Read Fulfulde Yosuwa 22 Bible Online

Yosuwa 22 - Fulfulde bible

Yosuwa 22

¹Nden Yosuwa ewni yimɓe le'i Ruben e Gada e reeta lenyol Manassa.

²O wi'i ɓe: “On mbaɗi ko Muusa, jaggiiɗo Jawmiraawo umri on fuu. On ɗowtani umrooje am boo.

³Nyalɗe ɗuuɗɗe ɗe'e fuu on meeɗaay accugo banndiraaɓe mon Isra'iila'en haa wargo hannde. On tokki umrooje Allah Jawmiraawo mon.

⁴Jonta o hokki banndiraaɓe mon salaaman, bana o wi'no ɓe. Kadi, lorte, ndille haa cuuɗi mon nder lesdi maral mon ndi Muusa, jaggiiɗo Jawmiraawo hokki on gaɗa Urdun.

⁵Ammaa kakkile booɗɗum ngam haa on tokko tawreeta fuu ka Muusa, jaggiiɗo Jawmiraawo umri on: Ngiɗe Allah Jawmiraawo mon, tokke laabi maako, ɗowtane umrooje maako, ɗakkotire bee maako, njaggane mo bee ɓerɗe mon e yoŋkiiji mon fuu.”

⁶Nden Yosuwa jaɓɓiti ɓe, barkiɗini ɓe, wi'i: “Koote cuuɗi mon bee jawdi ɗuuɗndi e dabbaaji ɗuuɗɗi masin, bee cardi e kaŋŋeeri e njamndi mboɗeeri e ɓaleeri e limce ɗuuɗɗe masin. Ndokke banndiraaɓe mon geɗal haa ko keɓɗon haa konne'en mon.” Kamɓe ɓe kooti. Reeta lenyol Manassa, Muusa hokkuno ɓe maral nder lesdi Baasan. Ammaa reeta maɓɓe feere, Yosuwa hokki ɓe lesdi gaa'e Urdun, wakeere hiirnaaŋge kommbi le'i goɗɗi.

⁹Bana nii yimɓe le'i Ruben e Gada e reeta lenyol Manassa kooti. Ɓe acci Isra'iila'en luttuɓe haa Silo nder lesdi Kanaana, ɓe ndilli haa lesdi Gile'at, maral maɓɓe. Ɓe mari lesdi man fodde umroore Jawmiraawo bee hunnduko Muusa.

¹⁰Nde yimɓe le'i Ruben e Gada e reeta lenyol Manassa njotti haa Gelilot gaa'e Urdun nder lesdi Kanaana, ɓe mahi hirsirde mawnde masin ton haa maayo.

¹¹Isra'iila'en luttuɓe nani: “Ndaa, yimɓe le'i Ruben e Gada e reeta lenyol Manassa mahi hirsirde haa Gelilot kommbi Urdun, haa wakeere meeɗen.”

¹²Nde ɓe nani ɗum, jama'aare fuu mooɓi haa Silo ngam ɓe njaha haɓugo bee maɓɓe.

¹³Isra'iila'en neli Pinehas ɓii Eli'azaaru, limanjo haa yimɓe le'i Ruben e Gada e reeta lenyol Manassa nder lesdi Gile'at.

¹⁴Mawɓe sappo njahdi bee maako, fodde limgal le'i Isra'iila haa hiirnaaŋge Urdun, koo moy maɓɓe o ardiiɗo lenyol nder Isra'iila'en.

¹⁵Ɓe ngari haa yimɓe le'i Ruben e Gada e reeta lenyol Manassa nder lesdi Gile'at, ɓe mbi'i:

¹⁶“Ndaa nii jama'aare Jawmiraawo fuu wi'i: Koni ngewɗon umroore Allah Isra'iila? On mahani ko'e mon hirsirde, bee maajum on tuurtani Jawmiraawo, hannde on acci tokkaago mo.

¹⁷Ciftore hakke meeɗen haa Pe'or. Ngam hakke man Jawmiraawo hiiti en, ukkani en masiibo. Haa wargo hannde ngeenaari maajum timmaay tawon. Bone maajum he'aay na?

¹⁸Kadiboo on acci tokkaago mo jonta! Nde on tuurtani Jawmiraawo hannde, jaŋngo o tikkanan jama'aare Isra'iila fuu.

¹⁹Ammaa to on ndaari maral lesdi mooɗon soɓi, nden kam ngare haa lesdi ndi Jawmiraawo mari, haa jooɗorde maako woni. To on ngiɗi, ta'e mare caka amin. Ammaa taa tuurtane Jawmiraawo bee mahugo hirsirde nde luuti hirsirde Allah Jawmiraawo meeɗen. Taa tuurtane min boo.

²⁰Ciftore no Akan ɓii Zeraha yewri umroore Allah dow kuuje kaɗaaɗe. Ngam aybe maajum tikkere Jawmiraawo wari dow jama'aare Isra'iila fuu. Naa Akan feere mum tan halki ngam daliila hakke mum.”

²¹Yimɓe le'i Ruben e Gada e reeta lenyol Manassa mbi'i ɓe:

²²“Allah Jawmiraawo woni Allah mawɗo! Allah Jawmiraawo woni Allah mawɗo! Kaŋko o anndi ngam ɗume min mbaɗi ɗum. Annde ɗum onon boo! To min tuurti fakat, to min ngewi umroore Jawmiraawo, nden kam taa o hisna min hannde!

²³To min mahani ko'e amin hirsirde nde'e ngam haa min lii'o guleteeɗi e dokke nyaamdu e kirseteeɗi ngam kawtal yimɓe bee Allah haa ɗo, to ɗum laatake ngam haa min acca tokkaago Jawmiraawo, nden kam o hiito min!

²⁴Ammaa naa non, min kuli taa ɓikkoy mon mbi'a ɓikkoy amin jaŋngo: Ko yaali on bee Jawmiraawo, Allah Isra'iila.

²⁵Jawmiraawo waɗi maayo Urdun ngo'o keerol hakkunde amin bee mooɗon. Onon yimɓe Ruben e Gada, walaa ko hawti on bee Jawmiraawo. Teema ɓikkoy mon kaɗan ɓikkoy amin hulugo Jawmiraawo bana nii.

²⁶Ngam maajum min mbi'mbi'tiri: Sey en maha hirsirde, naa ngam guleteeɗi malla kirseteeɗi,

²⁷ammaa nde laato seedamku hakkunde amin bee mooɗon e hakkunde danygol amin garanŋgol bee ngol mooɗon. Nde seedo minin boo min ɗon mbaɗana Jawmiraawo dewal bee guleteeɗi amin e dokke amin e kirseteeɗi amin ngam kawtal yimɓe. Ngam taa ɓikkoy mon mbi'a ɓikkoy amin jaŋngo: Walaa ko hawti on bee Jawmiraawo.

²⁸Min mbi'i: To ɓe mbi'i bana nii, nden kam ɓikkoy amin mbi'an: Ndaa, baabiraaɓe amin mbaɗi hirsirde fotunde kal bee hirsirde Jawmiraawo. Nde laataaki ngam guleteeɗi malla kirseteeɗi, ammaa ngam haa nde laato seedamku hakkunde amin bee mooɗon.

²⁹Aa'a! min tuurtantaa Jawmiraawo, haa min acca tokkaago mo hannde, min maha hirsirde ngam lii'aago guleteeɗi e dokke nyaamdu e kirseteeɗi. Min mbaɗataa hirsirde feere nde luuti hirsirde Allah Jawmiraawo meeɗen, nde dari yeeso jooɗorde maako.”

³⁰Pinehas limanjo e mawɓe jama'aare wonduɓe bee muuɗum, ardiiɓe Isra'iila'en nani ko yimɓe le'i Ruben e Gada e Manassa mbi'i. Ɗum fottani ɓe.

³¹Pinehas ɓii Eli'azaaru, limanjo wi'i ɓe: “Jonta min anndi Jawmiraawo ɗon wondi bee meeɗen. Onon on ngewaay umroore maako. Bana nii on kisniri Isra'iila'en kiita maako.”

³²Nden Pinehas e mawɓe acci yimɓe Ruben e Gada haa lesdi Gile'at, ɓe kooti lesdi Kanaana haa Isra'iila'en. Ɓe ngecci ɓe haala maajum.

³³Habaru man fottani Isra'iila'en, ɓe maŋgti Allah. Ɓe acci wolwugo haala haɓre bee yimɓe Ruben e Gada e wonnugo lesdi maɓɓe.

³⁴Yimɓe Ruben e Gada mbi'i: “Hirsirde nde seedoto hakkunde meeɗen, no Jawmiraawo woni Allah.” Ngam maajum ɓe inndi nde Hirsirde Seedoore.