Read Fulfulde 2 Korintu'en 5 Bible Online

2 Korintu'en 5 - Fulfulde bible

2 Korintu'en 5

¹Min anndi, to cuuɗi meeɗen jontaaji ɗi'i, waato ɓalli lesdiiji ɗi'i ngibbinaama, cuuɗi feere ɗon ngam meeɗen haa asama. Allah bee hoore muuɗum waɗi ɗi, ɗi nduumoto haa foroy.

²Jonta min ɗon uuma, min ngenwi masin ɓornaago cuuɗi meeɗen iwɗi haa asama.

³To en ɓornake ɓalli kesi ɗi'i, en mbaŋgataa en temmbuɓe yeeso Allah.

⁴Yaake en ɗon ngeeɗa nder ɓalli lesdiiji ɗi'i, en ɗon uuma bana les doŋngal tedduŋgal. En ngiɗaa ɓortaago ɓalli meeɗen maayanɗi ɗi'i. Ammaa en ngiɗi ɓornaago ɓalli duumiiɗi dow maaji, ngam haa ngeendam moɗa maayanɗum.

⁵Ɗum Allah bee hoore muuɗum tabitini en ngam ngeendam ɗa'am. O hokki en Ruuhu maako bana jeŋngina[3] hayruuji ɗi o resani en.

⁶Ngam maajum min ɗon tiɗɗina ɓerɗe amin foroy. Min anndi, yaake min ɗon nder ɓalli ɗi'i, min ɗon ndaayotiri bee Jawmiraawo —

⁷yahdu amin ɗon tabiti dow nuɗɗinki, naa dow ko yi'ete —

⁸min keewi tiinaare. Min ɓuri yiɗugo accugo ɓalli ɗi'i ngam jooɗodaago bee Jawmiraawo.

⁹Ammaa ko min ɓuri yiɗugo kam, koo to min ɗon nder ɓalli ɗi'i malla koo to min acci ɗi, min pottana mo.

¹⁰Ngam fakat en fuu en ndaroyan yeeso leeso kiita Almasiihu. Nden koo moy meeɗen heɓan mbarjaari deydey kuuɗe mum: Koo booɗɗe koo kalluɗe ɗe o huuwi wakkati o ɗon nder ɓanndu ndu'u.

¹¹Min anndi ɗume woni kulol Allah. Ngam maajum min ɗon ngaso yimɓe. Allah anndi min laaɓɗum tal. Mi ɗon tammo boo on anndi min nder numooji ɓerɗe mooɗon.

¹²Min ngiɗaa min anndina ko'e amin fahin haa mooɗon. Ammaa min ngiɗi on keɓa daliila seyoraago min, haa on maɓɓa kunnduɗe yimɓe jurortooɓe kuuje gi'eteeɗe, naa ɓerɗe laaɓɗe.

¹³To on ndaari min saa'i feere bana min ellitiiɓe, annde min laatake non ngam daliila Allah. Ammaa to min hakkilɓe, nden kam annde min laatake non ngam daliila mooɗon.

¹⁴Ngam yiide Almasiihu ɗon laamano en. Ngam en anndi fakat to gooto maayi mbattudi[4] yimɓe fuu, ɓe fuu boo ɓe maaydi bee maako.

¹⁵O maayi ngam yimɓe fuu, ngam haa yeeɗanɓe ngeeɗa, naa ngam ko'e maɓɓe, ammaa ngam Almasiihu mo maayi e ummiti ngam maɓɓe.

¹⁶Ngam maajum, yeeso ɗo min ndaarataa koo gooto fodde ɗabiya yimɓe. Koo to min anndunooɓe Almasiihu bana non boo, jonta kam min anndirtaa mo non.

¹⁷Ngam maajum to goɗɗo hawti bee Almasiihu, o laatake neɗɗo keso. Ko laatino ɓooyma saalake, koo ɗume fuu laatake kesum.

¹⁸Ɗum fuu, Allah waɗi ɗum. Daliila Almasiihu, o sulhindiri en bee maako, o halfinani min waazingo kubaruwol sulhu ngu'u boo.

¹⁹Ɗum Allah bee hoore muuɗum sulhindiri yimɓe nder duniyaaru bee maako daliila Almasiihu bilaa limango ɓe aybeeji maɓɓe. O halfinani min yeeynugo kubar sulhu man!

²⁰Ngam maajum min wakiili'en Almasiihu. Allah bee hoore mum ɗon wolwana on bee kunnduɗe amin. Ngam daliila Almasiihu min ɗon toro on: Culhotire bee Allah.

²¹Almasiihu waɗaay hakke sam. Ammaa Allah yowi hakkeeji meeɗen fuu dow maako, ngam haa laatooɗen adili'en yeeso Allah barka kawtal meeɗen bee Almasiihu.