Read Fulfulde Roma'en 7 Bible Online

Roma'en 7 - Fulfulde bible

Roma'en 7

¹Deerɗiraaɓe am, fakat on anndi ko mi yiɗi anndingo on ngam on annduɓe tawreeta. Tawreeta mari baawɗe dow goɗɗo yaake o geeto.

²Bana debbo te'aaɗo: Umroore teegal haɓɓi mo haa goriiko yaake o geeto. Ammaa to gorko maayi, debbo rimɗi e umroore nde'e.

³Ngam maajum, to o wondi bee gorko feere saa'i goriiko geeto, nden kam o jeenoowo. Ammaa to goriiko maayi, o rimɗi diga umroore man, o waɗaay njeenu to o te'i bee gorko feere.

⁴Bana non onon boo, deerɗiraaɓe am: On maaydi bee Almasiihu. Ngam maajum on maayɓe heedi tawreeta. Jonta goɗɗo feere ummitiiɗo diga maayde waato Yeesu Almasiihu mari on ngam haa en mbaawa nafugo Allah bee kuuɗe meeɗen.

⁵Yaake en ɗonno tokko numooji ko'e men, suunooji njaali ɓalli men, nastini en nder hakke. Tawreeta umminno suunooji man, en ngaɗi ko waddani en maayde.

⁶Ammaa jonta, en ndimɗinaama e tawreeta, en maayɓe heedi umroore nde haɓɓi no en. Ngam maajum en kuuwantaa Allah dow laawol ɓooymawol fodde tawreeta. En ɗon kuuwana mo dow laawol kesol fodde Ruuhu maako.

⁷Ko mbi'eten jonta? Tawreeta ɗum hakke na? Naa non sam! Ammaa to tawreeta walaano, mi waawataano anndugo baawɗe hakke. To tawreeta wi'aayno: “Taa suuna”, mi anndaano ɗume woni suuno.

⁸Ammaa umroore man hokki hakke laawol ummingo suunooji koo ɗiye fuu nder am. To walaano umroore, hakke waatanno.

⁹Naane mi geetono, mi anndaano tawreeta. Nden umroore wari, hakke boo fuɗɗi yeeɗugo.

¹⁰Ammaa min mi maayi. Umroore nde hollanno yam laawol ngeendam, waddani yam maayde,

¹¹ngam hakke naftori umroore man haa nde esti yam, nde mbari yam.

¹²Caahiiɗum, tawreeta iwi diga Allah, umrooje maaka boo ɗe ceniiɗe, ɗe pottuɗe, ɗe booɗɗe.

¹³To non kam, huunde woonde waddani yam maayde na? Naa non sam! Ammaa ɗum hakke waddani yam maayde ngam nde huuwtiniri huunde woonde nde'e haa mbarammi, ngam haa hakke waŋga ɗum hakke fakat. Ngam daliila umroore, hakke heɓi waŋgingo halleende mum fuu.

¹⁴Walaa seko, tawreeta iwi haa Ruuhu Allah. Ammaa min mi neɗɗo tampuɗo, mi maccuɗo hakke.

¹⁵Mi faamataa ko kuuwanmi, ngam mi huuwataa ko ngiɗmi, ammaa ko mi yiɗaa, kanjum kuuwanmi.

¹⁶Nde mi ɗon waɗa ko mi yiɗaa, nden kam mi gooŋɗini tawreeta ka mbooɗka.

¹⁷Ngam naa ɗum min waɗata ɗum, ammaa ɗum hakkewol gonŋgol nder am.

¹⁸Mi anndi, booɗɗum walaa nder ɓanndu am ngam mi neɗɗo tampuɗo, mi yiɗi waɗgo ko wooɗi, ammaa mi waawataa.

¹⁹Mi waɗataa booɗɗum ko ngiɗmi, sey kalluɗum ko mi yiɗaa.

²⁰To nii mi ɗon waɗa ko mi yiɗaa, naa ɗum min waɗata ɗum, ammaa ɗum hakkewol gonŋgol nder am.

²¹Ndaa laawol ngol kuuɗe am tokkoto: To mi yiɗi waɗgo ko wooɗi, halleende tan ɗon laato.

²²Nder ɓernde am, mi ɗon seyoro tawreeta Allah.

²³Ammaa baawɗe halleende ɗon kaɓa bee baawɗe am, min mo yerdoto tawreeta Allah nder hakkiilo am. Ɗum wartiri yam naŋngaaɗo baawɗe hakkewol gonŋgol nder terɗe am.

²⁴Kayto mi jurumɗo! Moy rimɗintammi diga ɓillaare ɓanndu maaynanndu ndu'u?

²⁵Ammaa yettoore laatano Allah ngam barka Yeesu Almasiihu, Jawmiraawo men. Nder hakkiilo am, min kam mi maccuɗo tawreeta Allah, asee nder ɓanndu am mi maccuɗo hakke.