Read Fulfulde Yosuwa 14 Bible Online

Yosuwa 14 - Fulfulde bible

Yosuwa 14

¹Ndaa habaru cennduki lesdi Kanaana haa Isra'iila'en. Eli'azaaru limanjo e Yosuwa ɓii Nuuna e baaba-ci'e'en[12] nder le'i Isra'iila ronni ɓe ɗum.

²Bana Jawmiraawo umruno Muusa, bana non le'i joweenayi e reeta lenyol ta'anaama geɗal muuɗum'en bee waɗugo kur'u.

³Muusa hokkuno le'i ɗiɗi e reeta lenyol geɗal lesdi haa gaɗa Urdun. Danygol Yusufu waɗi le'i ɗiɗi: Manassa e Efrayim. Ammaa o hokkaay Lewi'en geɗal lesdi, sey gure ɗe ɓe njooɗoto e lesdi taariindi ɗe ngam na'i maɓɓe e dammooji maɓɓe.

⁵Bana Jawmiraawo umruno Muusa, bana non Isra'iila'en kuuwri, cenndiri lesdi.

⁶Nyannde feere yimɓe Yahuuda ngari haa Yosuwa haa Gilgal. Gooto nder maɓɓe, Kaaleb ɓii Yefunna Kenizziijo wi'i mo: “A anndi ko Jawmiraawo wi'i Muusa, goɗɗo Allah, dow am e dow maaɗa haa Kaades-Barne'a.

⁷Mi woodino duuɓi cappanɗe nayi, nde Muusa, jaggiiɗo Jawmiraawo nela yam diga Kaades-Barne'a ngam horugo lesdi ndi'i. Mi lornani mo jaawaabu laaɓŋgu.

⁸Banndiraaɓe am yahduɓe bee am kulni ɓerɗe yimɓe. Ammaa min mi tokki Allah Jawmiraawo am bee ɓernde woore.

⁹Nyalaade maajum Muusa huni, wi'i: Lesdi ndi kosɗe ma njaaɓi ndi, a maran ndi, an e danygol ma haa foroy. Ngam a tokki Allah Jawmiraawo ma bee ɓernde woore.

¹⁰Ndaa, diga Jawmiraawo wi'i Muusa wolde maajum, o yeeɗini yam duuɓi cappanɗe nayi e jowi goɗɗi. Wakkati man fuu Isra'iila'en ɗon ngiilo nder ladde. Ndaa, hannde mi woodi duuɓi cappanɗe joweetati e jowi.

¹¹Ammaa koo hannde boo mi cemmbiɗɗo bana nder nyalaade nde Muusa nela yam. Semmbe am he'i haa mi waɗa haɓre, bana naane non jonta boo.

¹²Kadi, hokkam lesdi kooseeje ndi Jawmiraawo wolwi e mum nyalaade man. Saa'i man min ngecci on maapinndi'en wi'eteeɓe Enaki'en ɗon ton, ɓe mari berniiji cemmbiɗɗi boo. Jawmiraawo wonda bee am haa mi riiwa ɓe, bana o wi'i.”

¹³Yosuwa barkiɗini Kaaleb ɓii Yefunna, marni mo Heburuun.

¹⁴Ngam maajum Heburuun laati geɗal Kaaleb ɓii Yefunna Kenizziijo haa wargo hannde, ngam o tokki Allah Jawmiraawo maako bee ɓernde woore.

¹⁵Ɓooyma innde Heburuun wonno Kiriyat-Arba. Arba wonno ɓurɗo mawnugo nder Enaki'en. Nden konu timmi, lesdi de'iti.