Read Fulfulde Yosuwa 18 Bible Online

Yosuwa 18 - Fulfulde bible

Yosuwa 18

¹Nde yimɓe ummaatoore Isra'iila timmini nyaamugo lesdi, ɓe fuu ɓe mooɓi haa Silo. Ɓe ndarni laymaaru fottirde ton.

²Le'i joweeɗiɗi nder Isra'iila'en keɓaay geɗal muuɗum'en haa lesdi tawon.

³Ngam maajum Yosuwa ƴami Isra'iila'en: “Haa ndey on ɗon ndeena haa on njaha, on mara lesdi ndi Jawmiraawo, Allah baabiraaɓe mon hokki on?

⁴Cuɓe worɓe tato tato nder le'i fuu. Mi nelan ɓe, ɓe ndaara lesdi fuu, ɓe mbinnda ndi deydey senndugo ndi, nden ɓe ngarta haa am.

⁵En cenndan ndi geɓe[13] joweeɗiɗi. Yahuuda jooɗoto nder lesdi mum haa fombina. Yimɓe Yusufu boo njooɗoto nder lesdi muuɗum'en haa woyla.

⁶Sey on mbinnda no geɓe lesdi man joweeɗiɗi mba'i, ngaddaneeɗam ɗum. Min mi waɗanan on kur'u ngam ƴamango on muuyo Allah Jawmiraawo men.

⁷Lewi'en keɓataa geɗal lesdi caka mooɗon, ngam kuugal limanku Jawmiraawo woni geɗal maɓɓe. Gada e Ruben e reeta lenyol Manassa njaɓi geɗe muuɗum'en gaɗa Urdun gal fuunaaŋge. Muusa, jaggiiɗo Jawmiraawo hokki ɓe ɗe.”

⁸Worɓe maajum ummi ngam ɓe ndilla. Yosuwa faamtini ɓe: “Ngaance nder lesdi fuu, mbinnde ndi, nden ngarte haa am. Min boo mi ƴaman muuyo Jawmiraawo bee waɗugo kur'u ngam mooɗon haa Silo ɗo.”

⁹Ɓe njehi, ɓe ngaanci nder lesdi fuu, ɓe mbinndi haa deftere no ɓe cenndiri ndi geɓe joweeɗiɗi, ɓe mbinndi inɗe berniiji maari fuu. Nden ɓe ngarti haa Yosuwa nder saŋngeere haa Silo.

¹⁰Ton Yosuwa waɗani ɓe kur'u yeeso Jawmiraawo. Bana nii o yeɗiri le'i Isra'iila luttuɗi go lesdi muuɗum'en.

¹¹Aran kur'u waŋgini geɗal lenyol Benyamin bee geɓe maagol. Ɓe keɓi geɗal lesdi hakkunde yimɓe Yahuuda e yimɓe Yusufu.

¹²Haa woyla, keerol maɓɓe fuɗɗi haa maayo Urdun. Ngol yehi hooseere haa woyla Yeriko, ngol tokki lesdi towndiije gal hiirnaaŋge, haa yotti ladde Baytawiina.

¹³Nden ngol yehi haa wakeere hooseere Luus fombinaare — Luus e Baytila ɗum gootel. Keerol diirti haa Aterot-Addar dow hooseere haa fombina Baytihurun-les.

¹⁴Nden ngol wayliti diga wakeere hooseere tiitotirnde bee Baytihurun hiirnaaŋgeere yahugo fombina haa yotti Kiriyat-Ba'al — kanjum woni Kiriyat-Ye'arim — berniwol nder maral yimɓe Yahuuda. Kanjum woni keerol hiirnaaŋgewol.

¹⁵Haa fombina, keerol fuɗɗi haa seɓatto Kiriyat-Ye'arim. Ngol yehi hiirnaaŋge haa yotti ceeɓooje Menefto'a.

¹⁶Nden keerol diirti haa les hooseere tiitotirnde bee waadiwol Ɓii-Hinnom, haa sera waadiwol Refayim woylaaha. Ngol diirti waadiwol Hinnom haa wakeere Yebusi'en fombinaare, yahugo En-Rogel.

¹⁷Ngol wayliti gal woyla, ngol yehi haa En-Semes, nden haa Gelilot ko tiitotiri bee wa'orde Adumiima. Ngol diirti haa hayre Bohan — Bohan woni ɓii Ruben.

¹⁸Nden ngol tokki woyla hooseere tiitotirnde bee waadiwol Urdun, ton ngol diirti.

¹⁹Nden keerol tokki haa woyla hooseere Bayti-Hogila. Ngol haaɗi haa nastirde maayo Urdun nder Weendu Mannda, haa sera weendu man wakeere woyla. Kanjum woni keerol fombinaawol.

²⁰Maayo Urdun woni keerol fuunaaŋgewol. Kanjum woni geɗal lenyol Benyamin bee geɓe maagol.

²¹Berniiji lenyol Benyamin bee geɓe maagol, ɗi'i: Yeriko e Bayti-Hogila e Emek-Kesis

²²e Bayti-Araba e Cemarayim e Baytila

²³e Awwim e Para e Ofra

²⁴e Kefar-Ammoonay e Ofni e Geba, ɗum berniiji sappo e ɗiɗi bee gure maaji.

²⁵Woodi boo Gibiyon e Rama e Biirot

²⁶e Mispe e Kefiira e Mosa

²⁷e Rekem e Yirpeyel e Tarala

²⁸e Ceela e Elef e Yebusi — kanjum woni Urusaliima — e Gibiya e Kiriyat, ɗum berniiji sappo e nayi bee gure maaji. Kanjum woni geɗal lenyol Benyamin bee geɓe maagol.