Read Fulfulde 1 Korintu'en 10 Bible Online

1 Korintu'en 10 - Fulfulde bible

1 Korintu'en 10

¹Deerɗiraaɓe am, mi yiɗi on ciftora ko laatani kaakiraaɓe meeɗen. Ɓe fuu maɓɓe ɗowdi ruuldere faddi ɓe. Ɓe fuu ɓe eeri maayo Maaliya.

²Nder kawtal maɓɓe bee Muusa, ɓe mbaɗanaama baptisma nder ruuldere e nder maayo.

³Ɓe fuu ɓe nyaami nyaamdu wooru iwndu haa Allah.

⁴Ɓe fuu ɓe njari njaram ngootam iwɗam haa Allah. Ɓe njari haa tapaare iwnde haa Allah, yahdunoonde bee maɓɓe. Kayre woni Almasiihu.

⁵Bee non fuu, Allah yerdaaki ɓurna maɓɓe. O maayni ɓe nder ladde.

⁶Kuuje ɗe'e ɗon kolla en misaalu, ngam taa en tokko suunooji kalluɗi bana ɓe tokkori.

⁷Taa ndewe labbi bana woɗɓe maɓɓe. Deftere wi'i: “Yimɓe njooɗi ngam nyaamugo e yarugo. Nden ɓe ummi haa ɓe pija.”

⁸Taa mbaɗen daakaareeku bana woɗɓe maɓɓe mbaɗno, nden ujine noogas e tato (23.000) maayi nder nyalaade woore.

⁹Taa poonden Almasiihu bana woɗɓe maɓɓe, kamɓe ɓe maayi ngam boɗɗe ŋati ɓe.

¹⁰Taa ngurŋgurte bana woɗɓe maɓɓe, nden malaa'ikaajo maayde halkidi ɓe.

¹¹Masiibooji ɗi'i fuu ngarani ɓe ngam faamtingo woɗɓe. Ɗi mbinndaama ngam reentingo en enen yeeɗanɓe haa timmoode zamanuuji.

¹²Ngam maajum, tammiiɗo o ɗon dari fuu, sey o hakkila ngam taa o do'o.

¹³Jarribooje keɓɗe on fuu, kanje keɓata woɗɓe. Ammaa Allah o koolniiɗo, o accataa on njarribe haa ɓura semmbe mooɗon. Yaake jarribeeki warani on, o hokkan on dabare hisugo, ngam haa on keɓa semmbe munyango ɗum.

¹⁴Ngam maajum, soobiraaɓe am, ndaaye cujidanki labbi.

¹⁵Mi ɗon wolwana on bana marɓe hakkiilo, nume ko mbi'anmi.

¹⁶Ciftore jardugel kiirtaari ngel ngetteten Allah ngam muuɗum. Naa ngel ɗon hawta en bee ƴiiƴam Almasiihu yaake njareten na? Ciftore tamseere nde cenndeten boo. Naa nde ɗon hawta en bee ɓanndu Almasiihu yaake nyaameten na?

¹⁷Woodi tamseere woore tan. Ngam maajum, koo to en ɗuuɗɓe, en laati ɓanndu wooru, ngam en fuu en ɗon kawta nyaamugo tamseere woore.

¹⁸Ndaare Isra'iila'en: Nyaamanɓe kusel dabbaaji kirsaaɗi dow hirsirde ngoodi kawtal bee Allah.

¹⁹Mi yiɗi wi'go kusel ndabbaawa kirsanaaŋga lawru woodi saman na? Malla lawru woodi saman? Naa non sam!

²⁰Ammaa mi yiɗi wi'go ko rewooɓe labbi kirsata, ɓe ɗon lii'ano ginnaaji, naa haa Allah. Mi yiɗaa boo on mara kawtal bee ginnaaji.

²¹On mbaawataa yarugo nder jardugel Jawmiraawo e nder jardugel ginnaaji boo. On mbaawataa nyaamugo haa kiirtaari Jawmiraawo, nden on nyaama haa taabal ginnaaji boo.

²²Malla en ngiɗi ummingo kaajal Jawmiraawo na? En ɓuran mo semmbe na?

²³Woɗɓe mooɗon ɗon mbi'a: “Koo ɗume fuu dagake.” Ooho, ammaa naa kuuje fuu nafata on. Koo ɗume fuu dagake, ammaa naa ɗume fuu mawninta nuɗɗinki goɗɗo.

²⁴Taa goɗɗo suklano ko nafata hoore mum tan, ammaa ko nafata yimɓe woɗɓe.

²⁵Ko soorrete haa luumo fuu, nyaame bee numo ɓernde laaɓŋgo, walaa haaje ƴamgo haa toy ɗum iwi.

²⁶Ngam deftere wi'i: “Jawmiraawo mari lesdi e ko hebbini ndi fuu.”

²⁷To goɗɗo mo nuɗɗinaay ewnake on ngam nyaamdu haa saare mum, to on njaɓi ewnaandu maako, nden kam nyaame bee numo ɓernde laaɓŋgo ko o jo'inanta on fuu walaa haaje ƴamgo haa toy ɗum iwi.

²⁸Ammaa to goɗɗo wi'i on: “Kusel nge'el iwi haa ndabbaawa kirsanaaŋga labbi”, nden kam taa nyaame ngel, ngam daliila anndinɗo on ɗum, non boo ngam daliila numo ɓernde.

²⁹Mi wi'aay dow numooji ɓerɗe mooɗon, ammaa dow numo ɓernde oya man. Fakat, numo ɓernde goɗɗo fotaay hiitaago ndimu am.

³⁰To mi yetti Allah ngam nyaamdu am, koni goɗɗo hallintammi ngam daliila nyaamdu ndu ngettumi Allah dow mum?

³¹Ngam maajum, to on ɗon nyaama malla to on ɗon njara malla koo ɗume ko mbaɗoton, mbaɗe ɗum fuu ngam tedduŋgal Allah.

³²Taa laate daliila fergere koo moy nder hakke, koo Yahuudu'en, koo Yunaniŋke'en[5], koo jama'aare yimɓe Allah.

³³Mbaɗe bana mbaɗanmi. Mi ɗon tiino haa koo moy yerdammi nder koo ɗume fuu. Mi ɗaɓɓitittaa ko nafatammi, mi ɗon ɗaɓɓa ko nafata yimɓe ɗuuɗɓe, ngam haa ɓe kisa.