Read Fulfulde Roma'en 4 Bible Online

Roma'en 4 - Fulfulde bible

Roma'en 4

¹Ko mbi'eten dow Ibrahiima kaaka meeɗen? Ɗume o heɓi?

²To Ibrahiima heɓruno adilaaku Allah bee kuuɗe muuɗum, o mawnitittono. Ammaa naa haa yeeso Allah.

³Fakat Deftere wi'i: “Ibrahiima nuɗɗini Allah, Allah boo limani mo ɗum adilaaku.”

⁴Kuuwoowo fuu foti heɓugo ngeenaari mum, ngeenaari boo wonaay caahu sam ammaa ɗum dooleejum.

⁵To goɗɗo daraaki dow kuuɗe mum, ammaa nuɗɗini Allah jaɓɗo aybuɗo, nden kam Allah limanan mo nuɗɗinki man adilaaku, adilinan mo.

⁶Non boo, Daawuda wolwi haala seyo goɗɗo mo Allah adilini ɗum bilaa kuuɗe. O wi'i:

⁷“Seyo laatani yimɓe, to Allah yaafake hakke maɓɓe, suddi boofi maɓɓe fuu.

⁸Seyo laatani goɗɗo, to Jawmiraawo limanaay mo aybeeji.”

⁹Seyo maajum laatanto juulnotooɓe tan na? Aa'a, ngo laatanto ɓe njuulnataako boo. Min ɗon mbi'a: “Ibrahiima nuɗɗini Allah, Allah boo laari mo o adiliijo.”

¹⁰Noy ɗum laatori? Bee juulnol na malla bilaa juulnol? Fakat, saa'i man o siwaa juulnaago.

¹¹Ibrahiima heɓi juulnol bana alaama tabitinka adilaaku muuɗum. Allah adilini mo ngam daliila nuɗɗinki maako, diga o siwaa juulnaago. Bana nii Ibrahiima laatori baaba nuɗɗinɓe fuu, Allah adilini ɓe koo ɓe njuulnaaki boo.

¹²O laati baaba juulniiɓe fuu. Ammaa naa juulniiɓe fuu ngoni ɓiɓɓe Ibrahiima, sey tokkiiɓe nuɗɗinki maako diga o juulnaakino.

¹³Allah wi'i Ibrahiima e danygol muuɗum, o marnan ɓe duniyaaru fuu. Ibrahiima heɓi iinawol ngo'ol naa ngam o ɗowtani tawreeta ammaa ngam Allah adilini mo daliila nuɗɗinki maako.

¹⁴To goɗɗo heɓi maral nga'al bee ɗowtanaago tawreeta, nden kam nuɗɗinki nafataa, iinawol Allah boo laatoto meere.

¹⁵Walaa ko tawreeta waddanta yimɓe, sey tikkere Allah tan. Ngam to umroore walaa, luutugo nde boo woodaa.

¹⁶Ngam maajum Allah darni iinawol ngo'ol dow nuɗɗinki, haa ɗum laato dokkal mo'ere maako. Iinawol ngo'ol ɗon ngam asŋgol Ibrahiima fuu, naa ngam marɓe tawreeta tan, ammaa ngam tokkiiɓe nuɗɗinki Ibrahiima boo. Ibrahiima o baaba meeɗen en fuu.

¹⁷Bana ko winnda, Allah wi'i mo: “Mi darni ma baaba ummaatooje ɗuuɗɗe.” Ibrahiima nuɗɗini Allah geeɗitinoowo maayɓe, umranɗo ko walaa ɗum wona.

¹⁸Ibrahiima nuɗɗini Allah bee tammaago huunde nde goɗɗo tammataako. Bana nii o laatori baaba ummaatooje ɗuuɗɗe fodde ko winnda: Non danygol ma laatoto.

¹⁹Saa'i maajum duuɓi Ibrahiima ndillani teemerre. O anndi o waawataa danyugo ɓikkoy. Debbo maako Saraatu boo naywi masin, waawataa reedugo.

²⁰Bee non fuu, nuɗɗinki maako tampaay, o sekaay iinawol Allah, ammaa o teddini mo bee nuɗɗinki cemmbiɗki.

²¹O nuɗɗini fakat Allah woodi baawɗe waɗugo ko o iini.

²²Ngam maajum “Allah limani mo ɗum adilaaku.”

²³Wolde nde'e winndaaka ngam Ibrahiima tan,

²⁴ammaa ngam meeɗen boo. To en nuɗɗini Allah ummitini Jawmiraawo meeɗen Yeesu Almasiihu diga maayde, kaŋko o limanan en ɗum adilaaku.

²⁵Allah acci o maaya ngam daliila aybeeji men. O ummitini mo boo ngam haa o adilina en yeeso maako.