Read Fulfulde Yosuwa 17 Bible Online

Yosuwa 17 - Fulfulde bible

Yosuwa 17

¹Lenyol Manassa, afo Yusufu boo heɓi geɗal lesdi maagol. Makir, afo Manassa, baaba Gile'at, heɓi lesdi Gile'at e Baasan ngam o goɗɗo kaɓoowo.

²Yimɓe Manassa luttuɓe keɓi geɗal muuɗum'en haa hiirnaaŋge Urdun, kur'u ta'ani ɓe ɗum. Ɗum yimɓe ci'e Abi'ezer e Helek e Asriyel e Sikem e Hefer e Semida. Ɓe fuu ɓe danygol Manassa ɓii Yusufu.

³Ammaa Celofhad ɓii Hefer ɓii Gile'at ɓii Makir ɓii Manassa, o walaa ɓiɓɓe worɓe, sey ɓiɓɓe rewɓe. Ndaa inɗe maɓɓe: Mahala e No'a e Hogila e Milka e Tirsa.

⁴Kamɓe ɓe ngari haa Eli'azaaru limanjo e Yosuwa ɓii Nuuna e ardiiɓe fuu, ɓe mbi'i: “Jawmiraawo umri Muusa o hokka min geɗal lesdi caka banndiraaɓe amin worɓe.” Fodde umroore Jawmiraawo nde'e ɓe keɓi geɗal lesdi caka wappanyɓe maɓɓe.

⁵Bana nii lenyol Manassa ɓesdanaama geɗe sappo dow Gile'at e Baasan gaɗa Urdun.

⁶Ngam rewɓe nder danygol maako boo ndoni lesdi bana deerɗiraaɓe muuɗum'en worɓe. Ammaa lesdi Gile'at laatani yimɓe Manassa luttuɓe.

⁷Keerol yimɓe Manassa yehi diga Aser haa Mikmetat, tiitotirŋgol bee Sikem. Nden ngol yehi gal fombina haa yimɓe En-Tappuha.

⁸Lesdi Tappuha laatani Manassa, ammaa Tappuha haa keerol Manassa laatani yimɓe Efrayim.

⁹Nden keerol diirti haa maayel Kana. Gure haa fombina maagel laatani Efrayim haa nder maral Manassa. Keerol tokki wakeere maayel woylaare, ngol haaɗi haa Mbeela.

¹⁰Haa fombina maayel man, Efrayim mari lesdi, haa woyla boo Manassa. Mbeela laati keerol le'i ɗiɗi fuu haa hiirnaaŋge. Haa woyla walaadu hiirnaaŋge ɓe njokki lesdi Aser, haa woyla walaadu fuunaaŋge boo lesdi Issakar.

¹¹Haa nder maral Issakar e Aser, Manassa heɓi berniiji ɗi'i: Bayti-Se'an e Yible'am bee gure maaji, non boo Door e En-Door e Ta'anak e Megiddo bee gure maaji. Ɗum waɗi taƴe lesdi tati.

¹²Ammaa yimɓe Manassa mbaawaay riiwugo jooɗiiɓe nder berniiji ɗi'i, ngam maajum Kanaani'en tokki jooɗaago ton.

¹³Nde Isra'iila'en ɓesdi semmbe, ɓe laatini Kanaani'en maccuɓe maɓɓe ngam huuwango ɓe, ɓe ndiiwaay ɓe.

¹⁴Yimɓe danygol Yusufu mbi'i Yosuwa: “Ngam ɗume a hokki min geɗal gootal tan haa lesdi? Min ɗuuɗɓe masin, ngam Jawmiraawo barkiɗini min.”

¹⁵Yosuwa wi'i ɓe: “To on ɗuuɗi bana nii, to kooseeje Efrayim ke'aay on, nden kam njehe nder laynde lesdi Perezzi'en e Refa'en, on mbaɗana ko'e mon gese ton.”

¹⁶Ɓe njaabi: “Lesdi kooseeje he'ataa min. Ammaa Kanaani'en jooɗiiɓe nder lesdi leesndi mari mootaaji pucci njamndiiji, waato jooɗiiɓe haa Bayti-Se'an bee gure mum e wonɓe nder waadiwol Yisre'el fuu.”

¹⁷Yosuwa wi'i yimɓe Yusufu, le'i Efrayim e Manassa: “Fakat on ɗuuɗɓe, on semmbiɗɓe boo. On keɓan ko ɓuri geɗal gootal.

¹⁸Lesdi towndiije laatanto on boo. Koo ɗum laynde, on pe'a nde, on mara lesdi man. Kanaani'en boo, koo to ɓe ngoodi mootaaji pucci njamndiiji, ɓe semmbiɗɓe, onon on ndiiwan ɓe.”