Read Fulfulde Kolossi'en 1 Bible Online

Kolossi'en 1 - Fulfulde bible

Kolossi'en 1

¹Min Pol, nelaaɗo Yeesu Almasiihu fodde muuyo Allah e Timote, deerɗiraawo men,

²min ɗon mbinndana on, onon senaaɓe wonɓe haa Kolossi, deerɗiraaɓe hoolaaɓe nder Almasiihu: Allah Baabiraawo meeɗen hokka on mo'ere e salaaman.

³Min ɗon ngetta Allah, Baabiraawo Jawmiraawo meeɗen Yeesu Almasiihu e min ɗon ndo'ano on tum.

⁴Ngam min nani haala nuɗɗinki mooɗon nder Yeesu Almasiihu e haala yiide mooɗon heedi senaaɓe fuu

⁵daliila tammunde nde Allah resani on haa asamanji anndinaande on diga naane bee Linjiila, kubaruwol gooŋga.

⁶Kubaruwol ngo'ol yottake haa mooɗon. Ngol ɗon waŋgina nafuuda e ɗon yaaja haa duniyaaru fuu, bana non boo ɗum laati haa mooɗon diga nyannde on nani kubaruwol gooŋga, on paami mo'ere Allah.

⁷On ekkiti ɗum haa Epafras, kuuwdiɗɗiraawo amin giɗaaɗo, o jaggiiɗo Almasiihu koolaaɗo haa mooɗon.

⁸Kaŋko wolwani min haala yiide nde Ruuhu hokki on.

⁹Ngam maajum minin boo, min accaay toraago Allah ngam mooɗon diga min nani kubar mon. Min ɗon toro mo haa on keɓa hikma e faamu fuu haa Ruuhu maako, on paama muuyo maako.

¹⁰Nden kam on mbaawan yeeɗugo ngeendam pottananɗam Jawmiraawo tum, kuuɗe mon booɗɗe fuu mbaŋginan nafuuda, on ɓesdoto anndugo Allah boo,

¹¹nde Allah ɗon semmbiɗina on bee semmbe mum fuu fodde baawɗe mum tedduɗe, haa on tiina e on munyana koo ɗume fuu bee seyo,

¹²on ngetta Baabiraawo, ngam kaŋko waawni on heɓugo ndonŋgu ngu o yeɗani senaaɓe maako nder annoora.

¹³Almasiihu wurtini en diga baawɗe nyiɓre, o nastini en nder laamu Ɓiɗɗo maako giɗaaɗo.

¹⁴Haa maako en keɓi coottaari e yaafuye hakkeeji.

¹⁵Kaŋko woni jaati Allah mo yi'ataake, o ɓurduɗo tagle fuu.

¹⁶Ngam bee maako Allah tagri kuuje fuu haa asama e dow lesdi, ko yi'ete e ko yi'ataake boo, baawɗeeji e jawmiraaɓe e mawɓe asama e marɓe laamu. Allah tagri kuuje fuu bee Almasiihu, o tagi ɗe boo ngam maako.

¹⁷Almasiihu aarti ɗe fuu. Daliila maako ɗe fuu ɗe ɗon.

¹⁸Kaŋko woni hoore jama'aare nuɗɗinɓe laatiinde ɓanndu maako. O fuɗɗoode, o arano caka ummitinaaɓe diga maayde, haa o laato ɓurduɗo nder koo ɗume fuu.

¹⁹Ngam ɗum fottani Allah, ko woni nder maako fuu wona foroy nder Almasiihu,

²⁰haa o sulhindira tagefooji dow lesdi e haa asama bee maako ɓaawo tabitinki salaaman bee ƴiiƴam Ɓiɗɗo maako ndufaaɗam dow leggal gaafaaŋgal.

²¹Naane kam on daayiiɓeno bee Allah, on ɗonno konne'en maako daliila kuuɗe mon kalluɗe e numooji mon kalluɗi.

²²Ammaa jonta, o sulhindiri on bee hoore maako bee maayde Ɓiɗɗo maako mo laati neɗɗo haa o darna on yeeso maako on senaaɓe, on ngalaa aybe, on ngalaa feloore.

²³Ammaa sey on tabita e on cemmbiɗa nder nuɗɗinki. Taa on acca koo ɗume sottina on dow tammunde nde keɓɗon haa Linjiila ka on nani. Linjiila ka'a waazinaama tagefooji fuu nder duniyaaru. Min Pol, mi gaazoowo ka.

²⁴Jonta mi ɗon seyoro boneeji am ngam mooɗon. Mi ɗon cikina nder ɓanndu am ko ŋakki haa boneeji ɗi Almasiihu yari ngam ɓanndu muuɗum, waato jama'aare nuɗɗinɓe.

²⁵Mi jaggiiɗo maare fodde kaliifaaku ngu Allah halfini yam: Anndingo on wolde Allah fuu.

²⁶Wolde nde'e, diga ɓooyma e haa gide fuu, Allah suuɗino sirri man. Ammaa jonta o waŋginani ɗum senaaɓe maako.

²⁷Ngam o waɗi anniya waŋgingo jeynitaare tedduŋgal sirri man haa yimɓe ummaatooje goɗɗe. Sirri man, ɗum Almasiihu gonɗo nder mooɗon, kaŋko hokki on tammunde heɓugo tedduŋgal haa Allah.

²⁸Kaŋko min ngaazata haa yimɓe fuu. Min ɗon ndeentina ɓe, min ɗon ngaazina ɓe bee hikma fuu, ngam haa min ndarna koo moy yeeso Allah o timmuɗo nder kawtal bee Almasiihu.

²⁹Ngam daliila man mi ɗon yara bone, mi ɗon haɓa bee baawɗe ɗe Almasiihu hokki yam, kanje kuuwata nder am bee semmbe.