Read Fulfulde Roma'en 13 Bible Online

Roma'en 13 - Fulfulde bible

Roma'en 13

¹Sey koo moy ɗowtano marɓe laamu. Ngam kala laamu fuu iwi diga Allah. Kaŋko jo'ini laamuuji fuu.

²Ngam maajum koo moy tuurtani marɓe laamu, luuti umroore Allah. Tuurtooɓe pooɗanan ko'e muuɗum'en kiita.

³Baɗanɗo ko wooɗi hulataa ardiiɓe, sey baɗanɗo kalluɗum. To on ngiɗaa hulugo marɗo baawɗe, mbaɗe ko fotti, nden kam o manan on.

⁴Ngam marɗo laamu ɗon huuwana Allah haa o walla on waɗgo mbooɗeeŋga. Ammaa to on mbaɗi kalluɗum, doole on kula mo. Ngam o kuuwanoowo Allah, o woodi baawɗe hiitaago, Allah darni mo ngam haa o waŋgina tikkere Allah dow waɗanɓe halleende.

⁵Ngam maajum doole on ɗowtano mo, naa ngam tikkere Allah tan, ammaa ngam numooji ɓerɗe mon anndi ɗum pottuɗum boo.

⁶Ngam to marɓe laamu ɗon kuuwa kuugal nga'al, ɓe ɗon kuuwana Allah. Ngam maajum njoɓoton jomorgol boo.

⁷Ndokkite marɓe laamu ko haandani ɓe fuu, njoɓe jomorgol deydey ko haandani on yoɓugo, ɗowtane mo haandani ɗowtaneego, teddine mo haandani teddineego.

⁸To goɗɗo hokki on nyamaande, njoɓe mo nde. Sey yiide tan laato bana nyamaande nde on timmintaa yoɓugo caka mooɗon. Koo moy yiɗi keeddiɗɗum, hebbitini tawreeta.

⁹On anndi umrooje: “Taa waɗ njeenu, taa mbar-hoore, taa wujju, taa suuna.” Umrooje ɗe'e fuu mooɓaama nder umroore woore: “Yiɗ keeddiɗɗiraawo ma bana no a yiɗiri hoore ma.”

¹⁰Koo moy yiɗi keeddiɗɗum, waɗataa mo halleende. Ɗum yiide hebbitinta tawreeta.

¹¹Mbaɗe ɗum, ngam on anndi saa'i waɗi jonta haa on pina diga ɗoyŋgol mon. Wakkati kisndam men ɓadi masin, ɓuri naane nde puɗɗunooɗen nuɗɗingo Jawmiraawo.

¹²Jemma jeŋngi masin, nyalawma ɓadake. Ngam maajum sey en acca huuwugo kuuɗe nyiɓre, en ɓorno balmi annoora.

¹³Sey mbaɗen ko fotti ngam en yimɓe nyalawma: Taa en mbaɗa pijirle kalluɗe, taa en nguyka, en acca boo daakaareeku e kuuɗe cemtiniiɗe e jokkirgol e kaajal.

¹⁴Acce Jawmiraawo Yeesu Almasiihu laamano ngeendam mon fuu. Taa cuklane suunooji mon, ngam taa ɗi njaalo on.