Read Fulfulde 1 Korintu'en 1 Bible Online

1 Korintu'en 1 - Fulfulde bible

1 Korintu'en 1

¹Min Pol mo Allah ewni fodde muuyo mum ngam laataago nelaaɗo Almasiihu Yeesu, min bee Sostenes, deerɗiraawo meeɗen,

²mi ɗon winndana on, onon jama'aare yimɓe Allah wonɓe haa Korintu, senaaɓe nder Almasiihu Yeesu, ewnaaɓe ngam laataago seniiɓe hawtaade bee ewnotooɓe innde Jawmiraawo meeɗen Yeesu Almasiihu haa ɓe ngonata fuu, kaŋko woni Jawmiraawo maɓɓe e mo amin:

³Allah Baabiraawo meeɗen e Yeesu Almasiihu Jawmiraawo meeɗen ndokka on mo'ere e salaaman.

⁴Mi ɗon yetta Allah am foroy ngam daliila mo'ere nde o hokki on barka Almasiihu Yeesu.

⁵Nder kawtal bee Almasiihu, Allah hebbini on bee barkaaji fuu. Wolde e anndal fanti haa mooɗon.

⁶Bana nii Allah gooŋɗini ko min ceedani Yeesu Almasiihu caka mooɗon.

⁷Nden kam walaa dokkal Allah koo gootal ŋakkani on, onon reenanɓe nyalaade baŋguki Jawmiraawo meeɗen Yeesu Almasiihu.

⁸Kaŋko o tabitinan on haa yotto timmoode, ngam haa laatooɗon bilaa feloore nyalaade Jawmiraawo meeɗen Yeesu Almasiihu.

⁹Allah o koolniiɗo, kaŋko ewni on haa kawton bee Ɓiɗɗo mum Yeesu Almasiihu, Jawmiraawo meeɗen.

¹⁰Deerɗiraaɓe am, mi ɗon suusɗina on bee innde Jawmiraawo meeɗen Yeesu Almasiihu: Njooɗe on narruɓe! Taa cenndol wona caka mooɗon. Laate narruɓe dow hakkiilo wooto e anniya ngoota.

¹¹Deerɗiraaɓe am, yimɓe saare Kolowe anndini yam jokkirli ɗon hakkunde mooɗon.

¹²Ndaa ko ngiɗmi wi'go: Caka mooɗon koo moy ɗon wi'a: “Min mo Pol.” Oya ɗon wi'a: “Min mo Apollos.” Goɗɗo ɗon wi'a: “Min mo Piyer.” Goɗɗo feere boo ɗon wi'a: “Min mo Almasiihu.”

¹³Kadi Almasiihu o cenndaaɗo na? Ɗum Pol ɓe ngaafi dow leggal gaafaaŋgal ngam mooɗon na? Malla bee innde Pol keɓɗon baptisma?

¹⁴Mi ɗon yetta Allah ngam mi yiiwaay koo gooto mooɗon baptisma, sey Kirispus e Gayus.

¹⁵Bana non kadi walaa bi'anɗo on keɓi baptisma bee innde am.

¹⁶Asee! Mi waɗani boo yimɓe saare Estefanas baptisma. Mi anndaa to woodi goɗɗo feere mo mi waɗani ɗum baptisma.

¹⁷Ngam Almasiihu nelaay yam waɗugo baptisma, ammaa ngam mi waazina Linjiila. Mi waazinaay ka bee bolle fodde hikma duniyaaru ndu'u, ngam taa gaafaaŋgal Almasiihu lasbine.

¹⁸Halkanɓe ɗon ndaara kubar maayde Almasiihu dow leggal gaafaaŋgal bana faataare. Ammaa ngam meeɗen enen hisanɓe kam, en anndi ɗum baawɗe Allah.

¹⁹Ngam man Deftere wi'i: “Mi halkan hikma hikma'en, mi wudinan anndal annduɓe.”

²⁰Kadi moy woni hikmaajo? Moy woni moodibbo? Moy woni kujjotiroowo zamanuuru ndu'u? Allah wartiraay hikma duniyaaru ndu'u faataare na?

²¹Ngam nde nii duniyaaru bee hikma mum anndaa Allah ngam ndu annditaay hikma maako, Allah ɗon seyori hisnugo nuɗɗinɓe bee waazingo ko hikma'en duniyaaru mbi'ata faataare.

²²Yahuudu'en ɗon ɗaɓɓa kaayeefiiji, Yunaniŋke'en[1] boo ɗon ɗaɓɓita ko wi'ete hikma.

²³Ammaa enen en ɗon ngeyna kubar Almasiihu ɓilaaɗo haa leggal gaafaaŋgal. Haa Yahuudu'en ɗum laatake daliila fergere maɓɓe, haa ummaatooje goɗɗe boo ɗum laatanake ɓe faataare.

²⁴Ammaa ngam ewnaaɓe Allah kam, koo ɓe Yahuudu'en koo ɓe Yunaniŋke'en woɗɓe, Almasiihu laati baawɗe Allah e hikma Allah.

²⁵Ko Allah huuwata, ɗum nanndi bee faataare, ammaa ɗum ɓuri anndal yimɓe fuu. Ɗum nanndi bee tampere boo, ammaa ɗum ɓuri yimɓe fuu semmbe.

²⁶Deerɗiraaɓe am, ndaare ko'e mooɗon, onon ewnaaɓe Allah! Fodde ɗabiya duniyaaru, hikma'en ɗuuɗaay caka mooɗon, marɓe baawɗe ɗuuɗaay, tedda-asli'en boo ɗuuɗaay.

²⁷Ammaa ko laati humakiijum nder duniyaaru, Allah suɓi ɗum haa hikma'en cemta. Allah suɓi ko laati tampuɗum nder duniyaaru haa semmbiɗɓe cemta.

²⁸O suɓi leesɓe e yawniiɓe e meere'en nder duniyaaru, ngam haa o meeriɗina tedduɓe duniyaaru.

²⁹Bana nii walaa koo moye mantoto yeeso Allah.

³⁰Daliila maako, onon on kawti bee Yeesu Almasiihu, laatiiɗo hikma meeɗen iwka haa Allah. Bee maako en keɓi adilaaku e senaare e ndimu.

³¹Allah muuyi ɗum laato bana ko winnda: “To goɗɗo yiɗi mantaago, sey o mantoro kuugal Allah.”