Read Fulfulde Efesu'en 5 Bible Online

Efesu'en 5 - Fulfulde bible

Efesu'en 5

¹Ngam maajum mbaɗe ko Allah waɗata nde nii on ɓiɓɓe maako yiɗaaɓe.

²Ngeeɗe nder yiide bana no Almasiihu yiɗiri en, o hokki yoŋki maako ngam meeɗen. O lii'ani ki Allah bana kirsaaɗum, bana dokkal marŋgal uureeŋgol belŋgol.

³Bana no ɗum haandani senaaɓe, taa haala daakaareeku e coɓki koo kiye e suuno wolwe caka mooɗon.

⁴Non boo bolle cemtiniiɗe e meereeje e tunwuɗe. Ndikka on mbolwa bolle gettooje.

⁵On anndi, walaa daakaareejo malla coɓɗo malla cuunaaɗo, waato dewoowo labbi, heɓata ndonŋgu nder laamu Almasiihu e Allah.

⁶Taa acce goɗɗo esta on bee haalaaji meereeji. Ngam daliila kuuje ɗe'e tikkere Allah ɗon ukkano tuurtanɓe dow maako.

⁷Taa kawte bee maɓɓe sam.

⁸Ɓooyma on ɗonno nder nyiɓre, ammaa jonta on ɗon nder annoora ngam daliila kawtal mon bee Jawmiraawo. Ngam maajum ngeeɗe bana yimɓe annoora,

⁹ngam annoora ɗon rima mbooɗeeŋga e adilaaku e gooŋgaaku fuu.

¹⁰Tiine heɓtugo ko fottanta Jawmiraawo.

¹¹Taa kawte bee huuwooɓe kuuɗe meereeje ɗe nyiɓre, ndikka on pefta ɗe.

¹²Fakat, kuuɗe ɗe ɓe kuuwata bee sirri, koo wolwugo ɗe maa ɗum cemtuɗum.

¹³Ammaa to annoora feftini ɗum fuu ɗum waŋgan.

¹⁴Ngam ko waŋgi fuu laatake annoora. Ngam maajum ɗum wi'a: “Fin, an ɗaaniiɗo, ummita e maayde! Nden kam Almasiihu yaynante.”

¹⁵Ngam maajum kakkilane yahdu mon booɗɗum, ngam taa on laato faataaɓe, ammaa hikma'en.

¹⁶Naftore wakkati, ngam nyalaaɗe jontaaje ɗe kalluɗe.

¹⁷Ngam maajum, taa laate faataaɓe, ammaa paame ko woni muuyo Jawmiraawo.

¹⁸Taa nguyke, ngam nguykinoojam yahran haa daakaareeku. Ndikka on acca Ruuhu Allah heewa nder mooɗon.

¹⁹Hawtaade, ngime jabuuraaje e maŋgtooje e gime iwɗe diga Ruuhu. Ngimane Jawmiraawo, maŋgte mo bee jabuuraaje bee ɓerɗe mon fuu.

²⁰Ngette Allah Baabiraawo koo ndey ngam koo ɗume bee innde Jawmiraawo men Yeesu Almasiihu.

²¹Koo moy mooɗon leestana woɗɓe ngam daliila ɗowtaare mon haa Almasiihu.

²²Onon rewɓe, leestane worɓe mon bana on ɗon leestana Jawmiraawo.

²³Ngam gorko woni hoore debbo bana Almasiihu laatori hoore jama'aare nuɗɗinɓe. Kaŋko woni kisnoowo jama'aare laatiinde ɓanndu maako.

²⁴Bana jama'aare nuɗɗinɓe ɗon leestana Almasiihu, non rewɓe boo sey leestana worɓe muuɗum'en nder koo ɗume fuu.

²⁵Onon worɓe, ngiɗe rewɓe mon bana Almasiihu yiɗiri jama'aare, hokki hoore muuɗum ngam maare,

²⁶haa o sena nde, o laɓɓina nde bee ngiiwam wolde maako,

²⁷haa o darna jama'aare marnde tedduŋgal nde'e yeeso maako bilaa batte malla nyodi e ko nanndi, ammaa nde seniinde, bilaa aybe.

²⁸Bana non boo worɓe, sey ɓe ngiɗa rewɓe maɓɓe bana ɓe ngiɗiri ɓalli maɓɓe. Gorko giɗɗo debbo mum, yiɗi hoore muuɗum.

²⁹Fakat, walaa mo wanyata ɓanndu mum, ammaa o nyaamnan ndu, o aynan ndu bana Almasiihu ɗon waɗana jama'aare nuɗɗinɓe,

³⁰ngam enen en terɗe ɓanndu maako.

³¹Ngam maajum: “Gorko accan baaba muuɗum e daada[2] muuɗum, ɗakkotiran bee debbo muuɗum, ɓe ɗiɗo ɓe laatoto ɓanndu wooru.”

³²Sirri lugguɗo ɗon nder aayaare nde'e. Haa am kam, nde ɗon wolwa haala Almasiihu bee jama'aare mum.

³³Ammaa nde ɗon wolwana onon boo: Sey koo moy mooɗon yiɗa debbo mum bana hoore mum, debbo boo ɗowtana gorum.