Read Fulfulde 1 Korintu'en 8 Bible Online

1 Korintu'en 8 - Fulfulde bible

1 Korintu'en 8

¹Dow ko laarani kusel dabbaaji kirsanaaɗi labbi, fakat: “En fuu en ngoodi anndal.” Ammaa anndal waddan mawnitaare. Yiide tan semmbiɗinta goɗɗo.

²To goɗɗo tammake o mari anndal, nden kam o heɓaay anndal gooŋgawal tawon.

³Ammaa mo yiɗi Allah, Allah anndi ɗum.

⁴Goɗɗo nyaaman kusel ndabbaawa kirsanaaŋga labbi na? En anndi lawru naa ɗum huunde gooŋga nder duniyaaru ndu'u e walaa ɗowanteeɗo feere boo, sey Allah gooto.

⁵Fakat woodi ko yimɓe mbi'ata ɗowanteeɓe haa asama e dow lesdi. Ngam maɓɓe kam, woodi ɗowanteeɓe e jawmiraaɓe ɗuuɗɓe.

⁶Bee non fuu, ngam meeɗen kam woodi Allah gooto tan, Baabiraawo, mo tagi kuuje fuu, daliila maako boo ngeeɗeten. Non boo Jawmiraawo gooto tan, Yeesu Almasiihu. Diga maako kuuje fuu iwi, enen boo, diga maako iwɗen.

⁷Ammaa naa yimɓe fuu mari anndal nga'al. Woɗɓe nde mboowino bee haala labbi go, koo jonta to ɓe ɗon nyaama kusel ndabbaawa li'anaaŋga lawru, ɓe ɗon ndaara ngel bana fakat ngel lawru. Numooji ɓerɗe maɓɓe tampi, ɓe ɗon numa bana nyaamugo ngel ɗon soɓna ɓe.

⁸Fakat, naa nyaamdu ɓadinta en haa Allah. To en nyaamaay ndu, walaa ko ustoto haa meeɗen, to en nyaami ndu boo walaa ko ɓesdoto haa meeɗen.

⁹Ammaa kakkile, ngam taa tampuɓe nder nuɗɗinki nasta hakke daliila ndimu mooɗon.

¹⁰To goɗɗo tampuɗo nder numo ɓernde mum yi'i an annduɗo gooŋga, a ɗon nyaama nder suudu lawru, nden kam naa a semmbiɗini mo haa o nyaama kusel ndabbaawa kirsanaaŋga lawru na?

¹¹Bana non anndal maaɗa laatoto daliila do'ere deerɗiraawo maaɗa mo Almasiihu maayi ngam muuɗum.

¹²To on mbaɗi hakke bana non, waato on pergi deerɗiraaɓe mooɗon tampuɓe nder nuɗɗinki, nden kam heedi Almasiihu mbaɗɗon hakke.

¹³Ngam maajum, to nyaamdu nastinan deerɗiraawo am nder hakke, mi meetataa nyaamugo kusel sam, ngam taa deerɗiraawo am nasta nder hakke.