Read Fulfulde 1 Tessaloniiki'en 3 Bible Online

1 Tessaloniiki'en 3 - Fulfulde bible

1 Tessaloniiki'en 3

¹Nde min mbaawaay munyugo, min tabitini ndikka min njooɗo haa Ateena feere amin,

²min neli deerɗiraawo meeɗen Timote haa mooɗon, kuuwdiɗɗiraawo Allah ngam waazingo Linjiila Almasiihu, ngam haa o semmbiɗina on, o tabitina nuɗɗinki mooɗon.

³Ngam taa koo gooto mooɗon loro ɓaawo ngam daliila torraaji jontaaji ɗi'i. On anndi kanji ngoni geɗal meeɗen fodde muuyo Allah.

⁴Yaake min ɗonno ngondi bee mooɗon, min mbi'no on torraaji ukkanto en. On anndi non ɗum laati jonta boo.

⁵Ngam maajum nde mi waawaay mi tokko munyugo, mi neli Timote haa mooɗon, haa o heɓa kubar nuɗɗinki mooɗon. Mi hultorno teema jarriboowo heɓi do'ugo on, nden kuugal amin laatakeno meere.

⁶Ammaa jonta Timote warti, seyni min bee kubar nuɗɗinki e yiide mooɗon. O yecci min, foroy on ngoodi numooji booɗɗi dow amin, on ɗon ngelo yi'ugo min bana minin boo min ɗon ngelo yi'ugo on.

⁷Daliila nuɗɗinki mooɗon, deerɗiraaɓe, min keɓi de'ere ɓerɗe nder torraaji e boneeji amin fuu.

⁸Jonta yoŋkiiji amin ngeeɗiti ngam on ɗon tabiti nder kawtal mooɗon bee Jawmiraawo.

⁹Irin yettoore ndeye min ngettirta Allah daliila mooɗon, ngam seyo maŋngo ngo min maatata daliila mooɗon yeeso maako?

¹⁰Jemma bee naaŋge min ɗon toro mo bee tiinaare, haa min ngi'a on fahin, min kebbitina ko ŋakkani nuɗɗinki mooɗon.

¹¹Allah bee hoore mum, Baabiraawo meeɗen e Jawmiraawo meeɗen Yeesu hokka min laawol yahugo haa mooɗon.

¹²Jawmiraawo mawnina yiide wonnde hakkunde mooɗon, non boo heedi yimɓe fuu, haa nde nannda bee nde min ngiɗiri on bee muuɗum.

¹³O semmbiɗina ɓerɗe mooɗon, ngam laatooɗon seniiɓe, ɓe ngalaa feloore yeeso Allah, Baabiraawo meeɗen, saa'i Yeesu, Jawmiraawo meeɗen loroyta bee seniiɓe mum fuu. Aamiina!