Read Fulfulde 1 Korintu'en 12 Bible Online

1 Korintu'en 12 - Fulfulde bible

1 Korintu'en 12

¹Ko laarani haala dokke ɗe Ruuhu Ceniiɗo hokkata, deerɗiraaɓe am, mi yiɗaa on ngona nder kumpa.

²Yaake on tampa-diina'en, al'aada mooɗon yerɓi on haa labbi muukaaji.

³Ngam maajum mi yiɗi on paama ɗu'um: Walaa mo Ruuhu Allah ɗowata ɗum nden wi'a: “Yeesu o naalaaɗo!” Bana non boo mo Ruuhu ɗowaay ɗum waawataa wi'go: “Yeesu woni Jawmiraawo”.

⁴Woodi dokke feere feereeje, ammaa Ruuhu gooto tan hokkata ɗe fuu.

⁵Woodi kuuɗe feere feereeje, ammaa Jawmiraawo gooto en kuuwanta.

⁶Woodi boo baawɗe feere feereeje ngam huuwugo, ammaa Allah gooto tan waɗata ɗum fuu nder yimɓe fuu.

⁷Dokkal Ruuhu Allah ɗon waŋga nder koo moy meeɗen ngam haa ngal nafa jama'aare fuu.

⁸Goɗɗo feere Ruuhu ɗon hokka ɗum dokkal wolwugo bee hikma, goɗɗo boo ɗon heɓa diga Ruuhu man dokkal wolwugo bee anndal.

⁹Goɗɗo feere Ruuhu man ɗon hokka mo nuɗɗinki cemmbiɗki, goɗɗo boo ɗon heɓa diga Ruuhu man baawal yamɗitingo.

¹⁰Ruuhu ɗon hokka oo baawal waɗugo kaayeefiiji, oya boo dokkal waɗugo annabaaku. O ɗon hokka goɗɗo feere dokkal senndindirgo hakkunde ko iwata diga Ruuhu Allah bee ko iwata diga ruuhuuji goɗɗi. O ɗon hokka oo dokkal wolwugo bee ɗemɗe ɗe anndaaka, oya boo dokkal fassitirgo ɗe.

¹¹Ammaa ɗum fuu, Ruuhu gooto tan waɗata ɗum feere mum. O ɗon yeɗa koo moy baawal mum fodde muuyo maako.

¹²Ɓanndu wooru mari terɗe feere feereeje ɗuuɗɗe. Terɗe ɗe'e fuu ɗon kawti haa ɓanndu wooru man. Non Almasiihu laatori boo.

¹³Ngam enen fuu, koo Yahuudu'en, koo iwɓe haa ummaatooje goɗɗe, koo maccuɓe, koo rimɓe, en keɓi baptisma nder Ruuhu gooto ngam hawtango ɓanndu wooru. En fuu en laati yarnaaɓe Ruuhu gooto oo.

¹⁴Ɓanndu kam maraay tergal gootal tan, ammaa terɗe ɗuuɗɗe.

¹⁵To kosŋgal wi'anno: “Mi laataaki juŋngo, ngam man mi hawtanaay ɓanndu.” Bee non fuu ɗum haɗataa ngal laataago tergal haa ɓanndu.

¹⁶Malla nofru to wi'anno: “Naa mi yiitere, ngam maajum mi hawtanaay ɓanndu.” Fakat, ɗum haɗataa ndu laataago tergal haa ɓanndu.

¹⁷To ɓanndu fuu laatakeno yiitere, noy ndu nanirta? To ndu laatake nofru tan, noy ndu luuɓnirta?

¹⁸Fakat, Allah waɗi tergal koo ngale haa ɓanndu fodde muuyo mum.

¹⁹To terɗe fuu laatakeno tergal gootal, nden kam naa ɗum ɓanndu fahin.

²⁰Ngam maajum kadi woodi terɗe ɗuuɗɗe, ammaa ɓanndu kam wooru tan.

²¹Yiitere fotaay wi'go juŋngo: “Mi walaa haaje ma.” Hoore boo fotaay wi'go kosɗe: “Mi walaa haaje mon.”

²²Ko ɓuri non fahin, terɗe ɓanndu ɗe ndaareten bana tampuɗe, kanje ɓuri nafuuda.

²³Terɗe ɗe saman maaje ɗuuɗaay, kanje ɓurɗen hakkilango. Terɗe ɗe cemtirten, kanje ɓurɗen suklanaago masin.

²⁴Terɗe ɓuranɗe fottango en, ngalaa haaje suklaneego. Allah waɗi ɓanndu haa ko woni leesɗum haa maaru fuu heɓa samɗineego ko ɓura.

²⁵Nden kadi walaa cenndol hakkunde terɗe haa ɓanndu, ammaa sey terɗe fuu njiŋngindira hakkunde muuɗum'en.

²⁶To tergal gootal ɗon naawa, terɗe fuu maatan naawreeŋga bee maagal. To gootal teddinaama, goɗɗe fuu ceyodoto bee maagal boo.

²⁷On fuu on laati ɓanndu Almasiihu, koo moy mooɗon laati tergal haa maaru.

²⁸Allah hokki koo moy joonde mum nder jama'aare: Aran nelaaɓe, ɗiɗawre annabi'en e tataɓre boo ekkitinooɓe. Ɓaawo maajum boo waɗooɓe kaayeefiiji e waawɓe yamɗitingo e wallooɓe e ɗowooɓe e wolwooɓe bee ɗemɗe ɗe anndaaka.

²⁹Ɓe fuu ɓe nelaaɓe na? Ɓe fuu ɓe annabi'en na? Ɓe fuu ɓe ekkitinooɓe na? Ɓe fuu ɓe waɗooɓe kaayeefiiji na?

³⁰Ɓe fuu ɓe yamɗitinooɓe na? Ɓe fuu ɓe wolwooɓe bee ɗemɗe ɗe anndaaka na? Ɓe fuu ɓe fassitirooɓe ɗemɗe na? Aa'a!

³¹Ngele dokke ɓuranɗe saman. Jonta mi sappinan on ko ɓurata dokke ɗe'e fuu wooɗugo.