Read Fulfulde Roma'en 8 Bible Online

Roma'en 8 - Fulfulde bible

Roma'en 8

¹Ngam maajum walaa kiita dow nuɗɗinɓe Yeesu Almasiihu jonta.

²Ngam baawɗe Ruuhu ndokki yam ngeendam nder kawtal bee Yeesu Almasiihu. Ruuhu man rimɗini yam diga baawɗe hakke e maayde.

³Allah bee hoore mum huuwi ko tawreeta waawaay huuwugo ngam en tampuɓe. O neli Ɓiɗɗo maako marɗo ɓanndu bana ndu neɗɗo, maatuɗo esto hakke bana yimɓe fuu. O hiiti hakke nder ɓanndu neɗɗo oo. Bana nii o ittiri hakke,

⁴ngam haa en mbaawa huuwugo kuuɗe adiliije fodde tawreeta, ngam naa suunooji neɗɗo tokkotooɗen, ammaa Ruuhu Allah.

⁵To goɗɗo ɗon tokko suunooji mum, suunooji man laamanto hakkiilo muuɗum. Ammaa to Ruuhu Allah ɗon jooɗi nder maako, nden kam Ruuhu man laamanto hakkiilo maako.

⁶Tokkaago suunooji mum yahran haa maayde, ammaa tokkaago Ruuhu Allah yahran haa ngeendam e jam.

⁷Tokkiiɗo suunooji mum o konneejo Allah, ngam hakkiilo maako ɗowtantaako umroore Allah ngam ngo waawataa.

⁸Geeɗanɗo nder suunooji mum waawataa fottango Allah.

⁹Ammaa onon kam, on ngonaay nder suunooji mon ammaa on ɗon nder Ruuhu Allah, to fakat Ruuhu man ɗon jooɗi nder mooɗon. Mo walaa Ruuhu Almasiihu, o laataaki mo Almasiihu.

¹⁰Ammaa to Almasiihu ɗon nder mooɗon, nden kam ɓalli mon maayan ngam daliila hakke, Ruuhu Allah hokkan on ngeendam, ngam Allah adilini on.

¹¹To Ruuhu maako ɗon jooɗi nder mooɗon, nden kam Allah ummitinɗo Almasiihu diga maayde yeeɗitinan boo ɓalli mon maayanɗi bee Ruuhu man.

¹²Ngam maajum deerɗiraaɓe am, walaa ko doolata en tokkaago suunooji meeɗen fahin.

¹³Ngam to on tokkake suunooji mon, on maayan. Ammaa to on acci Ruuhu Allah mbara suunooji mon, nden kam on ngeeɗan,

¹⁴ngam ɗowaaɓe Ruuhu Allah fuu ngoni ɓiɓɓe Allah.

¹⁵Ngam Ruuhu Ceniiɗo mo on keɓi nastinaay on nder maccuŋgaaku haa on kula fahin. Aa'a! Ruuhu man laatini en ɓiɓɓe Allah, duŋani en ewnaago Allah: “Baaba!”

¹⁶Ruuhu Allah bee hoore mum ɗon seedano ruuhuuji men: En ɓiɓɓe Allah fakat.

¹⁷To nii en ɓiɓɓe maako, nden kam en keɓan boo ko o sigani ɓiɓɓe maako, en keɓdan ɗum bee Almasiihu. To en njaɓi geɗal torraaji Almasiihu, en keɓan geɗal tedduŋgal maako boo.

¹⁸Mi numi haala torraaji men nder zamanuuru jontaaru. Fakat, ɗi potaay foondeego bee tedduŋgal garanŋgal ngal Allah waŋginanta en.

¹⁹Tagefo fuu ɗon yenwa masin haa Allah waŋgina ɓiɓɓe mum bee tedduŋgal.

²⁰Ngam tagefo fuu nastinaama les baawɗe majjere, naa kaŋgo yiɗi ɗum, ammaa Allah hoddirani ngo bana nii. Bee man fuu o hokki ngo tammunde

²¹rimɗugo e njeyaaŋgu halkere, ngo hawta bee ɓiɓɓe maako nder ndimu e tedduŋgal.[3]

²²En anndi haa jonta duniyaaru fuu ɗon uuma, ɗon nder luuwe bana ɓesnanɗo.

²³Naa duniyaaru tan, koo enen heɓɓe dokkal Allah aartuŋgal waato Ruuhu mum, en ɗon uumo. En ɗon ngenwa wondugo bee Allah, haa o timmidina laatingo en ɓiɓɓe maako waato o sootta ɓalli men.

²⁴Kisndam men ɗon tabiti dow tammunde nde'e. Ammaa to en ɗon ngi'a ko tammotooɗen heɓugo, nden kam naa ɗum tammunde gooŋgaare. Moy tammoto hayru mo o heɓi?

²⁵Ammaa to en ɗon tammo heɓugo ko en ngi'aay tawon, nden kam en ndeenan ɗum bee munyal.

²⁶Non boo Ruuhu Allah ɗon walla en, ngam en tampuɓe. En anndaa koo toraago Allah bana no haani. Ammaa Ruuhu bee hoore mum ɗon torano en bee tornde nde nanataake.

²⁷Allah linyoowo ɓerɗe ɗon faama ko Ruuhu ɗaɓɓata. Ngam Ruuhu ɗon torano yimɓe Allah senaaɓe fodde ko Allah yiɗi.

²⁸En anndi, Allah ɗon huuwtinira kuuje fuu ngam hayru yiɗɓe mo, ewnaaɓe fodde muuyo muuɗum.

²⁹Ngam diga ɓooyma Allah anndi ɓe, suɓi ɓe ngam haa ɓe ngona bana Ɓiɗɗo maako, Almasiihu boo laato afo caka deerɗiraaɓe ɗuuɗɓe.

³⁰Suɓaaɓe ɓe'e fuu, Allah ewni ɓe boo. Nden o adilini ɓe, o nastini ɓe nder tedduŋgal maako.

³¹Jonta kam, ko lutti wi'eego dow bolle ɗe'e? Nde Allah ɗon wondi bee meeɗen, moy waawata honugo en?

³²O jogitaaki koo Ɓiɗɗo maako, ammaa o acci mo o maayi mbattudi[4] meeɗen en fuu. To non kam, o saahataa en koo ɗume fuu bee maako na?

³³Moy foti wullaago suɓaaɓe Allah? Ngam Allah bee hoore mum adilini ɓe.

³⁴Moy foti hiitaago ɓe? Ngam Yeesu Almasiihu maayi mbattudi maɓɓe. Ko ɓuri ɗum boo, o ummiti diga maayde, o ɗon jooɗi haa nyaamo Allah, o ɗon seetto en.

³⁵To non kam, moy waawata senndugo en bee yiide Almasiihu? Bone na, ɓillaare na, toonyaare na, weelo[5] na, talakaaku na, joote na malla kaafahi?

³⁶Bana ko winnda: “Ngam daliila maaɗa, ɓe ɗon mbara min nyalawmaare fuu, ɓe ɗon ndaara min bana baali kirseteeɗi.”

³⁷Ammaa nder kuuje ɗe'e fuu en keɓan jaalorgal timmuŋgal bee ballal Almasiihu, giɗɗo en.

³⁸Ngam mi anndi fakat, walaa ko senndata en bee yiide maako, koo maayde, koo ngeendam, koo malaa'ika'en, koo baawɗeeji goɗɗi, koo jontaajum, koo garanɗum, koo baawɗe

³⁹nder asama malla nder jahannama malla koo ɗume. Yiide Allah laatani en bee Yeesu Almasiihu, Jawmiraawo men. Ngam maajum walaa koo ɗume nder duniyaaru fuu heɓata senndugo en bee yiide Allah.