Read Fulfulde Roma'en 2 Bible Online

Roma'en 2 - Fulfulde bible

Roma'en 2

¹Ngam maajum, an neɗɗo, koo a moye a walaa geldol nde a ɗon hiito goɗɗo. Ngam to a hiitake woɗɓe, ɗum hoore maaɗa a hiiti, ngam a ɗon waɗa ko ɓe mbaɗata.

²En anndi Allah ɗon hiito waɗanɓe kuuɗe man kiita ngooŋɗuka.

³Kadi, an kiitanɗo woɗɓe, ammaa a ɗon waɗa ko a hiitoto haa maɓɓe, a tammi a hisan kiita Allah na?

⁴Malla a ɗon yawo jeynitaaje mbooɗeeŋga maako ɗuuɗŋga e munyal maako? A anndaa no mbooɗeeŋga Allah ɗon ɗowe haa tuubu na?

⁵Ammaa hoore ma saati, ɓernde ma sali boo tuubugo. Ngam maajum, a ɗon tokko fooɗango hoore ma tikkere Allah ɓurnde saatugo nyalaade darŋgal, nyalaade man Allah waŋginan tikkere mum e kiita mum ngooŋɗuka.

⁶O warjoto koo moy deydey kuuɗe mum.

⁷Tiiɗɓe waɗgo ko fotti, ɗaɓɓitanɓe tedduŋgal e daraja e duumaare, o hokkan ɓe ngeendam nduumiiɗam.

⁸Ammaa tuurtuɓe dow maako, salotooɓe gooŋga, tokkotooɓe halleende, o rufan tikkere maako saatunde fuu dow maɓɓe.

⁹Ɓillaare e bone ukkanto waɗanɓe halleende, aran Yahuudu'en, nden yimɓe ummaatooje goɗɗe boo.

¹⁰Ammaa koo moy waɗi ko fotti, Allah hokkan mo tedduŋgal e daraja e jam, aran Yahuudu'en, nden yimɓe ummaatooje goɗɗe.

¹¹Ngam Allah senndindirtaa yimɓe.

¹²To goɗɗo mo anndaa tawreeta waɗi hakke, o halkan bilaa tawreeta. Ammaa to goɗɗo mo anndi tawreeta waɗi hakke, nden kam o kiiteteeɗo fodde tawreeta.

¹³Goɗɗo laatataako adiliijo yeeso Allah bee nanugo tawreeta tan, sey bee ɗowtanaago ka.

¹⁴Yimɓe ummaatooje ngalaa tawreeta. Ammaa to ɓe mbaɗi bee muuyo maɓɓe ko tawreeta umrata, koo nde ɓe keɓaay ka, ɓe mbaɗani ko'e maɓɓe tawreeta.

¹⁵Umrooje tawreeta mbinndaama nder ɓerɗe maɓɓe, kuuɗe maɓɓe ɗon mbaŋgina ɗum. Numooji ɓerɗe maɓɓe boo ɗon mbaŋgina ɗum, ngam saa'i feere numooji maɓɓe ngulloto ɓe, saa'i feere boo ɗi ceettoto ɓe.

¹⁶Nyalaade nde Allah hiitoto numooji yimɓe cuuɗiiɗi bee Yeesu Almasiihu fodde Linjiila ka ngaazanmi, koo ɗume fuu waŋgan.

¹⁷Kadi noy an Yahuuduujo jonta? A ɗon seyoro ewneego Yahuuduujo, a ɗon dari dow tawreeta, a ɗon juroro Allah ma.

¹⁸A anndi muuyo Allah, ngam tawreeta anndini ma suɓugo ko fotti.

¹⁹A numi fakat a waawan ɗowugo wumɓe e yaynango wonɓe nder nyiɓre

²⁰e eltugo faataaɓe e jaŋngingo derke'en e a heɓi anndal e gooŋga fuu bee tawreeta boo.

²¹A ɗon jaŋngina woɗɓe, ammaa a jaŋnginaay hoore ma. A ɗon wi'a: “Taa wujju”, ammaa an bee hoore ma a ɗon wujja.

²²A ɗon wi'a: “Taa waɗ njeenu”, ammaa an bee hoore ma a ɗon njeena. A ɗon wanya labbi, ammaa a ɗon wujja kuuje nder cuuɗi maaji.

²³A ɗon juro ngam Allah hokki ma tawreeta, ammaa a ɗon yawo mo bee luutugo ka.

²⁴Bana ko winnda: “Ngam daliila mooɗon, onon Yahuudu'en, ummaatooje goɗɗe ɗon kallina innde Allah.”

²⁵To a ɗowtanake tawreeta, nden juulnol[1] ma boo nafete. Ammaa to a luuti tawreeta, nden kam juulnol ma laatake meere, a fotan kal-kal bee ɓe njuulnaaki.

²⁶Kadi to goɗɗo mo juulnaaki ɗowtanake umrooje tawreeta, Allah laarataa mo bana o juulniiɗo na?

²⁷Ngam maajum goɗɗo mo juulnaaki, ammaa ɗowtani tawreeta, hiitete an juulniiɗo mo ɗowtanaaki tawreeta ka Allah hokki ma.

²⁸Naa ko gite ngi'ata wartirta goɗɗo Yahuuduujo gooŋgaajo. Juulnol gooŋgawol boo naa ɗum juulnol fodde ɓanndu malla ko gite ngi'ata.

²⁹Ammaa juulnol ngol yi'ataake, ngol Allah waɗi nder ɓernde goɗɗo kaŋgol laatinta mo Yahuuduujo. Juulnol ngo'ol waɗoto bee Ruuhu Allah, naa bee umroore tawreeta. Yahuuduujo gooŋgaajo heɓataa maŋgtoore mum diga yimɓe, ammaa diga Allah tan.