Read Fulfulde Yosuwa 11 Bible Online

Yosuwa 11 - Fulfulde bible

Yosuwa 11

¹Yabin, laamiiɗo Hacoor nani habaru jaalorgal Isra'iila'en. O neli haa Yobaba, laamiiɗo Maduuna, non boo haa laamiiɗo Simron e laamiiɗo Akisaf

²e laamiiɓe wonɓe haa woyla dow kooseeje e nder waadiwol Urdun haa fombina Kinneret e nder lesdi towndiije e haa Nafot Door gal hiirnaaŋge,

³haa Kanaani'en gal fuunaaŋge e hiirnaaŋge, haa Amoori'en e Heti'en e Perezzi'en e Yebusi'en dow kooseeje e Hewi'en haa les hooseere Hermoon nder lesdi Mispa.

⁴Laamiiɓe man ngari, kamɓe e jama'aaje konu maɓɓe fuu, honooɓe ɗuuɗɓe masin bana njaareendi maayo. Ɓe ngaddi boo pucci e mootaaji pucci ɗuuɗɗi.

⁵Laamiiɓe ɓe'e fuu kawti, ɓe caŋngini haa maayel Meerom ngam haa ɓe kaɓa bee Isra'iila'en.

⁶Jawmiraawo wi'i Yosuwa: “Taa hul ɓe! Jaŋngo bana wakkati jonta ɓe fuu ɓe mbaraaɓe. Min mi mbaran ɓe ngam daliila Isra'iila. On coppan korle pucci maɓɓe, on ngulan mootaaji pucci maɓɓe bee yiite.”

⁷Yosuwa e honooɓe muuɗum fuu ukkani ɓe bee juhuki haa maayel Meerom.

⁸Jawmiraawo hokki Isra'iila'en konne'en muuɗum'en. Ɓe njaali ɓe, ɓe taasni ɓe haa ɓe njotti Sidon, berniwol maŋngol, haa Misrefot-Mayim, haa waadiwol Mispa gal fuunaaŋge. Ɓe kaɓi bee maɓɓe, ɓe mbardi ɓe, walaa koo gooto lutti bee yoŋki.

⁹Yosuwa waɗi ɓe bana Jawmiraawo wi'no mo: Ɓe coppi korle pucci maɓɓe, ɓe nguldi mootaaji pucci maɓɓe bee yiite.

¹⁰Nde Yosuwa ɗon lorto, o hippi Hacoor, o mbari laamiiɗo maagol bee kaafahi. Ngol laatino laamorde laamuuji woyla lesdi Kanaana saa'i man.

¹¹Ɓe nattini ko woni nder berniwol fuu, walaa ko lutti bee yoŋki. Ɓe nguli berniwol bee yiite.

¹²Yosuwa nyaami berniiji ɗi'i fuu, o naŋngi laamiiɓe maaji, o nattini ɓe, bana Muusa, jaggiiɗo Jawmiraawo umruno mo.

¹³Ammaa Isra'iila'en ngulaay gure nyiɓaaɗe dow towndiije, sey Hacoor tan Yosuwa wuli ɗum.

¹⁴Isra'iila'en koo'i kuuje marɗe saman e dabbaaji fuu ngam ko'e muuɗum'en, ammaa ɓe mbari yimɓe berniiji man, haa ɓe kalki ɓe fuu.

¹⁵Jawmiraawo umruno Muusa, jaggiiɗo mum, Muusa boo umri Yosuwa, kanjum Yosuwa waɗi ɗum. O waɗi ko Jawmiraawo umruno Muusa fuu, o yeebaay koo ɗume.

¹⁶Yosuwa nyaami lesdi maajum fuu: Lesdi kooseeje e Lesdi Fombina fuu, lesdi towndiije haa fombina e woyla ɗiɗi fuu e lesdi Goosan fuu bee ladde haa fombina maari, non boo waadiwol Urdun.

¹⁷O hooci ndi diga hooseere Halak wakeere Se'ir haa yotti Ba'al-Gada nder waadiwol Libanon haa les hooseere Hermoon. Yosuwa haɓi bee laamiiɓe lesdi man nyalɗe ɗuuɗɗe, ammaa o naŋngi ɓe, o mbari ɓe fuu.

¹⁹Walaa berniwol ɗaɓɓi sulhu bee Isra'iila'en, sey Hewi'en jooɗiiɓe haa Gibiyon. Berniiji goɗɗi fuu ɓe kooci ɗi bee konu.

²⁰Jawmiraawo waɗi ɓe caatina ɓerɗe maɓɓe, ɓe kaɓa bee Isra'iila, ngam haa ɓe nattine, taa ɓe keɓa enɗam sam, bana Jawmiraawo umruno Muusa.

²¹Saa'i maajum Yosuwa yehi, halki Enaki'en nder kooseeje haa Heburuun e Debir e Anaba, nder kooseeje Yahuuda e Isra'iila fuu. Yosuwa nattini maapinndi'en ɓe'e bee gure muuɗum'en fuu.

²²Enaki'en luttaay nder lesdi Isra'iila'en, sey haa Gaaza e Gaat e Asdod ɓe lutti.

²³Yosuwa hooci lesdi fuu, bana Jawmiraawo umruno Muusa. Yosuwa marni ndi Isra'iila'en, senndi ndi fodde le'i maɓɓe. Konu timmi, lesdi heɓi de'ere.