Read Fulfulde 2 Korintu'en 13 Bible Online

2 Korintu'en 13 - Fulfulde bible

2 Korintu'en 13

¹Mi ɗon yaha haa mooɗon nde tataɓre. Deftere wi'i: “Sey wullaandu fuu daro dow seedamku seedooɓe ɗiɗo malla tato.”

²Mi ɗon reentina waɗɓe hakke caka mooɗon e woɗɓe fuu, ngam mi bi'nooɗo ɗum yaake mi ɗonno haa mooɗon nde ɗiɗawre. Ammaa nde nii jonta mi walaaɗon caka mooɗon, mi ɗon wi'to ɗum fahin: To mi wari, mi yurminta koo gooto maɓɓe,

³ngam on ngiɗi tabitingo to Almasiihu ɗon wolwa bee hunnduko am malla naa non. O laataaki tampuɗo heedi mooɗon, ammaa o ɗon waŋgina baawɗe maako nder mooɗon.

⁴Fakat saa'i o ɓila haa leggal gaafaaŋgal, o tampuɗo no. Ammaa jonta o geeto bee baawɗe Allah. Ngam daliila kawtal amin bee maako, minin boo min tampuɓe. Ammaa min kollan on min ngeeɗidan bee maako daliila baawɗe Allah.

⁵Linye ko'e mooɗon kadi. Annde to on ɗon tabiti nder nuɗɗinki. Sey on keɓta ɗum bee ko'e mooɗon. On anndi fakat Yeesu Almasiihu ɗon wondi bee mooɗon na? To naa non, on ndo'ake.

⁶Ammaa mi ɗon tammo on annditan no minin min ndo'aaki.

⁷Min ɗon toro Allah ngam taa on mbaɗa halleende koo ndeyeere. Min ɗaɓɓataa tabitingo gooŋga amin, ammaa min ngiɗi on mbaɗa ko fotti, koo to minin min laatake bana do'iiɓe.

⁸Ngam min mbaawataa honugo gooŋga, sey huuwango ka.

⁹Min ɗon ceyo to minin min laatake tampuɓe, ammaa onon on semmbiɗɓe. Ngam maajum min ɗon toro Allah haa on laato timmididɓe.

¹⁰Nde mi daayiiɗo tawon, mi winndani on kuuje ɗe'e fuu ngam to mi wari, mi yiɗaa saatango on bee baawɗe ɗe Jawmiraawo hokki yam. O hokki yam baawɗe man naa ngam halkugo on, ammaa ngam semmbiɗingo on.

¹¹Deerɗiraaɓe, njooɗe nder seyo! Tiine haa on laato timmuɓe! Tiɗɗindire! Njooɗode bee narral! Ngeeɗe nder jam! Nden kam Allah, dokkoowo en yiide e salaaman wondan bee mooɗon.

¹²Koofnindire, karlotire bana no ɗum haandani senaaɓe. Senaaɓe fuu koofni on.

¹³Mo'ere Jawmiraawo meeɗen Yeesu Almasiihu e yiide Allah e kawtal Ruuhu Ceniiɗo ngondu bee mooɗon fuu!