Read Fulfulde Kolossi'en 2 Bible Online

Kolossi'en 2 - Fulfulde bible

Kolossi'en 2

¹Mi yiɗi on paama haɓre saatunde nde mi ɗon haɓa ngam mooɗon e ngam yimɓe Lawdikiya. Mi ɗon huuwa ɗum boo ngam yimɓe ɓe meeɗaay yi'ugo yam

²ngam haa ɓerɗe maɓɓe cemmbiɗa, ɓe kawta nder yiide e nder anndal gooŋgawal fuu, ɓe paama sirri Allah, waato Almasiihu.

³Haa maako hikma e anndal fuu ɗon cuuɗi.

⁴Mi ɗon wi'a ɗum ngam taa goɗɗo esta on bee bolle ƴoyɗe.

⁵Koo nde mi walaaɗon caka mooɗon boo, hakkiilo am kam ɗon wondi bee mooɗon. Mi ɗon seyoro nanugo no on ɗon ngeeɗa bana ko haani e no nuɗɗinki mooɗon ɗon tabiti nder Almasiihu.

⁶Nde nii on njaɓi Jawmiraawo Yeesu Almasiihu, tokke yeeɗugo nder kawtal bee maako.

⁷Tabite nder maako bana no lekki darorto nder lesdi bee ɗaɗi maaki, ndarne yoŋkiiji mooɗon dow maako, cemmbiɗine nuɗɗinki mon fodde ekkitinol ngol keɓɗon, ngette Allah bee gettooje ɗuuɗɗe.

⁸Kakkile ngam taa goɗɗo naŋnga on nder tuuforgol bee bolle estooje, cooke iwɗe haa ruuhuuji laamaniiɗi duniyaaru, ɗi iwaay haa Almasiihu.

⁹Ko woni nder Allah fuu ɗon foroy nder Almasiihu marɗo ɓanndu neɗɗo.

¹⁰To on kawti bee Almasiihu, ko woni nder maako fuu ɗon nder mooɗon boo. O hooreejo dow mawɓe asama e marɓe laamu fuu.

¹¹Nder kawtal bee maako, on keɓi juulnol[1] ngol juŋngo goɗɗo waawataa waɗugo. Juulnol ittuŋgol baawɗe hakke nder neɗɗo, ɗum juulnol Almasiihu.

¹²On uwdaaɓe bee maako nder baptisma. On ummitinaaɓe boo hawtaade bee maako, ngam on nuɗɗini baawɗe Allah ummitinɗo mo diga maayde.

¹³Naane, Allah ɗonno laara on bana maayɓe ngam daliila hakkeeji mooɗon e saadoniiku mon. Ammaa jonta o yeeɗitini on hawtaade bee Almasiihu. O yaafi hakkeeji meeɗen fuu.

¹⁴O seeki ɗereewol nyamaande meeɗen ɗuuɗnde, aybinanŋgol en bee umrooje maagol. O nattini ngol bee tiggugo ngol haa gaafaaŋgal.

¹⁵Bee maagal, o ɓortiri mawɓe asama e marɓe laamu fuu, o semtini ɓe yeeso yimɓe fuu, o yahri ɓe, ɓe haɓɓaaɓe nder juulde jaalorgal maako.

¹⁶Jonta kam, taa goɗɗo hiito on dow nyaamdu malla dow njaram, koo dow nyalɗe ceniiɗe, koo dow juulde lewru hesru, koo dow nyannde siwtorde.

¹⁷Ɗum fuu ɗum misaalu kuuje ɗe ngaraayno tawon, ammaa gooŋga man ɗum Almasiihu.

¹⁸Woodi seyortooɓe yaŋkinaare muuɗum'en e sujidanooɓe malaa'ika'en, wolwanɓe haala kaayeefiiji ɗi ɓe ngi'i. Taa acce ɓe itta mbarjaari mon bee haalaaji maɓɓe meereeji, ɓe mawnitiiɓe bee numooji maɓɓe iwɗi haa suunooji neɗɗo.

¹⁹Ɓe acci ɗakkotirgo bee Almasiihu, mo laati hoore ɓanndu muuɗum, waato jama'aare nuɗɗinɓe mo. Ngam daliila hoore man, ɓanndu fuu ɗon heɓa ko ndu mari haaje, ɗon hawti bee jokke e ɗaɗi, ɗon mawna bana Allah muuyi.

²⁰Nde nii on maaydi bee Almasiihu, walaa ko yaali on bee ruuhuuji laamaniiɗi duniyaaru. Koni ngeeɗoton bana yimɓe duniyaaru les dookaaji bana ɗi'i:

²¹“Taa hoocu ɗu'um”, “taa metta ɗuma”, “taa meem ɗu'um boo”?

²²Ɗum fuu ɗum wonnoto to ɗum huuwtiniraama. Ɗum umrooje e ekkitinolji yimɓe.

²³Umrooje ɗe'e, bana ɗe hikmaaje ngam ɗe ɗon ekkitina haala dewal ngal goɗɗo waɗanta hoore mum e yaŋkinaare e elto ɓanndu bee caatal. Ammaa ɗe ngalaa saman ngam ɗe ɗon kebbitina suunooji ɓanndu tan.