Read Fulfulde Efesu'en 6 Bible Online

Efesu'en 6 - Fulfulde bible

Efesu'en 6

¹Onon ɓikkoy, ɗowtane saaro'en mon ngam daliila Jawmiraawo. Kanjum ɗum kaanduɗum.

²“Teddin baaba ma e daada ma”, kanjum woni umroore aranndeere marnde iinawol:

³“Nden kam a heɓan hayru, balɗe ma njuutan dow lesdi.”

⁴Onon baabiraaɓe, taa mettine ɓikkoy mon ɓerɗe, ammaa mawnine koy, elte koy bee wasuyeeji iwɗi haa Jawmiraawo.

⁵Onon jeyaaɓe, ɗowtane jawmiraaɓe mon haa duniyaaru bee kulol e diwŋgol e ɓernde laaɓnde, bana on ɗon ɗowtana Almasiihu.

⁶Ɗowtane ɓe, naa gite maɓɓe tan haa on ngerdano ɓe, ammaa bana jeyaaɓe Almasiihu, kuuwe muuyo Allah bee ɓerɗe mon fuu.

⁷Kuuwe kuugal mon bee ngiɗa mon bana huuwanooɓe Jawmiraawo, naa yimɓe.

⁸On anndi, kuuɗe booɗɗe ɗe goɗɗo huuwata fuu, koo o maccuɗo koo o dimo, Jawmiraawo warjoto mo.

⁹Onon jawmiraaɓe, njogore jeyaaɓe mon bana non. Acce furkitaago ɓe. On anndi onon bee maɓɓe fuu, on ngoodi Jawmiraawo mo ɗon haa asama. Kaŋko o senndindirtaa yimɓe.

¹⁰Ndaa ko lutti wi'eego: Cemmbiɗe tum nder kawtal mon bee Jawmiraawo bee baawɗe maako mawɗe.

¹¹Koo'e balmi Allah fuu ngam haa on mbaawa dartanaago dabareeji Iblisa.

¹²Ngam en kaɓataa bee yimɓe, ammaa bee mawɓe asama e marɓe laamu, bee marɓe baawɗe dow duniyaaru nyiɓɓundu ndu'u, bee ruuhuuji kalluɗi gonɗi nder asamanji.

¹³Ngam maajum njoge balmi Allah, haa on keɓa dartanaago konneejo to nyalaade hallunde wari. To on njaalake koo ɗume fuu, nden kam on tabitan.

¹⁴Ndare booɗɗum kadi, taade gooŋgaaku bana taadorgol, ɓorne adilaaku bana sulke.

¹⁵Taaskitaago waazingo kubar salaaman laato paɗe haa kosɗe mon.

¹⁶Koo ndey fuu njoge nuɗɗinki bana wawarde[3]. Bee maare nyifoton kuri Sayɗaanu giiteleeji fuu.

¹⁷Kufne kisndam bana hufneere njamndi, njoge wolde Allah boo bana kaafahi Ruuhu Allah.

¹⁸Tum mbaɗe do'aaje e torɗe feere feereeje bee ballal Ruuhu Allah. Ayne, taa acce do'anaago senaaɓe fuu.

¹⁹Tore mo ngam am boo, haa o hokkammi bolle pottuɗe ngam waŋgingo sirri Linjiila bee dartaare.

²⁰Koo mi kaɓɓaaɗo nder fursina[4] jonta, mi wakiiliijo Linjiila. Ndo'aneeɗam haa mi waazina ka bee dartaare bana no ɗum haandani yam.

²¹Tikikus, deerɗiraawo men giɗaaɗo, jaggiiɗo Jawmiraawo koolaaɗo anndinan on haa on paama onon boo no njooɗoriimi e ko mbaɗanmi fuu.

²²Mi neli mo haa mooɗon bee anniya haa o anndina on joonde amin e o de'itina ɓerɗe mon.

²³Allah Baabiraawo e Yeesu Almasiihu, Jawmiraawo, ndokka deerɗiraaɓe salaaman e yiide hawtaade bee nuɗɗinki.

²⁴Mo'ere Allah wonda bee yiɗɓe Jawmiraawo men Yeesu Almasiihu bee yiide nde wonnataako!