Read Fulfulde 1 Tessaloniiki'en 4 Bible Online

1 Tessaloniiki'en 4 - Fulfulde bible

1 Tessaloniiki'en 4

¹Ko lutti wi'ugo on, onon deerɗiraaɓe, min ɗon toro on, min ɗon tiɗɗina on bee innde Jawmiraawo meeɗen Yeesu: Nde on ekkitake haa amin no on njooɗorto, haa on pottana Allah, bana non mbaɗoton boo, ɓesde waɗugo ɗum yeeso yeeso.

²On anndi umrooje ɗe min ndokki on fodde Jawmiraawo Yeesu.

³Ngam ndaa muuyo Allah: O yiɗi on laato laaɓɓe, on ndaayo daakaareeku.

⁴Koo moy gorko haa mooɗon ekkito wondugo bee debbo mum bee senaare e neɗɗaaku,

⁵taa acce suunooji kalluɗi laamano on bana yimɓe ɓe anndaa Allah.

⁶Taa koo moy waɗana deerɗum aybe[1] dow haala ka'a, taa o toskina mo. Min mbi'i on ɗum diga ɓooyma, min ndeentini[2] on boo: Jawmiraawo hiitoto ɗum fuu.

⁷Ngam Allah ewnaaki en haa en ngeeɗa nder daakaareeku, ammaa haa en ngeeɗa nder senaare.

⁸Ngam man, to goɗɗo salake umrooje ɗe'e, naa neɗɗo o sali, ammaa Allah, dokkuɗo on Ruuhu mum Ceniiɗo.

⁹On ngalaa haaje goɗɗo winndana on haala yiide hakkunde deerɗiraaɓe. Ngam onon bee ko'e mooɗon Allah ekkitini on yiɗindirgo.

¹⁰Kanjum ngaɗoton heedi deerɗiraaɓe fuu nder lesdi Makedoniya. Ammaa min ɗon tiɗɗina on ɓesdaago yeeso yeeso.

¹¹Tiine jooɗaago on de'itɓe, cuklane kuuɗe mooɗon, kuuwe ngam nguure mooɗon bee juuɗe mooɗon, bana no min mbi'no on diga ɓooyma.

¹²Nden kam joonde mooɗon fottanan yimɓe ɓe nuɗɗinaay, on marataa haaje goɗɗo walla on sam.

¹³Onon deerɗiraaɓe, min ngiɗi on paama gooŋga dow maayɓe, ngam taa on laato suniiɓe bana yimɓe ɓe ngalaa tammunde.

¹⁴En nuɗɗini Yeesu maayi, ummiti. Bana non boo maayɓe nuɗɗinɓe Yeesu, Allah wartiran ɓe hawtaade bee Yeesu.

¹⁵Ndaa ko min mbi'ata on jonta fodde ko Jawmiraawo wi'i: Enen luttuɓe bee yoŋki haa nyalaade loraaki Jawmiraawo, en aartataa maayɓe fottugo bee maako.

¹⁶To sawtu Jawmiraawo nanaama bee hunnduko ardiiɗo malaa'ika'en, luwal Allah boo fuufaama, Jawmiraawo jippoto diga asama. Maayɓe nuɗɗinɓe Almasiihu aartan ummitaago.

¹⁷Ɓaawoɗon, enen luttuɓe bee yoŋki saa'i man en eeŋginteeɓe bee maɓɓe nder duule, ngam haa en pottoya bee Jawmiraawo nder hawa. Bana nii ngondirten bee Jawmiraawo haa foroy.

¹⁸Kadi, cemmbiɗindire bee bolle ɗe'e.