Read Fulfulde Roma'en 3 Bible Online

Roma'en 3 - Fulfulde bible

Roma'en 3

¹To non kam, woodi ko Yahuudu'en ɓurdata ummaatooje goɗɗe na? Juulnol maɓɓe woodi saman na?

²Fakat, ɗum woodi saman, naa seɗɗa. Aran, Allah halfini ɓe bolle mum.

³To woɗɓe maɓɓe laataaki gooŋga'en, ɗum wilan gooŋgaaku Allah na?

⁴Wilataa sam! Allah o gooŋgaajo foroy ammaa yimɓe fuu ɓe fewooɓe. Bana ko winnda: “Sey koo moy fuu yi'a a gooŋgaajo nder bolle maaɗa fuu e a laato jaaliiɗo to goɗɗo wullake ma.”

⁵To nii sooynde adilaaku meeɗen ɗon waŋgina adilaaku Allah bee laaɓɗum, ko mbi'eten? Kadi Allah wonaay adiliijo to o ukkani en tikkere maako na? Mi ɗon ƴama bana yimɓe ƴamrata.

⁶Woodaa sam! Ngam to Allah wonaay adiliijo, noy o hiitorto duniyaaru?

⁷Ammaa to sooynde adilaaku am ɗuɗɗini tedduŋgal Allah, waŋgini gooŋga maako laaɓɗum, ngam ɗume o hiitoto yam ngam mi hakkeejo?

⁸Noy to en mbi'i: “Kuuwen halleende ngam haa mbooɗeeŋga waŋga.” Woɗɓe ɗon kallinammi, ɗon mbi'a min wi'i ɗum. Kayto, ɓe keɓan kiita deydey aybe maɓɓe.

⁹Nden kam enen Yahuudu'en en ɓuri yimɓe woɗɓe kadi na? Walaa sam! Ngam mi aarti mi wi'i hakke ɗon laamano Yahuudu'en e Yunaniŋke'en kal-kal.

¹⁰Bana ko winnda nder Deftere Seniinde: “Walaa kuuwanɗo ko fotti, walaa koo gooto.

¹¹Walaa marɗo hakkiilo, ɓaditanɗo Allah.

¹²Ɓe fuu ɓe celi laawol gooŋga, ɓe mbonnake. Walaa baɗanɗo ko wooɗi, walaa koo gooto.

¹³Kondondi maɓɓe nanndi bee genaale maɓɓitiiɗe, ɗemɗe maɓɓe ɗon mbolwa bolle rikiciije, bolle mbarooje bana tooke poosokje ɗon ngurto kunnduɗe maɓɓe.

¹⁴Kunnduɗe maɓɓe keewi naalooje e bolle kaaɗɗe.

¹⁵Kosɗe maɓɓe ɗon njaawa yahugo mbara yimɓe,

¹⁶bonnonda e halkere waɗan koo toy ɓe njehi fuu.

¹⁷Ɓe anndaa laawol jam,

¹⁸ɓe ngalaa kulol Allah sam.”

¹⁹En anndi ko tawreeta wi'ata fuu, ɗon wolwana hokkaaɓe tawreeta, ngam taa goɗɗo heɓa geldol, ngam haa yimɓe duniyaaru fuu anndita ɓe aybuɓe yeeso Allah.

²⁰Walaa mo laatoto adiliijo yeeso Allah bee ɗowtanaago tawreeta. Neɗɗo woodi hakke, kanjum tan tawreeta anndinta en.

²¹Ammaa ko tawreeta e annabi'en ceedani en diga ɓooyma, ɗum waɗi jonta: Allah bee hoore mum waŋgini no yimɓe laatorto adili'en yeeso maako bilaa tawreeta.

²²Allah adilinan koo moy nuɗɗini Yeesu Almasiihu. O ɗon adilina nuɗɗinɓe fuu ngam haa maako yimɓe fuu potan kal:

²³Ɓe fuu ɓe mbaɗi aybe, ɓe cooyi tedduŋgal Allah.

²⁴Ammaa Allah bee mo'ere muuɗum, waɗani ɓe caahu bee adilingo ɓe. O sootti ɓe bee Yeesu Almasiihu.

²⁵Allah darni Yeesu Almasiihu haa nuɗɗinɓe mo fuu keɓa yaafuye bee ƴiiƴam maako. O hiitaaki hakkeeji maɓɓe ɓooymaaji, o munyani ɓe, o yaafi ɓe. Bana nii o waŋginiri adilaaku maako jonta waato o adiliijo e o adilinanɗo nuɗɗinanɓe Yeesu fuu.

²⁷Kadi, daliila mawnitaago ɗon luttani en na? Walaa sam! Ngam ɗume? Ngam Allah limataa kuuɗe, sey nuɗɗinki.

²⁸En anndi fakat, Allah ɗon adilina goɗɗo ngam daliila nuɗɗinki, naa ngam daliila ɗowtaare heedi tawreeta.

²⁹Kadi Allah o Allah Yahuudu'en tan na? Naa o Allah ummaatooje goɗɗe boo na? Nonnon, o Allah ummaatooje fuu.

³⁰Allah o gooto, o ɗon adilina juulnotooɓe e ɓe njuulnataako fuu, to ɓe nuɗɗini Yeesu Almasiihu.

³¹To mi wi'i bana nii, mi ɗon wila tawreeta na? Naa non sam! Mi ɗon tabitina tawreeta.