Read Fulfulde 1 Korintu'en 7 Bible Online

1 Korintu'en 7 - Fulfulde bible

1 Korintu'en 7

¹Jonta kam haa mi jaabo ƴamɗe ɗe mbinnduɗon nder bataakewol mooɗon. Ɗum booɗɗum to gorko ɓaŋgaay sam.

²Ammaa ngam taa on laato daakaare'en, ndikka gorko fuu mara debbo muuɗum, debbo fuu boo mara gorko mum.

³Gorko waɗana debbo muuɗum ko haani waɗeego, debbo boo waɗana gorum non.

⁴Debbo maraay baawɗe dow ɓanndu mum, goriiko mari ndu. Non boo gorko maraay baawɗe dow ɓanndu mum, ɗum debbo maako mari ndu.

⁵Taa calotire baaldal, sonaa to on narri dow maajum deydey wakkati seɗɗa ngam do'aare. Ɓaawoɗon fahin kawte, ngam taa on acca naŋgtaago, nden Sayɗaanu boo heɓa estugo on.

⁶Ko mbi'mi ɗo laataaki bana umroore, ammaa bana duŋayeere.

⁷Min kam mi ɓuri yiɗugo yimɓe fuu ngona bana am. Ammaa Allah hokki koo moy dokkal mum, oo bana nii, oya bana non.

⁸Mi ɗon wi'a ɓen ɓaŋgaay e rewɓe yurumɓe: Ɗum pottoɗum ɓe njooɗo bana am.

⁹Ammaa to ɓe mbaawataa naŋgtaago, sey ɓe ɓaŋga. Ndikka ɓaŋgo dow suuno ɓilla ɓe.

¹⁰Ngam ɓaŋgɓe e ɓaŋgaaɓe, ndaa ko mi umrata ɓe — naa min umrata ɓe, ammaa ɗum Jawmiraawo umrata ɓe: Taa debbo senndira bee gorum.

¹¹To o senndiri bee goriiko, sey o jooɗo bilaa te'rugo bee gorko feere, to naa non o narrita bee goriiko fahin. Taa gorko boo seera debbo muuɗum.

¹²Haa woɗɓe boo, naa Jawmiraawo wi'ata, ɗum min wi'ata: To deerɗiraawo feere woodi debbo mo nuɗɗinaay, nden debbo oo yerdi jooɗodaago bee maako, taa o seera mo.

¹³Nonnon boo deerɗiraawo debbo mo gorum nuɗɗinaay. To gorko oo yerdi jooɗodaago bee maako, taa debbo senndira bee maako.

¹⁴Ngam gorko mo nuɗɗinaay heɓi yerduye Allah daliila debbo mum Masiihiŋkeejo. Non boo debbo mo nuɗɗinaay heɓi yerduye Allah daliila gorum Masiihiŋkeejo. To naa non, ɓikkoy mooɗon boo koy coɓkoy, asee boo koy keɓi yerduye Allah.

¹⁵Ammaa to mo nuɗɗinaay yiɗi senndirgo bee nuɗɗinɗo, njoofe mo. Nden kam deerɗiraawo gorko malla debbo rimɗi e teegal mum. Allah ewni on haa njooɗoɗon nder salaaman.

¹⁶An debbo, a waawan hisnugo gorko ma fakat na? Malla an gorko, a waawan hisnugo debbo ma fakat na?

¹⁷Sey koo moy tokko jooɗaago bana no Allah heerorani mo. O jooɗo bana no o wa'no yaake Allah ewni mo. Kanjum umranmi nder jama'aaje nuɗɗinɓe fuu.

¹⁸To goɗɗo laatakeno juulniiɗo saa'i Allah ewni mo, taa o tefa wartugo saadooniijo. To goɗɗo juulnaakino saa'i Allah ewni mo, taa o juulno.

¹⁹Ngam juulnol[4] e sooynde juulnol fuu nafataa koo ɗume, sey ɗowtanaago umrooje Allah tan mari saman.

²⁰Sey koo moy jooɗo bana o wa'no yaake Allah ewno mo.

²¹To a maccuɗono yaake Allah ewno ma, taa ɗum sakle. Ammaa to heɓoto a rimɗina hoore ma, naftora ɗum.

²²Laatinooɗo maccuɗo mo Jawmiraawo ewni ɗum, laatake dimɗinaaɗo ngam Jawmiraawo. Bana non boo dimo mo Jawmiraawo ewni ɗum, laatake maccuɗo Jawmiraawo.

²³Jawmiraawo sootti on bee saman. Ngam maajum taa ngartire ko'e mooɗon maccuɓe yimɓe.

²⁴Deerɗiraaɓe am, sey koo moy mooɗon jooɗo yeeso Allah bana no o wa'no yaake Allah ewni mo.

²⁵Ngam ɓen ɓaŋgaakaa, mi walaa umroore diga Jawmiraawo. Ammaa mi wi'an ko numanmi bana goɗɗo mo Jawmiraawo mo'ani ɗum, laatini ɗum koolniiɗo.

²⁶Ngam daliila ɓillaaje jontaaje ɗe'e, mi ɗon numa: Ndikka koo moy tokko jooɗaago bana no o wa'i jonta.

²⁷To a woodi debbo, taa ɗaɓɓu seerugo mo. To a walaa debbo, taa ɗaɓɓu te'ugo.

²⁸To nii a ɓaŋgi, a waɗaay hakke. Paanyo boo, to te'aama, waɗaay hakke. Ammaa ɓaŋgɓe e ɓaŋgaaɓe maran ɓillaaje nder zamanuuru ndu'u. Kanjum ngiɗmi hoynango on.

²⁹Deerɗiraaɓe am, ndaa ko ngiɗmi anndingo on: Wakkati rammiti. Diga jonta, sey ɓaŋgɓe njooɗo bana ɓe ngalaano rewɓe.

³⁰Woyanɓe laato bana ɓe ngonaayno nder mettamɓeram. Seyotooɓe laato bana ɓe ngonaayno nder seyo. Soodanɓe kuuje boo ndaara bana walaa ko ɓe marno.

³¹Naftortooɓe duniyaaru boo, taa ndaara bana woodi ko ɓe naftori bee gooŋga. Ngam duniyaaru bana ndu wa'i jonta ni'i, ndu jinnan.

³²Mi yiɗi on laato rimɓe e saklere fuu. Mo ɓaŋgaay ɗon suklano kuugal Jawmiraawo, o ɗon tefa fottango Jawmiraawo.

³³Ammaa ɓaŋɗo ɗon suklano kuuje duniyaaru, o ɗon tefa fottango debbo maako.

³⁴Bana nii ɓernde maako senndake ɗiɗi. Non boo debbo mo walaa gorko e paanyo. Ɓe ɗon cuklano kuugal Jawmiraawo, haa ɓe laato seniiɓe nder ɓanndu e ruuhu fuu. Ammaa ɓaŋaaɗo ɗon suklano kuuje duniyaaru, o ɗon tefa fottango goriiko.

³⁵Mi ɗon wi'a ɗum ngam wallugo on. Mi doolaay on, mi yiɗi on mbaɗa ko fotti, on ɗakkotira bee Jawmiraawo bee ɓernde woore.

³⁶Teema goɗɗo narran bee muuyaaɗo mum taa ɓe ɓaŋgra. Ammaa to muuyaaɗo oo heewti e to suuno boo ɓuri gorko oo, o numi kadi ndikka ɓe ɓaŋgra, sey ɓe ɓaŋgra. O waɗaay hakke.

³⁷Ammaa mo waɗi anniya nder ɓernde mum, walaa ko dooli ɗum, suuno boo to ɓillaay ɗum, nden kam o jogito anniya ka'a, taa o ɓaŋga muuyaaɗo maako. Ɗum booɗɗum to o waɗi bana nii.

³⁸Ɓaŋɗo muuyaaɗo mum waɗi booɗɗum, ammaa mo ɓaŋgaay muuyaaɗo muuɗum, waɗi ko ɓuri wooɗugo.

³⁹Debbo ɓaŋaaɗo laati kaɓɓaaɗo haa gorum yaake gorko man ɗon bee yoŋki. To gorko maayi, debbo rimɗi, o ɓaŋgan bee mo o yiɗi, ammaa sey o ɓaŋgra bee gorko Masiihiŋkeejo.

⁴⁰Mi ɗon numa o ɓuran seyaago masin to o jooɗake bilaa gorko. Anndite, min boo mi woodi Ruuhu Allah.