Read Fulfulde Galaatiya'en 6 Bible Online

Galaatiya'en 6 - Fulfulde bible

Galaatiya'en 6

¹Deerɗam'en, to on tawi goɗɗo ɗon waɗa aybewol koo ngole, onon ɗowtaniiɓe Ruuhu Allah, lorne mo bee yaŋkinaare dow laawol booɗŋgol. Kakkilane ko'e mon ngam taa onon boo on nasta nder jarribeeki.

²Mballindire roondaago ko ɗon teddana on, bana nii kiɓɓinirton umroore Almasiihu.

³To goɗɗo laari hoore mum bana o mawɗo, asee boo walaa no o wa'i, nden kam o zammbake hoore maako.

⁴Sey koo moy linya kuugal mum. Nden o heɓan seyoraago ngal, walaa haaje o foonda ngal bee ngal goɗɗo.

⁵Ngam koo moy roondoto doŋngal muuɗum.

⁶Sey ekkitinaaɗo wolde Allah sennda jawdi muuɗum fuu bee ekkitinoowo muuɗum.

⁷Taa zammbe ko'e mon! Goɗɗo waawataa jancugo Allah. Ko neɗɗo aawi fuu, kanjum sodata.

⁸Mo aawi ko fottanta suunooji mum, sodan ko suunooji ndimata, waato halkere. Ammaa to o aawi ko fottanta Ruuhu, o sodan ko Ruuhu rimata, ngeendam nduumiiɗam.

⁹Taa comen waɗugo ko fotti, ngam to en tampaay, en codan to wakkati man yottake.

¹⁰Ngam maajum, nde nii en keɓi laawol man, sey en ngaɗana yimɓe fuu booɗɗum, sakkomaa haa deerɗiraaɓe men nuɗɗinɓe.

¹¹Ndaare karfeeje mawɗe ɗe mbinndanmi on bee juŋngo am!

¹²Ɗaɓɓanɓe yerduye yimɓe bee kuuɗe ɓanndu ɗon ndoola on juulnaago ngam taa Yahuudu'en toonyo ɓe ngam daliila gaafaaŋgal Almasiihu tan.

¹³Ngam koo juulniiɓe man bee ko'e muuɗum'en ɗowtantaako tawreeta. Ɓe ngiɗi on njuulno ngam haa ɓe njuroro ko ɓe ngaɗi dow ɓalli mon.

¹⁴Min kam, mi jurortaako koo ɗume, sonaa gaafaaŋgal Jawmiraawo men Yeesu Almasiihu. Daliila gaafaaŋgal, duniyaaru waafaama heedi am, min boo mi gaafaaɗo heedi maaru.

¹⁵Ngam maajum juulnol malla saadooniiku fuu walaa saman. To goɗɗo laatake neɗɗo keso, kanjum tan mari saman.

¹⁶Tokkotooɓe farilla ka'a fuu, Allah hokku ɓe salaaman e mo'ere, non boo haa Isra'iila, ummaatoore Allah gooŋgaare.

¹⁷Yeeso ɗo, taa goɗɗo fitinammi. Min mi maccuɗo Yeesu, ɓattajje haa ɓanndu am ɗon mbaŋgina ɗum.

¹⁸Onon deerɗam'en, mo'ere Jawmiraawo men Yeesu Almasiihu wondu bee mooɗon. Aamiina!