Read Fulfulde Roma'en 16 Bible Online

Roma'en 16 - Fulfulde bible

Roma'en 16

¹Mi ɗon nelda on Febe mo ngerdiimi. O deerɗiraawo men debbo, balloowo jama'aare nuɗɗinɓe haa Keŋkereya.

²Njaɓe mo bee innde Jawmiraawo bana no haandani senaaɓe. Mballe mo nder haaje maako fuu, ngam kaŋko o walli yimɓe ɗuuɗɓe, o walli yam boo.

³Koofne Piriska e Akilas, huuwdiɗɗiraaɓe am ngam Yeesu Almasiihu,

⁴foondiraaɓe maayugo ngam hisnugo yoŋki am. Naa min feere am yettata ɓe, ammaa jama'aaje nuɗɗinɓe nder ummaatooje fuu.

⁵Koofne nuɗɗinɓe mooɓtotooɓe haa saare maɓɓe boo. Koofne Epaynetus giɗaaɗo am, nuɗɗinɗo Almasiihu aartuɗo nder lesdi Asiya.

⁶Koofne Mariyama mo huuwani on bee tiinaare ɗuuɗnde.

⁷Koofne boo Andronikus e Yuniyas, yimɓe lenyol am, haɓɓidaaɓe bee am nder fursina[6]. Ɓe tedduɓe caka nelaaɓe, ɓe aarti yam nuɗɗingo Almasiihu boo.

⁸Koofne Ampiliyatus giɗaaɗo am nder Jawmiraawo.

⁹Koofne Urbanus, kuuwdiɗɗiraawo meeɗen ngam Almasiihu. Non boo Istakis giɗaaɗo am.

¹⁰Koofne Apelles baŋginɗo nuɗɗinki laaɓki nder Almasiihu. Koofne yimɓe saare Aristobul.

¹¹Koofne Herodiyon mo lenyol am. Non boo yimɓe Jawmiraawo nder saare Narsis.

¹²Koofne Tirifena e Tirifosa, deerɗiraaɓe men rewɓe, tiiniiɓe jagganaago Jawmiraawo. Non boo Persis deerɗiraawo debbo, giɗaaɗo men mo huuwani Jawmiraawo bee tiinaare ɗuuɗnde.

¹³Koofne Rufus cuɓaaɗo Jawmiraawo. Non boo daada[7] maako laatiiɗo bana daada am boo.

¹⁴Koofne Asiŋkirit e Felegon e Hermes e Patorobas e Hermas e deerɗiraaɓe wonduɓe bee maɓɓe fuu.

¹⁵Koofne Filologus e Yuliya, non boo Neriyus e deerɗum debbo e Olimpas e nuɗɗinɓe wonduɓe bee maɓɓe fuu.

¹⁶Koofnindire, karlotire bana no ɗum haandani senaaɓe. Jama'aaje nuɗɗinɓe Almasiihu fuu koofni on.

¹⁷Deerɗiraaɓe am, mi ɗon toro on: Ndeente e waɗooɓe luural, wonnooɓe nuɗɗinki yimɓe waato luutuɓe anndinol ngol njaɓɗon. Ndaaye ɓe.

¹⁸Irin maɓɓe kuuwantaa Almasiihu, Jawmiraawo men, sey deeɗi maɓɓe tan. Ɓe ɗon majjina sooyɓe anndal bee bolle ne'iiɗe e haalaaji belɗi.

¹⁹Onon kam, koo toy yimɓe anndi on ɗowtaniiɓe Jawmiraawo. Ngam maajum mi ɗon seyoro on. Ko ngiɗmi kam, on keɓa hikma waɗgo mbooɗeeŋga, ammaa on ndaayo halleende.

²⁰Allah dokkoowo en jam, hokkan on jaalorgal timmuŋgal dow Sayɗaanu, on ndamman mo les kosɗe mon. Mo'ere Jawmiraawo men Yeesu Almasiihu wonda bee mooɗon fuu.

²¹Timote, kuuwdiɗɗiraawo am, hoofni on, non boo Lukiyus e Yason e Sosipater, yimɓe lenyol am.

²²Min Tertiyus, binnduɗo bataakewol ngo'ol, mi hoofni on nder kawtal men bee Jawmiraawo.

²³Gayus, beero am e beero nuɗɗinɓe haa ɗo fuu, hoofni on. Non boo Erastus, aynoowo ceede wuro e Kawartus, deerɗiraawo men. [

²⁴Mo'ere Jawmiraawo men Yeesu Almasiihu wonda bee mooɗon fuu. Aamiina!]

²⁵Tedduŋgal laatano Allah! Kaŋko o woodi baawɗe semmbiɗingo on fodde Linjiila ka ngaazinanmi. Linjiila ɗon anndina haala Yeesu Almasiihu, ka ɗon waŋgina gooŋga Allah sirriiha. Gooŋga man ɗonno suuɗi diga ɓooyma,

²⁶ammaa jonta ka waŋginaama. Defte annabi'en boo ɗon ceedo ka. Fodde umroore Allah duumiiɗo ka anndinaama yimɓe nder ummaatooje fuu, ngam haa ɓe nuɗɗina ka, ɓe ɗowtano Allah.

²⁷Allah feere muuɗum mari hikma. Tedduŋgal laatano mo bee Yeesu Almasiihu haa foroy! Aamiina!