nden kam on anndan muuyo Allah, waato ko wooɗi e ko fottanta mo e ko woni timmuɗum.

³Daliila mo'ere nde Allah waɗani yam, mi ɗon umra koo moy mooɗon: Taa goɗɗo numana hoore mum maŋngu ɓuranŋgu no foti, ammaa koo moy laara hoore mum deydey geɗal nuɗɗinki ngal Allah hokki mo.

⁴Ndaare ɓanndu neɗɗo, ndu woodi terɗe ɗuuɗɗe, tergal fuu woodi kuugal maagal.

⁵Bana non enen boo, koo nde en ɗuuɗɓe, en laati ɓanndu wooru nder kawtal bee Almasiihu, en fuu en ɗon kawti bana terɗe haa ɓanndu wooru.

⁶Allah hokki en dokke feere feere fodde mo'ere muuɗum: Mo heɓi dokkal waazaago wolde Allah, sey o waazo ko Allah wi'i mo tan.

⁷Mo heɓi dokkal wallugo tampuɓe, sey o walla ɓe. Mo heɓi dokkal ekkitingo nuɗɗinɓe, sey o ekkitina ɓe.

⁸Mo heɓi dokkal de'itingo woɗɓe, sey o de'itina ɓe. Mo yiɗi senndugo risku mum bee woɗɓe, sey waɗa ɗum bee caahaaki. Mo heɓi kaliifaaku, sey o huuwa bee tiinaare. Mo woonanta woɗɓe, sey o waɗa ɗum bee seyo.

⁹Yiide mon laato laaɓnde, nde walaa faasikaare. Nganye halleende koo ndeye, taa acce waɗgo mbooɗeeŋga.

¹⁰Ngiɗindire ngam on deerɗiraaɓe nder Almasiihu. Sey koo moy samɗina deerɗum, ɓurna mo dow hoore mum.

¹¹Taa laate mbaateendam'en, acce Ruuhu Allah tiɗɗina on, kuuwane Jawmiraawo bee tiinaare.

¹²Ceyore tammunde hayru mon, munyane ɓillaaje, tiine do'aago.

¹³Mballite nuɗɗinɓe laafuɓe bee jawdi mon ngam on deerɗiraaɓe, njaɓɓe hoɗɓe booɗɗum.

¹⁴Mbarkiɗine toonyiiɓe on. Mbarkiɗine, taa naale.

¹⁵Ceyode bee seyiiɓe, mboyde bee woyanɓe.

¹⁶Njooɗode on narruɓe. Taa ɗaɓɓe maŋngu nder jama'aare mon, ndikka on njaɓa kuuɗe leesɗe, jaŋkiniiɗe. Taa ndaare ko'e mon bana on marɓe anndal fuu.

¹⁷To goɗɗo waɗi on kalluɗum, taa mbaate. Kakkile haa on mbaɗana yimɓe fuu ko wooɗi.

¹⁸Onon kam, tiine no mbaawɗon fuu haa on njooɗodo jam bee koo moy.

¹⁹Soobiraaɓe am, to goɗɗo waɗi on aybe, taa mbaate, ammaa acce tikkere Allah waɗa ɗum, ngam Deftere wi'i: “Min waatoto, min warjoto ɓe. Nii Jawmiraawo wi'i.”

²⁰Ammaa: “To konneejo ma dolaama, nyaamnu mo. To o ɗomɗaama, yarnu mo. To a waɗi bana nii a ɗon mooɓta ƴulɓe yiite dow hoore maako.”

²¹Taa accu halleende jaalo ma, ammaa jaalora nde bee mbooɗeeŋga.