Read Fulfulde Efesu'en 1 Bible Online

Efesu'en 1 - Fulfulde bible

Efesu'en 1

¹Min Pol, nelaaɗo Yeesu Almasiihu fodde muuyo Allah, mi ɗon winndana on, onon senaaɓe wonɓe haa Efesus e nuɗɗinɓe Yeesu Almasiihu:

²Allah, Baabiraawo men e Jawmiraawo Yeesu Almasiihu ndokka on mo'ere e salaaman.

³Yettoore laatano Allah, Baabiraawo Jawmiraawo men Yeesu Almasiihu mo barkiɗini en bee barka koo kayeeha fodde Ruuhu haa asama nder Almasiihu:

⁴Diga o tagaayno duniyaaru tawon, o suɓi en nder Almasiihu haa en laato senaaɓe, ɓe ngalaa aybe[1] yeeso maako nder yiide maako.

⁵Diga ɓooyma o aarti o suɓi en haa en laato ɓiɓɓe maako daliila Almasiihu. O muuyi ɗum ngam ɗum fottani mo.

⁶Maŋgtoore laatano tedduŋgal maako ngam daliila mo'ere nde o mo'ani en bee Ɓiɗɗo maako giɗaaɗo.

⁷Ngam daliila ƴiiƴam Almasiihu ndufaaɗam keɓɗen coottaari e yaafuye hakkeeji men fodde mo'ere Allah ɗuuɗnde.

⁸Allah ɗuuɗɗinani en nde, hokki en hikma e hakkiilo fuu.

⁹O anndini en sirri muuyo maako, o waɗi anniya ka'a nder Almasiihu diga ɓooyma ngam ɗum fottani mo,

¹⁰haa o hiɓɓina ɗum nder saa'iire fottannde, o hawta kuuje gonɗe nder asama e dow lesdi fuu dow ardaaŋgal Almasiihu.

¹¹Barka Almasiihu enen boo en keɓi geɗal kisndam meeɗen. Allah, baɗanɗo koo ɗume fuu fodde nufaye muuyo mum, suɓi en diga ɓooyma.

¹²O waɗi ɗum ngam haa min maŋgta tedduŋgal maako, minin aartuɓe tammoraago Almasiihu.

¹³Non boo on nani wolde gooŋga, waato Linjiila kisndam mon, on nuɗɗini mo, Allah boo waɗi on lammba Ruuhu Ceniiɗo mum mo o iinani on.

¹⁴Ruuhu man woni jeŋngina ndonŋgu meeɗen, haa ndonen ngu to o sootti en. Maŋgtoore laatano tedduŋgal maako!

¹⁵Ngam maajum, min boo nde mi nani haala nuɗɗinki mon dow Jawmiraawo Yeesu, non boo haala yiide mon heedi senaaɓe fuu,

¹⁶mi accataa yettugo Allah ngam daliila mooɗon. Mi ɗon siftora on foroy nder do'aaje am,

¹⁷mi ɗon toro Allah, mo Yeesu Almasiihu Jawmiraawo men, Baaba tedduŋgal, hokka on hikma e waŋginana on gooŋga bee Ruuhu mum haa anndon mo.

¹⁸Allah yaynana hakkilooji mon bee jayŋgol mum, haa on paama no tammunde iwnde diga ewnaandu maako wa'i, non boo jeynitaare tedduŋgal ndonŋgu ngu o sigani senaaɓe maako.

¹⁹On paama boo baawɗe maako ɓurɗe mawnugo ɗe o huuwrata heedi meeɗen, enen nuɗɗinɓe fodde semmbe maako mawnde.

²⁰Baawɗe ɗe'e, Allah huuwtiniri ɗe nde o ummitini Almasiihu caka maayɓe, o jo'ini mo haa nyaamo maako haa asamanji.

²¹Haa ton Almasiihu ɗon laamo dow mawɓe asama e marɓe laamu e marɓe baawɗe e jawmiraaɓe e inɗe tedduɗe ewneteeɗe koo ɗeye, naa nder zamanuuru ndu'u tan, ammaa nder waranndu boo.

²²Allah wallini koo ɗume les kosɗe maako, waɗi mo dow koo ɗume, laatini mo hooreejo jama'aare nuɗɗinɓe.

²³Kayre woni ɓanndu Almasiihu. Nder maare Almasiihu ɗon bee hoore mum, kaŋko ɗon hebbina koo ɗume fuu, koo toy.