Read Fulfulde 1 Tessaloniiki'en 5 Bible Online

1 Tessaloniiki'en 5 - Fulfulde bible

1 Tessaloniiki'en 5

¹Onon deerɗiraaɓe, walaa haaje min mbinndana on haala saa'iiji e wakkatiiji ɗi kuuje ɗe'e fuu laatoto.

²Ngam onon bee ko'e mooɗon on anndi booɗɗum, nyalaade Jawmiraawo waran bana gujjo garanɗo jemma.

³Wakkati yimɓe mbi'ata: “Salaaman ɗon! Hoolɗinaare ɗon!” Nden halkere ukkanto ɓe bana luuwe ngaranta ɓesnanɗo. Ɓe ndaɗataa sam.

⁴Ammaa onon, deerɗiraaɓe, on ngonaay nder nyiɓre, haa nyalaade nde'e juha on bana gujjo.

⁵Onon fuu, on ɓiɓɓe annoora, on ɓiɓɓe nyalawma. En laataaki yimɓe yeeɗanɓe nder jemma malla nyiɓre.

⁶Ngam maajum taa en ɗaano bana woɗɓe, ammaa en ayna, en laato hakkilɓe.

⁷Ɗaanotooɓe kam, jemma ɗaanoto. Wuykooɓe boo, jemma nguykata.

⁸Ammaa enen nde en yimɓe nyalawma, sey en laato hakkilɓe. En ɓorno nuɗɗinki e yiide bana sulke, tammunde heɓugo kisndam laatano en bana hufneere njamndi.

⁹Ngam Allah hoddiranaay en tikkere muuɗum, ammaa ngam haa en keɓra kisndam bee Jawmiraawo meeɗen Yeesu Almasiihu.

¹⁰O maayi ngam meeɗen, ngam haa en ngeeɗida bee maako, koo to en luttuɓe bee yoŋki koo to en maayɓe saa'i o loroyta.

¹¹Ngam maajum ngaazindire, cemmbiɗindire bana no mbaɗoton jonta.

¹²Onon deerɗiraaɓe, min ɗon toro on: Teddine huuwanɓe nder bone caka mooɗon, suklaniiɓe on. Jawmiraawo suɓi ɓe haa ɓe ardo on, ɓe ndeentina on boo.

¹³Teddine ɓe masin, ngiɗe ɓe ngam daliila kuugal maɓɓe. Njooɗode hakkunde mooɗon nder jam.

¹⁴Deerɗiraaɓe, min ɗon toro on: Ndeentine mbaateendam'en. Tiɗɗine tampa-ɓerɗe'en, mballe tampuɓe, munyane yimɓe fuu.

¹⁵Kakkile ngam taa goɗɗo lornana keeddiɗɗum halleende dow halleende. Ammaa tiine waɗugo mbooɗeeŋga foroy hakkunde mooɗon, non boo haa yimɓe fuu.

¹⁶Ceye foroy.

¹⁷Mbaɗe do'a wakkati fuu.

¹⁸Ngette Allah koo ndeye. Kanjum woni muuyo Allah ngam mooɗon, onon hawtuɓe bee Yeesu Almasiihu.

¹⁹Taa kaɗe kuugal Ruuhu Allah.

²⁰Taa njawe annabaakuuji.

²¹Linye kuuje fuu, njogite ko wooɗi.

²²Ndaaye irin halleende koo ndeyeere.

²³Allah, dokkoowo en salaaman, timmitina senugo on bee hoore mum. O ayna on on laaɓɓe bee ruuhu e yoŋki e ɓanndu fuu, ngam laatooɗon ɓe ngalaa feloore nyalaade loraaki Jawmiraawo meeɗen Yeesu Almasiihu.

²⁴Allah, ewniiɗo on waɗanan on ɗum, ngam o koolniiɗo.

²⁵Deerɗiraaɓe, torane min.

²⁶Koofne deerɗiraaɓe fuu bee harlotirgo bana no ɗum haandani senaaɓe.

²⁷Mi ɗon toro on bee innde Jawmiraawo: Njaŋngane deerɗiraaɓe fuu bataakewol ngo'ol.

²⁸Mo'ere Jawmiraawo meeɗen Yeesu Almasiihu wondu bee mooɗon.