Read Fulfulde 1 Korintu'en 9 Bible Online

1 Korintu'en 9 - Fulfulde bible

1 Korintu'en 9

¹Mi laataaki dimo na? Mi laataaki nelaaɗo na? Mi yi'aay Yeesu, Jawmiraawo meeɗen na? Onon boo, on laataaki nafuuda kuugal am ngal kuuwananmi Jawmiraawo na?

²Koo to woɗɓe njaɓaay yam bana nelaaɗo, haa mooɗon kam mi nelaaɗo fakat. Nde nii on laatake nuɗɗinɓe Jawmiraawo, kanjum seedoto mi nelaaɗo maako.

³Ndaa ko njaabotoomi yiɗɓe hiitaago yam:

⁴Min nduŋanaaka jaɓugo nyaamdu e njaram ngam kuugal amin na?

⁵To min ngoodino minin boo rewɓe Masiihiŋke'en, min ngalaano duŋayeere yahdugo bee maɓɓe bana nelaaɓe woɗɓe e deerɗiraaɓe Jawmiraawo e Piyer mbaɗata na?

⁶Malla sey min e Barnabas tan kuuwata ngam wuurnugo ko'e amin na?

⁷Soojeejo moye nyaamnata hoore mum? Moy juboto inabooje, nden o nyaamataa ɓiɓɓe maaje? Moy durata tokkere, nden o yarataa kosam dabbaaji man?

⁸Ko mbi'mi ɗo laataaki ɗabiya yimɓe tan, koo umroore Allah boo wi'i ɗum.

⁹Ndaa ko winnda nder tawreeta Muusa: “Taa mbaɗane ngaari corɓoori sabakaare.” Kadi, ɗum ngaari Allah suklanto na?

¹⁰O wi'aay ɗum ngam amin na? Fakat ɗum winndaama ngam amin. Sey demoowo rema bee tammoraago geɗal muuɗum, non boo codoowo tammoro geɗal muuɗum yaake codol.

¹¹Min aawi barkaaji Ruuhu nder mooɗon. Ɗum huunde mawnde to min codi geɗal seɗɗa haa nder kuuje mooɗon ɗe duniyaaru na?

¹²To woɗɓe mari duŋayeere jaɓugo geɗal nga'al haa mooɗon, minin min ɓurataa ɓe na? Ammaa minin min naftoraay ɗum. Min munyani koo ɗume fuu ngam taa min kaɗa Linjiila Almasiihu laawol.

¹³On anndi booɗɗum no huuwooɓe nder haykaliiru ɗon keɓa nguure muuɗum'en nder haykaliiru, lii'antooɓe yimɓe kirseteeɗi dow hirsirde boo ɗon keɓa geɗal muuɗum'en haa kirseteeɗi man.

¹⁴Bana non boo Jawmiraawo umri haa waazooɓe Linjiila nguurda bee kuugal waazu maɓɓe.

¹⁵Ammaa min mi meeɗaay naftoraago ɗum fuu. Mi winndaay ɗum boo ngam haa mi heɓa ɗum jonta. Ndikkanammi maayugo! Walaa mo ittata daliila ka jurortoomi.

¹⁶Mi mantortaako waazu Linjiila. Doole mi waazina ka. Bone laatano yam to mi waazinaay Linjiila.

¹⁷To min suɓanino hoore am kuugal nga'al, mi naftoranno mbarjaari. Ammaa nde nii mi yowanaama kuugal man, mi ɗon huuwa kaliifaaku ngu mi halfina tan.

¹⁸Kadi, ɗume mbarjaari am? Ɗum waazingo Linjiila caahu, bilaa naftoraago duŋayeere nde kuugal waazu man hokkatammi.

¹⁹Mi dimo, walaa neɗɗo mari yam. Ammaa mi waɗi hoore am maccuɗo yimɓe fuu ngam haa mi heɓana Almasiihu ɗuuɗɓe maɓɓe to heɓoto.

²⁰To mi ɗon caka Yahuudu'en, mi yeeɗan kal-kal bana Yahuuduujo, haa mi heɓana Almasiihu Yahuudu'en. Koo nde min bee hoore am mi laataaki jowaaɗo tawreeta Muusa, to mi ɗon wondi bee ɗowtantooɓe tawreeta, mi ɗowtanto ka, ngam haa mi heɓa ɓe.

²¹Bana non boo to mi ɗon wondi bee yimɓe ɓe anndaa tawreeta, mi yeeɗan kal-kal bana maɓɓe bilaa tawreeta ka'a ngam haa mi heɓana Almasiihu ɓe anndaa tawreeta. Ɗum wi'aaka nii mi ɗowtantaako umroore Allah, ngam mi ɗon ɗowtano umroore Almasiihu.

²²To mi ɗon wondi bee tampuɓe nder nuɗɗinki, mi yeeɗan bana min boo mi tampuɗo, ngam haa mi heɓana Almasiihu tampuɓe man nder nuɗɗinki. Waato mi laatanto koo ɓeye fuu bana ɓe mba'i, haa mi hisna woɗɓe maɓɓe koo noy fuu.

²³Ɗum fuu mi ɗon waɗa ɗum ngam Linjiila, haa mi heɓa geɗal am haa barkaaji maaka.

²⁴On anndi haa daldal ɗuuɗɓe ndoggan nder daɗa-daɗa, ammaa gooto maɓɓe tan heɓata keɓal daɗki. Ndoggire non haa keɓon keɓal daɗki.

²⁵Giɗɗo daɗugo fuu eltan hoore mum bee caatal. O ɗon waɗa ɗum ngam haa o heɓa meetaleewol haakooji ɗaylanɗi. Ammaa enen en ɗon ngaɗa ɗum haa keɓen meetaleewol ngol jinnataa.

²⁶Ngam maajum mi ɗon dogga, gite am ɗon tiiti timmitirde daɗa-daɗa. Mi laati bana lukkoowo mo lukkataa meere nder henndu.

²⁷Mi ɗon elta ɓanndu am bee caatal haa ndu ɗowtano yam. Ngam taa min gaazinɗo woɗɓe mi wurtine bana mo he'aay.