Read Fulfulde Roma'en 6 Bible Online

Roma'en 6 - Fulfulde bible

Roma'en 6

¹Ko mbi'eten jonta? En tokko jooɗaago nder hakke ngam haa mo'ere Allah ɓesdo na?

²Kayya, naa non sam! Heedi hakke kam, en maayɓe. Kadi noy tokkortooɗen yeeɗugo nder hakke?

³Nde en njaɓi baptisma, en kawti bee Yeesu Almasiihu. On anndi booɗɗum ɗum kawtal bee maayde maako.

⁴Nder baptisma en uwdaama bee maako. Nden bana kaŋko o ummiti diga maayde bee baawɗe Allah tedduɗe, bana non enen boo ngeeɗirten ngeendam kesam.

⁵Ngam to en maaydi bee maako, nden kam en ummititto boo bana maako.

⁶En anndi fakat, ko laatiiɗen ɓooyma ɗum maaydi bee Almasiihu dow leggal gaafaaŋgal ngam haa ɓanndu hakkeeru natta, ngam taa en laato maccuɓe hakke fahin.

⁷Ngam to goɗɗo maayi, hakke walaa baawɗe dow maako fahin.

⁸To en maaydi bee Almasiihu, nden kam en nuɗɗini en ngeeɗan bee maako boo.

⁹Fakat en anndi Almasiihu ummiti diga maayde, meetataa maayugo, maayde walaa baawɗe dow maako.

¹⁰Nde woore o maayi heedi hakke, jonta nde o geeto, o ɗon yeeɗa ngam Allah.

¹¹Bana non onon boo ndaare ko'e mon on maayɓe heedi hakke, ammaa nder kawtal bee Almasiihu on yeeɗɓe ngam Allah.

¹²Ngam maajum taa acce hakke laamo nder ɓalli mon maayanɗi, taa tokke suunooji maaji boo.

¹³Taa lii'ane hakke terɗe mon ngam haa ɗe laato kuuwtinirɗe halleende. Ammaa lii'ane Allah ko'e mooɗon ngam haa o huuwtinira terɗe mon waɗugo kuuɗe adilaaku ngam on ngurtake maayde, on nasti ngeendam.

¹⁴Hakke laamataa dow mooɗon, ngam jonta les mo'ere ngonɗon, naa les tawreeta.

¹⁵Nde mo'ere ɗon laamano en, naa tawreeta kam, en tokko waɗugo hakke na? Naa non sam!

¹⁶On anndaa na? Nde on lii'ani goɗɗo ko'e mon haa on ɗowtano mo, on laati maccuɓe maako. To on ɗon ɗowtano hakke, nden kam on maayan, ammaa to on ɗon ɗowtano Allah, o adilinan on.

¹⁷Yettoore laatano Allah! Naane on maccuɓe hakke, ammaa jonta on ɗowtani gooŋga ekkitinol ngol on nani bee ɓernde woore.

¹⁸On rimɗinaaɓe diga njeyaaŋgu hakke, on laati maccuɓe adilaaku.

¹⁹Mi ɗon wolwana on bana yimɓe mboowi wolwugo ngam on tampuɓe. Naane on kuuwtiniri terɗe mon bana maccuɓe coɓki e halleende, on mbaɗi kalluɗum. Bana non jonta boo naftore terɗe mon bana maccuɓe adilaaku haa on ngeeɗa nder senaare.

²⁰Yaake on maccuɓe hakke no, on rimɓe no heedi adilaaku.

²¹Ɗume keɓnooɗon bee kuuɗe mon? Fakat on ɗon cemtira ɗe jonta, ngam timmoode kuuɗe man wonno maayde.

²²Ammaa jonta on rimɗinaaɓe diga hakke, on laati maccuɓe Allah. On ɗon mbaŋgina ngeendam senaare e timmoode maajam ɗum ngeendam nduumiiɗam.

²³Ngam ngeenaari hakke, ɗum maayde. Ammaa dokkal Allah kam, ɗum ngeendam nduumiiɗam nder kawtal bee Yeesu Almasiihu, Jawmiraawo meeɗen.