Read Fulfulde Yosuwa 21 Bible Online

Yosuwa 21 - Fulfulde bible

Yosuwa 21

¹Baaba-ci'e'en nder lenyol Lewi ngari haa Eli'azaaru limanjo e Yosuwa ɓii Nuuna e baaba-ci'e'en nder le'i Isra'iila.

²Ton haa Silo nder lesdi Kanaana ɓe mbi'i ɓe: “Jawmiraawo umri bee hunnduko Muusa haa min keɓa berniiji haa min njooɗoto e durduɗe ngam dabbaaji amin.”

³Ngam daliila umroore Jawmiraawo nde'e, Isra'iila'en koo'i berniiji goɗɗi nder geɗe muuɗum'en, ndokki ɗi Lewi'en.

⁴Aran ɓe mbaɗi kur'u ngam waŋgingo geɗal ci'e Kahati'en nder lenyol Lewi. Danygol Haruna limanjo heɓi berniiji sappo e tati haa le'i Yahuuda e Simon e Benyamin.

⁵Kahati'en luttuɓe keɓi berniiji sappo haa ci'e nder le'i Efrayim e Dan e reeta lenyol Manassa.

⁶Danygol Gerson heɓi berniiji sappo e tati haa ci'e nder Issakar e Aser e Neftali e reeta lenyol Manassa nder lesdi Baasan.

⁷Danygol Meraari fodde ci'e maagol heɓi berniiji sappo e ɗiɗi haa le'i Ruben e Gada e Zabulon.

⁸Bana nii Isra'iila'en ndokki Lewi'en berniiji bee durduɗe maaji. Ɓe ta'ani ɓe ɗi bee waɗugo kur'u, bana Jawmiraawo umruno bee hunnduko Muusa.

⁹Ndaa inɗe berniiji ɗi yimɓe le'i Yahuuda e Simeyon ndokki

¹⁰danygol Haruna nder ci'e Kahati'en, Kahat o ɓii Lewi. Kur'u aranu yeɗi ɓe ɗi:

¹¹Ɓe keɓi Kiriyat-Arba — Arba o baaba Enak — bi'eteeŋgol Heburuun, nder kooseeje Yahuuda, kaŋgol e durduɗe maagol taariiɗe ngol.

¹²Ammaa gese berniwol man e gure maagol, ɓe ngeɗno ɗum Kaaleb ɓii Yefunna, ɗum laati maral maako.

¹³Danygol Haruna heɓi berniwol Heburuun — kaŋgol woni gootol nder berniiji kisruɗi — e Libna e Yatir e Estemo'a e Holon e Debir e Asan e Yuta e Bayti-Semes, kanji bee durduɗe maaji, ɗum berniiji joweenayi haa le'i Yahuuda e Simon.

¹⁷Haa lenyol Benyamin ɓe keɓi berniiji nayi: Gibiyon e Geba e Anatot e Almon, kanji bee durduɗe maaji.

¹⁹Liman'en danygol Haruna keɓi berniiji sappo e tati bee durduɗe maaji.

²⁰Ci'e Lewi'en luttuɗe nder danygol Kahat, kur'u yeɗi ɓe berniiji goɗɗi nder lesdi Efrayim.

²¹Ɓe keɓi berniiji nayi bee durduɗe maaji: Sikem nder kooseeje Efrayim — kaŋgol woni berniwol kisrugol — e Gezer e Kibsayim e Baytihurun.

²³Haa lesdi Dan ɓe keɓi berniiji nayi: Elteke e Gibbeton e Ayyalon e Gat-Rimmon, kanji bee durduɗe maaji.

²⁵Haa lesdi reeta lenyol Manassa ɓe keɓi berniiji ɗiɗi: Ta'anak e Yible'am, kanji bee durduɗe maaji.

²⁶Ci'e luttuɗe nder danygol Kahat keɓi berniiji sappo bee durduɗe maaji.

²⁷Danygol Gerson ɓii Lewi heɓi berniiji ɗiɗi haa reeta lenyol Manassa: Golan nder lesdi Baasan — kaŋgol woni berniwol kisrugol — e Be'estera, kanji bee durduɗe maaji.

²⁸Haa lesdi Issakar ɓe keɓi berniiji nayi: Kisiyon e Daberat e Yarmut e En-Gannim, kanji bee durduɗe maaji.

³⁰Haa lesdi Aser ɓe keɓi berniiji nayi: Miseyal e Abdon e Helkat e Rehob, kanji bee durduɗe maaji.

³²Haa lesdi Neftali ɓe keɓi berniiji tati: Keedes nder Galiili — kaŋgol woni berniwol kisrugol — e Hammot-Door e Kartan, kanji bee durduɗe maaji.

³³Ci'e Gersoni'en keɓi berniiji sappo e tati bee durduɗe maaji.

³⁴Ci'e Lewi'en luttuɗe nder danygol Meraari keɓi berniiji nayi haa lesdi Zabulon: Yokne'am e Karta e Rimmona e Nahalal, kanji bee durduɗe maaji.

³⁶Haa lesdi Ruben gaɗa maayo Urdun ɓe keɓi berniiji nayi: Beser haa ƴoolde laddeere tiitotirnde bee Yeriko — kaŋgol woni berniwol kisrugol — e Yahas e Kedemot e Mefa'at, kanji bee durduɗe maaji.

³⁸Haa lesdi Gada ɓe keɓi berniiji nayi: Ramot nder Gile'at e Mahanayim e Hesbon e Ya'ajer, kanji bee durduɗe maaji.

⁴⁰Ci'e Lewi'en luttuɗe nder danygol Meraari, kur'u yeɗi ɗe berniiji sappo e ɗiɗi.

⁴¹Haa nder maral Isra'iila'en fuu, Lewi'en keɓi berniiji cappanɗe nayi e joweetati bee durduɗe maaji taariiɗe ɗi.

⁴³Bana nii Jawmiraawo hokkiri Isra'iila'en lesdi fuu ndi o hunani baabiraaɓe maɓɓe o hokkan ɓe. Ɓe mari ndi, ɓe njooɗi nder maari.

⁴⁴Jawmiraawo hokki ɓe salaaman haa keeri lesdi maɓɓe fuu bana o hunani baabiraaɓe maɓɓe. O hokki ɓe jaalorgal dow konne'en maɓɓe fuu, walaa koo gooto dartani ɓe. O marni ɓe ndi.

⁴⁵O gooŋɗini bolle maako booɗɗe fuu ɗe o wolwani Isra'iila.