Read Fulfulde 1 Korintu'en 3 Bible Online

1 Korintu'en 3 - Fulfulde bible

1 Korintu'en 3

¹Deerɗiraaɓe am, mi waawaay wolwango on bana heɓɓe Ruuhu Allah. Ammaa mi wolwani on bana tokkiiɓe ɗabiya yimɓe duniyaaru, bana ɓikkoy pamaroy nder Almasiihu.

²Ngam ɗum kosam ndokkumi on, naa nyaamdu semmbiɗndu. Ngam on ke'aay nyaamugo ndu. Haa jonta boo on ke'aay nyaamugo ndu,

³ngam on ɗon tokko ɗabiya yimɓe duniyaaru. Ngam to on ɗon kaajindira, on ɗon njokkira, on ngonaay nder ɗabiya yimɓe duniyaaru na? Naa on ɗon mbaɗa ko yimɓe woɗɓe mbaɗata na?

⁴To goɗɗo wi'i: “Min mo Pol”, goɗɗo feere boo: “Min mo Apollos”, naa on ɗon mbaɗa ko yimɓe woɗɓe mbaɗata na?

⁵Kadi moy woni Apollos? Moy woni Pol? Minin min huuwanooɓe Allah, on nuɗɗini Allah daliila waazu amin. Allah halfini koo moy amin kuugal mum.

⁶Min mi jubi, Apollos yarni, ammaa Allah mawnini ɗum.

⁷Bana non kadi, mo jubi bee mo yarni laataaki koo ɗume, sey Allah mawninoowo ko juba tan mari saman.

⁸Mo jubi bee mo yarni poti kal-kal. Ammaa koo moy heɓan mbarjaari mum fodde kuugal mum.

⁹Minin min huuwdiɗɗiraaɓe nder kuugal Allah, onon boo on ngesa Allah, on nyiɓaalo Allah.

¹⁰Fodde mo'ere nde Allah mo'ani yam, bana mahoowo kakkilɗo, mi wallini caɓɓawal. Goɗɗo feere ɗon maha dow maagal. Ammaa sey koo moy hakkilana no o mahrata.

¹¹Yeesu Almasiihu woni caɓɓawal. Walaa ballinanɗo goɗŋgal.

¹²To goɗɗo mahi dow maagal bee kaŋŋeeri malla cardi malla kaa'e marɗe saman, bee leɗɗe malla geene malla ƴommbe,

¹³kuugal koo moy fuu waŋgoyan. Nyalaade kiita waŋginan ɗum. Ɗum waŋgoyan nder yiite e yiite waŋginan no kuugal koo moy wa'i.

¹⁴To yiite nyaamaay ko goɗɗo mahi, o heɓan mbarjaari.

¹⁵To yiite nyaami ko goɗɗo mahi, nden kam o waɗi asar. Ammaa o hisan bee daker bana caaliiɗo yiite.

¹⁶On anndaa onon ngoni haykaliiru Allah e Ruuhu Allah ɗon jooɗi nder mooɗon na?

¹⁷To goɗɗo wili haykaliiru Allah, Allah halkan mo. Ngam haykaliiru Allah ndu seniindu, ɗum onon bee ko'e mooɗon ngoni haykaliiru man.

¹⁸Taa goɗɗo esta hoore muuɗum. To goɗɗo mooɗon numi o hikmaajo fodde no zamanuuru ndu'u wa'i, sey o warta paataaɗo, ngam haa o laato hikmaajo fakat.

¹⁹Ngam hikma duniyaaru ndu'u, ɗum faataare haa Allah. Ngam Deftere wi'i: “Allah ɗon naŋnga hikma'en nder tuuforgol dabareeji maɓɓe.”

²⁰Nde wi'i fahin boo: “Jawmiraawo anndi numooji hikma'en, ɗi meereeji.”

²¹Ngam man taa goɗɗo tabitina teddinki mum dow manoore yimɓe. Ngam koo ɗume fuu onon mari.

²²Koo Pol, koo Apollos, koo Piyer, koo duniyaaru, koo ngeendam, koo maayde, koo jontaajum, koo garanɗum. Koo ɗume fuu onon mari.

²³Ammaa onon kam, Almasiihu mari on, Almasiihu boo, Allah mari ɗum.