Read Fulfulde Galaatiya'en 2 Bible Online

Galaatiya'en 2 - Fulfulde bible

Galaatiya'en 2

¹Ɓaawo duuɓi sappo e nayi njahmi Urusaliima fahin. Barnabas yahdi bee am, mi hoo'i boo Titus bee am.

²Mi yehi ton fodde wahayu mo keɓmi. Mi anndini teddinaaɓe Linjiila ka ngaazanmi ummaatooje, mi waɗi ɗum nder sirri ngam mi yiɗaa kuugal ngal mi aarti huuwugo e ngal kuuwanmi jonta laato meere.

³Titus gonduɗo bee am o Yunaniŋkeejo[2], ammaa walaa mo dooli mo juulnaago.

⁴Woodino naafiki'en laatinɓe ko'e muuɗum'en deerɗiraaɓe, nastuɓe jama'aare bee dabare. Kamɓe ɓe ngiɗi linyugo ndimu ngu marɗen nder kawtal bee Almasiihu ngam wartirgo min maccuɓe.

⁵Ammaa min ɗowtanaaki ɓe sam, ngam haa gooŋga Linjiila tabitana on.

⁶Teddinaaɓe go njowanaay yam koo ɗume — koo nde walaa ko yaali yam bee ko ɓe laatino ɓooyma, ngam Allah senndindirtaa yimɓe.

⁷Ɓe paami Allah halfini yam waazu Linjiila caka ummaatooje goɗɗe, bana no o halfiniri Piyer waazu Linjiila caka Yahuudu'en.

⁸Allah mo ɗonno huuwa nder Piyer, laatini mo nelaaɗo caka Yahuudu'en, huuwi nder am, laatini yam nelaaɗo haa ummaatooje goɗɗe.

⁹Nde Yaakuba e Kefas e Yuhanna, laatiiɓe bana daŋraŋge nder jama'aare, annditi mo'ere nde Allah mo'ani yam, ɓe annditi yam, min e Barnabas, min huuwdooɓe bee maɓɓe, ngam haa minin min kuuwa nder ummaatooje goɗɗe, kamɓe boo haa Yahuudu'en.

¹⁰Sey ɓe tori min min cuklano talaka'en tan, mi tiini waɗugo ɗum.

¹¹Nde Kefas wari haa Antakiya, mi dartani mo gite yimɓe, ngam o waɗi aybe.

¹²Diga yimɓe Yaakuba woɗɓe ngaraayno tawon, o ɗonno nyaamda bee deerɗiraaɓe ɓe njuulnaaki[3]. Ammaa nde ɓeya go ngari, o daayti, o acci nyaamdugo bee maɓɓe ngam o huli juulnotooɓe ɓe'e.

¹³Deerɗiraaɓe Yahuudu'en woɗɓe boo mbaɗi naafikaare man, haa Barnabas maa nasti nder naafikaare maɓɓe man.

¹⁴Nde ngi'mi ɓe ɗon cela gooŋga Linjiila, mi wi'i Kefas yeeso yimɓe fuu: “An Yahuuduujo maa, a ɗon yeeɗa bana yimɓe ummaatooje ngeeɗirta naa bana Yahuudu'en, koni a yiɗi doolugo yimɓe ummaatooje haa ɓe ngeeɗa bana Yahuudu'en?”

¹⁵Minin kam min Yahuudu'en asli'en, naa min heefeerɓe, hakke'en ɓe'e,

¹⁶ammaa en anndi neɗɗo waawataa adilineego bee ɗowtanaago tawreeta, sey bee nuɗɗingo Yeesu Almasiihu. Enen boo en nuɗɗini Yeesu Almasiihu, haa en keɓa adilineego bee nuɗɗinki ki'i, naa bee ɗowtanaago tawreeta. Ngam bee kuuɗe tawreeta walaa koo gooto heɓata adilineego.

¹⁷To min ɗon tefa haa Almasiihu adilina min, asee minin maa min laatake hakke'en. To non kam, Almasiihu ɗon wallita hakke na? Naa non sam!

¹⁸To nii mi ɗon nyiɓta ko mi yibbinno, nden kam mi waŋgini hoore am mi luutɗo tawreeta.

¹⁹Min kam mi maayɗo heedi tawreeta, kaŋka kan mbari yam, haa mi yeeɗa ngam Allah. Mi maaydi bee Almasiihu dow leggal gaafaaŋgal.

²⁰Naa min yeeɗata jonta, ammaa Almasiihu ɗon yeeɗa nder am. Yaake mi ɗon yeeɗa nder ɓanndu am jonta, mi ɗon yeeɗa bee nuɗɗingo Ɓiɗɗo Allah mo yiɗi yam, hokki yoŋki muuɗum ngam am.

²¹Min mi wudintaa mo'ere Allah. Ngam to goɗɗo heɓan adilaaku bee ɗowtanaago tawreeta, nden kam Almasiihu maayi meere.