Read Fulfulde Yosuwa 2 Bible Online

Yosuwa 2 - Fulfulde bible

Yosuwa 2

¹Diga Sittim Yosuwa ɓii Nuuna neli horooɓe ɗiɗo bee sirri, wi'i ɓe: “Njehe, ndaare lesdi e berniwol Yeriko.” Ɓe ndilli, ɓe nasti saare debbo daakaareejo, innde muuɗum Rahab. Ɓe mbaali ton.

²Laamiiɗo Yeriko anndinaama: “Jemmaare nde'e worɓe Isra'iila'en woɗɓe ngari horugo lesdi.”

³O neli yimɓe haa Rahab, ɓe mbi'a mo: “Wurtin worɓe warɓe haa maaɗa, nastuɓe saare ma, ngam ɓe ngari horugo lesdi ndi fuu.”

⁴Ammaa Rahab nyukkini worɓe ɗiɗo go. O wi'i nelaaɓe laamiiɗo: “Nonnon, worɓe man ngari haa am, ammaa mi anndaano toy ɓe iwi.

⁵Nde jemma waɗi, wakkati maɓɓugo dammugal berniwol, ɓe ngurti. Mi anndaa haa toy ɓe ndilli. Taasne ɓe bee jaawal, nden kam on njokkoto ɓe.”

⁶Ammaa gooŋga kam, o wa'ini ɓe dow soorowol maako, o nyukkini ɓe les ƴommbe leŋ ɗe o saɓɓino.

⁷Nden, nelaaɓe laamiiɗo ngurti berniwol, dammuɗe maagol maɓɓaama. Ɓe taasni Isra'iila'en ɗiɗo go dow laawol yahugo Urdun haa ɓe njotti eerorɗe.

⁸Hiddeko horooɓe go mbaalo, Rahab wa'i haa maɓɓe dow soorowol.

⁹O wi'i ɓe: “Mi anndi Jawmiraawo hokki on lesdi ndi. Haala mooɗon hulni min masin, ɓerɗe yimɓe lesdi ndi fuu ta'i.

¹⁰Ngam min nani no Jawmiraawo yoorniri ndiyamji maayo Maaliya yeeso mooɗon nde ngurtiiɗon Misra. Min nani boo ko mbaɗɗon Sihon e Ook laamiiɓe Amoori'en ɗiɗo haa gaɗa Urdun, no on nattiniri ɓe.

¹¹Min nani ɗum, ɓerɗe amin ta'i ngam daliila kulol yeeso mooɗon. Allah Jawmiraawo mon, kaŋko woni Allah haa asama e lesdi, haa dow bee les fuu.

¹²Jonta kam, kunaneeɗam bee Jawmiraawo on mbaɗanan saaro'en am mbooɗeeŋga bana no mi waarani on. Kolleeɗam alaama laaɓka!

¹³Acce baaba am e daada[1] am ngeeɗa, non boo deerɗiraaɓe am worɓe e rewɓe bee banndiraaɓe muuɗum'en fuu, kisne min maayde.”

¹⁴Horooɓe mbi'i mo: “Min maaya mbattudi[2] mooɗon! Ammaa taa on pefta haala amin sam. Nyannde nde Jawmiraawo hokki min lesdi ndi'i, min mbaɗante mbooɗeeŋga, min kebbitinante amaana.”

¹⁵Saare Rahab ɗon ɗakkotiri bee mahol berniwol. Ngam maajum o jippini worɓe ɗiɗo go bee ɓoggol gal wurdere mahol.

¹⁶O wi'i ɓe: “Njehe gal kooseeje, ngam taa taasnooɓe on potta bee mooɗon. Cuuɗe ton nyalɗe tati haa to ɓe ngarti, nden tokkitine laawol mon.”

¹⁷Ɓe mbi'i mo: “Min mbaɗan ko a hunni min,

¹⁸ammaa an boo, ndaa ko mbaɗata: To min nasti lesdi mon, haɓɓu ɓoggol boɗeewol ngo'ol haa wurdere nde njippinɗa min e maare. Mooɓtu baaba ma e daada ma e deerɗiraaɓe ma e yimɓe saare baaba ma fuu nder saare ma.

¹⁹To goɗɗo maɓɓe wurtake saare ma, ƴiiƴam maako loroto dow hoore maako, minin boo min laaɓɓe. Ammaa koo moy gonduɗo bee maaɗa nder saare, to juŋngo goɗɗo meemi mo, nden kam ƴiiƴam maako lortan dow ko'e amin.

²⁰To a fefti haala amin haa woɗɓe, nden kam min ndimɗan e hunayeere nde kunnuɗa min.”

²¹Rahab wi'i: “Nonnon, bana mbi'ɗon.” Nden o jaɓɓiti ɓe, ɓe ndilli. Kaŋko boo o haɓɓi ɓoggol boɗeewol go haa wurdere suudu.

²²Horooɓe njehi gal kooseeje, paɓɓi ton nyalɗe tati haa taasnooɓe lorti haa Yeriko. Taasnooɓe ɗaɓɓitino ɓe koo toy fuu, tawaay ɓe.

²³Horooɓe ɗiɗo go ndiirti kooseeje, eeri maayo, ngarti haa Yosuwa ɓii Nuuna. Ɓe ngecci mo ko heɓi ɓe fuu.

²⁴Nden ɓe mbi'i mo: “Fakat, Jawmiraawo hokki en lesdi maajum fuu haa juuɗe meeɗen. Yimɓe ton fuu ɗon kula en haa ɓerɗe maɓɓe ta'i.”