Read Fulfulde 2 Korintu'en 8 Bible Online

2 Korintu'en 8 - Fulfulde bible

2 Korintu'en 8

¹Deerɗiraaɓe, min ngiɗi anndingo on no mo'ere Allah waŋgiri nder jama'aaje nuɗɗinɓe haa lesdi Makedoniya.

²Ɓillaaje ɗuuɗɗe poondi nuɗɗinɓe ɓe'e, ammaa ɓe tabiti nder seyo maŋngo masin. Koo nde ɓe ɗonno nder talakaaku naawŋgu, ɓe saahiiɓe jamum.

³Mi ɗon seedano ɓe ɓe ndokki ko ɓe mbaawi, haa ɓuri baawɗe maɓɓe maa. Ɓe ndokki bee ngiɗa maɓɓe.

⁴Ɓe tori min ɗuuɗɗum haa ɓe keɓa duŋayeere hawtango woɗɓe nder walliinde ngam senaaɓe.

⁵Ɓe mbaɗi ko ɓuri tammunde amin. Ɓe aarti ɓe ndokki ko'e maɓɓe haa Jawmiraawo, nden bee muuyo Allah, haa amin boo.

⁶Ngam maajum min tiɗɗini Titus haa o suklano kuugal caahiiŋgal nga'al caka mooɗon, haa o timmitina ngal booɗɗum, nde nii o puɗɗunooɗo ngal.

⁷On cooyaay koo ɗume. On ngoodi nuɗɗinki e baawal wolde e anndal e tiinaare e yiide heedi amin[7]. Min ngiɗi on mbaŋgina caahaaki mooɗon nder kuugal nga'al boo.

⁸Mi wi'aay doole on mbaɗa non. Ammaa bee kubar tiinaare woɗɓe ngiɗmi foondirgo laaɓeeŋga yiide mooɗon.

⁹On anndi no mo'ere Jawmiraawo meeɗen Yeesu Almasiihu wa'i. Koo nde o diskuɗo, o wartiri hoore maako talakaajo ngam daliila mooɗon, haa on laato riskuɓe daliila talakaaku maako.

¹⁰Mi wi'i on ko mi numata. Mi tammi ɗum nafan on to on tokkitini tiinaare mooɗon. Onon aarti waɗugo anniya ka'a diga rowani, non boo on puɗɗi kuugal man.

¹¹Jonta kam, timmitine ngal. Timmitine ngal fodde baawɗe mooɗon bee anniya mbooɗka bana no on puɗɗiri ngal.

¹²To on mari anniya mbooɗka ngam hokkugo, Allah jaɓan dokkal mooɗon. O ƴamataa ko on ngalaa, sey ko marɗon.

¹³Naa ngam haa on talkiɗa nden woɗɓe poofta. Ammaa mi yiɗi fotnugo on bee maɓɓe.

¹⁴Jonta on ɗon nder jeynitaare, on mbaawan wallugo wonɓe nder sooynde. Yeeso ɗo, to on ɓillake, kamɓe ɓe mballa on. Bana nii pottuki laatorto,

¹⁵bana ko winnda: “Ɓoftuɗo ɗuuɗɗum ɓurnaay, ɓoftuɗo peetum boo ŋakkinaay.”

¹⁶Min ɗon ngetta Allah dokkuɗo Titus tiinaare irin nde amin ngam o walla on.

¹⁷Titus jaɓi tornde amin. Naa kanjum tan, ammaa ngam daliila tiinaare maako ɗuuɗnde, o annini yahugo haa mooɗon.

¹⁸Min neli mo bee deerɗiraawo mo jama'aaje nuɗɗinɓe fuu manata waazu Linjiila mum.

¹⁹Jama'aaje haa ɗo cuɓi mo ngam haa o ɗofta min saa'i min njahrata dokkal go haa Urusaliima. Min ɗon mbaɗa ɗum ngam tedduŋgal Jawmiraawo bee hoore mum. Bana non boo min ɗon mbaŋgina anniya amin mbooɗka.

²⁰Min ɗon kakkila no min njogorto dokkal maŋngal nga'al, ngam taa goɗɗo heɓa felugo min.

²¹Min ngiɗi waɗugo ko fotti, naa yeeso Jawmiraawo tan, ammaa yeeso yimɓe boo.

²²Min neli deerɗiraawo meeɗen goɗɗo bee maɓɓe. Min poondi tiinaare maako nde ɗuuɗɗum, min tawi o tiiniiɗo foroy. Jonta boo o ɓesdi tiinaago, ngam o ɗon hooli on ɗuuɗɗum.

²³Titus kam, o kawtiɗɗiraawo am, kuuwdoowo bee am ngam mooɗon. Deerɗiraaɓe yahdanɓe bee maako boo, kamɓe ngoni nelaaɓe jama'aaje. Ɓe ɗon kuuwa ngam tedduŋgal Almasiihu.

²⁴Kolle ɓe yiide mooɗon. Nden kam jama'aaje nuɗɗinɓe fuu tabitinan fakat min mantoraaki on meere.